သျှမ်းပြည် ဖယ်ခုံမြို့နယ် စစ်ရှောင်များ အားကိုးနေရသည့် ဆောင်းဖွေးဆေးရုံကို ဗုံးကြဲတိုက်ခိုက်ရာ သူနာပြုတစ်ဦးအပါအဝင် စစ်ရှောင် ၃ ဦး ထိခိုက်ဒဏ်ရာရရှိပြီး စစ်ရှောင်များ ထပ်မံ ထွက်ပြေးနေရကြောင်း စုံစမ်းသိရသည်။
ယမန်နေ့ (ဧပြီလ ၂၅ ရက်) မွန်းလွဲ ၁ နာရီခန့် ဖယ်ခုံမြို့နယ် စစ်ဘေးရှောင်များ အသုံးပြုသည့် ဆောင်းဖွေးဆေးရုံကို စစ်ကောင်စီမှ Mi 35 တိုက်လေယာဉ်ဖြင့် ဗုံး ၄ လုံးထက်မနည်း ဗုံးကြဲ တိုက်ခိုက်ခဲ့သောကြောင့် သူနာပြုတစ်ဦး အပါအဝင် လူ ၃ ဦး ထိခိုက်ဒဏ်ရာ ရရှိခဲ့ကြောင်း စစ်ရှောင်ကူညီသူ ဒေသခံတစ်ဦးက သျှမ်းသံတော်ဆင့်ကို ပြောသည်။
“ထိခိုက်ဒဏ်ရာ ရသူက အခုလောလောဆယ်သိတာ ၃ ယောက် ရှိတယ်ဗျ။ အမျိုးသမီး ၂ ယောက်ပါတယ်။ ဆုံးသွားတဲ့သူကတော့ မရှိဘူးဗျ။ စစ်ရှောင်စခန်းတွေက ပျက်စီးသွားတာ အတော်များတယ်။ စစ်ရှောင်အင်အားက ၃၀၀ ကျော်လောက်ရှိတယ်။ အဲ့ဒီ ဆေးရုံ အရှေ့ဖက်မှာ နေကြတာ။ သူတို့က သုံးလုံး လောက်ပစ်ချတယ်။ ပေါင် ၅၀၀ တစ်လုံးက ကံကောင်းစွာနဲ့ မကွဲလို့ ကွဲရင်အတော်ကို ပျက်စီးသွားမှာ “ ဟု ၎င်းက ပြောသည်။
အဆိုပါ စစ်ကောင်စီမှ တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် လက်ရှိ စစ်ရှောင်စခန်းရှိ စစ်ရှောင်ဦးရေ ၃၀၀ ကျော်မှာ ဘေးလွတ်ရာ တောတောင်အတွင်းသို့ ထွက်ပြေး တိမ်းရှောင်နေခဲ့ရကြောင်း သိရသည်။
ထို့အပြင် စစ်ရှောင်ဦးရေ ၃၀၀ ကျော်သည် အရေးပေါ် တောတောင်အတွင်းသို့ ထွက်ပြေးတိမ်းရှောင်ရသဖြင့် စားနပ်ရိက္ခာနှင့် ဆေးဝါးလည်း လိုအပ်နေကြောင်း စစ်ရှောင်ကူညီသူ ဒေသခံတစ်ဦးက ထပ်လောင်းပြောသည်။
“ အခုက လူစုပြီး မနေရဲတော့ဘူး။ နီးစပ်ရာ တောတောင်တွေမှာ သွားခိုလှုံနေရတယ်။ နေ့ဘက်မှာ အန္တရာယ်လည်း အရမ်းများတော့ လုံခြုံတဲ့ နေရာနေဖို့လည်း ထုတ်ပြန်ထားတာတွေလည်း ရှိတယ်။ အဓိက ခက်ခဲတာတော့ တောတောင်ထဲကို ချက်ချင်းပြောင်းသွားရတယ်ဆိုတော့ စားနပ်ရိက္ခာပိုင်းလိုအပ်တယ်။ အဲ့ဒီ ဆေးရုံက ဖယ်ခုံ၊ မိုးဗြဲ၊ ဒီမော့ဆိုက အားကိုးရတဲ့ ဆေးရုံဖြစ်တော့ အခုလို ဗုံးလာကြဲတာ နဲ့ပတ်သက်ပြီး ဆေးဝါးတွေ အတော်ကို အခက်ခဲဖြစ်သွားတယ် “ ဟု ၎င်းက ဖြည့်စွက်ပြောသည်။
ဖယ်ခုံမြို့နယ် စစ်ရှောင်စခန်းအပါအဝင် ဆောင်းဖွေးဆေးရုံကို စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်ခြင်းနှင့် ပတ်သက်ပြီး စစ်ကောင်စီ တပ်ဖွဲ့မှ ၎င်းတို့၏ ဝါဒဖြန့် မီဒီယာတွင် ထုတ်ပြန်ထားခြင်း မရှိသေးပေ။
စစ်တပ်က အာဏာသိမ်းပြီးနောက်ပိုင်း မြန်မာနိုင်ငံအတွင်းရှိ စစ်ရှောင်စခန်း အပါအဝင် ဒေသခံပြည်သူများ၏ နေအိမ်၊ စာသင်ကျောင်းများကိုပါ စစ်ကောင်စီတပ်ဖွဲ့မှ တိုက်လေယာဉ်ဖြင့် တိုက်ခိုက်နေလျက်ရှိကြောင်း သိရသည်။
Leave a Comments