သျှမ်းပြည် လဲချားမြို့နယ် နှင့် မိုင်းနောင်မြို့ နယ်စပ်အတွင်း သျှမ်းတပ် (၂) တပ် တိုက်ပွဲဖြစ်ပွားသောကြောင့် မိုင်းနောင်မြို့ရှိ မင်္ဂလာရန်အောင် ကျောင်းတိုက်မှာ စစ်ဘေးရှောင် (၁၀၀) ကျော် နေရပ်ပြန်ရန် အခက်အခဲ ဖြစ်နေကြောင်း စုံစမ်း သိရှိရသည်။
အဆိုပါ စစ်ရှောင်များသည် မိုင်းနောင်မြို့ ဝမ်တုံကျေးရွာ၊ လုံယန်းကျေးရွာ၊ ဖိုင်မွမ့်ကျေးရွာ စသည့် ဒေသခံ (၁၀၀) ကျော်တို့သည် ဧပြီ (၁၃) ရက် မှ ယနေ့ ဧပြီ (၂၄) ရက်နေ့ထိ (၁၀) ရက်ကျော်ကြာ စစ်ရှောင်ထွက်ပြေးနေရကြောင်း သိရှိရသည်။
“အခုချိန်က ကောက်ပဲသီးနှံတွေ ရိတ်သိမ်းချိန်ဖြစ်လို့ အိမ်ပြန်ပြီး ပြန်ရိတ်သိမ်းချင်ပေမယ့် တိုက်ပွဲအခြေနေက မငြိမ်သေးဘူး။ လက်ဖက်တွေ ခူးရမယ့် အချိန်ဖြစ်နေပြီ။ ခုရာသီက ခူးလို့ အကောင်းဆုံး အချိန်ဖြစ်တယ်။ မဟုတ်ရင် လက်ဖက်ရွက်တွေ ရင့်လာရင် ခူးလို့ မရတော့ဘူး။ ဒီလို တိုက်ပွဲဖြစ်တော့ အဘက်ဘက် ထိခိုက်ကုန်တယ်” ဟု စစ်ရှောင်အမျိုးသား တစ်ဦး ကပြောသည်။
ထိုစစ်ရှောင်များသည် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့သည် ပြီးခဲ့သည့် ဧပြီ (၁၁) ရက်မှစပြီး လဲချားမြို့နယ်အတွင်း ထိတွေ့ တိုက်ပွဲဖြစ်ပွားခဲ့သည်။
“သူတို့လည်း အရမ်းကို ပြန်ချင်နေပြီ။ ဒါပေမယ့် တိုက်ပွဲက မငြိမ်သေးဘူး။ ပြန်ရင်လည်း ပြန်ပေးလာရမှာကို စိုးရိမ်နေတယ်။ စစ်ရှောင် (၁၀၀) ကျော်လောက်ပဲ မိုင်းနောင်ဘက်ကို ထွက်ပြေးလာတာ။ ကျန်တဲ့ ရွာတွေက လဲချားဘက် ထွက်ပြေးတာတွေလည်း ရှိတယ်”ဟု မိုင်းနောင်မြို့မှ စစ်ရှောင်များကို ကူညီပေးသည့် ဒေသခံ တစ်ဦး ကပြောသည်။
ဧပြီ (၁၁) ရက်နေ့မှ စပြီး သျှမ်းတပ် (၂) တပ်ဖြစ်သည့် SSPP/SSA နှင့် RCSS/SSA တို့က လဲချားမြို့နယ်အတွင်း ထိတွေ့တိုက်ပွဲ ဖြစ်ပွားပြီး လဲချားမြို့ပေါ်ရှိ ဘုန်းကြီးကျောင်းများထံ ဒေသခံ ၅၀၀ ကျော် စစ်ရှောင်ထွက်ပြေး ခိုလှုံနေပြီး စားနပ်ရိက္ခာ ကူညီထောက်ပံ့ပေးမှု လိုအပ်နေကြောင်း စုံစမ်းသိရသည်။
Leave a Comments