သျှမ်းပြည် ကျောက်မဲခရိုင် နောင်ချိုမြို့နယ် လုံခင်းကျေးရွာအတွင်း စစ်ကောင်စီက ပြည်သူပိုင် ပစ္စည်းများ၊ ကြက်၊ဝက် နှင့် အခြေခံစားသောက်ကုန်များကို ယူသုံးဆောင်ထားကြောင်း သတင်းရရှိသည်။
ပြီးခဲ့သည့် ဧပြီ ၂၂ ရက်နေ့တွင် စစ်ကောင်စီတပ်သားများသည် လုံခင်းကျေးရွာအတွင်းသို့ ဝင်ရောက်လာခဲ့ပြီး ပြည်သူများ စစ်ဘေးရှောင်နေချိန် ရွာတွင်း မွှေနှောက်ခဲ့ကြောင်း ဒိုးပင်ကျေးရွာ အုပ်စု ဒေသခံတစ်ဦးက ပြောသည်။
“သူတို့ ဒီလိုလုပ်နေတာ ဒါနဲ့ဆိုရင် ၃ ကြိမ်ရှိနေပြီ။ ကျနော်တို့ ရွာသားတွေ စစ်ဘေးရှောင်နေရတဲ့အချိန်မှာ ရွာထဲမှာရှိတဲ့ ဝက်တွေကိုသတ်စားပစ်တယ်။ ဆန်တွေ၊ ဆီတွေကိုလည်း ယူသွားတယ်။ စစ်ကောင်စီတပ်တွေ ဝင်လာခဲ့တာ။ ပြီးတော့ အိမ်တွေထဲလည်း ဝင်မွှေပြီးတော့ တန်းဖိုရှိတဲ့ ပစ္စည်းတွေကိုလည်း ယူသွားတယ်” ဟု ၎င်းက ပြောသည်။
ထိုသို့ စစ်ကောင်စီတပ်များသည် ဧပြီ ၂၂ ရက်မှ ယမန်နေ့ (ဧပြီ ၂၄ ) ရက် ထိ လုံခင်းကျေးရွာတွင်းသို့ နေထိုင်သွားခဲ့ကြောင်း သိရသည်။
အဆိုပါ စစ်ကောင်စီက ကျေးရွာတွင် ဝင်ရောက်မွှေနှောက်ခဲ့သည့်အတွက်ကြောင့် ဒေသခံများက စိတ်မကောင်းဖြစ်နေပြီး စိုးရိမ်နေကြသည်။
“ စစ်ကောင်စီတို့က သူတို့ စားချင်တိုင်း လာယူစားနေကြတယ်။ ပြီးတော့ ကျနော်တို့ ရွာထဲမှာ လုပ်ချင်တိုင်းလုပ်တယ်။ လာတဲ့ တပ်ဖွဲ့တွေကလည်းများတယ်။ မေးရင်လည်း သူတို့မလုပ်ဘူးလို့ပြောတယ်။ တာဝန်ယူတာလည်းမရှိဘူး။ စိတ်တော့မကောင်းဘူး။ ပြီးတော့ ကြောက်ရတယ်။ လက်နက်ကြီးတွေ ထပ်ပစ်မှာလည်း စိုးရိမ်ရတယ်” ဟု အထက်ပါ ဒေသခံက ပြောသည်။
စစ်ကောင်စီတပ်သားများသည် အထက်ပါ ကျေးရွာ ဒေသခံ ပစ္စည်းများကို ဝင်ရောက်သုံးစွဲခဲ့သည့် အတွက်ကြောင့် ပြည်သူများက ကျေးရွာအတွင်းသို့ ပြန်လာနေထိုင်ရန်အတွက် စီစဉ်နေလျက်ရှိကြောင်း သိရသည်။
“ ဟုတ်တယ်။ ကျနော်တို့ ရွာထဲပြန်လာနေဖို့ စစ်ရှောင်တွေကို ပြန်ခေါ်လာနေတယ်။ တိုက်ပွဲကတော့ ငြိမ်တာတော့ရှိတယ်။ ပြီးတော့ အခုကလည်း အလုပ်ချိန် ပြန်စတော့မယ်။ အလုပ်လည်း ပြန်လုပ်ရတော့မယ်” ဟု လက်ရှိ စစ်ဘေးရှောင်နေသူက ပြောသည်။
နောင်ချိုမြို့နယ်သည် ဧပြီ ၅ ရက်မှစပြီး စစ်ကောင်စီ နှင့် မန္တလေးပြည်သူ့ကာကွယ်ရေးတပ်ဖွဲ့ တို့ တိုက်ပွဲစတင်ဖြစ်ပွားခဲ့ပြီး တိုက်ပွဲကြား အရပ်သား ၇ ဦး သေဆုံးသွားခဲ့ရသည်။
