သျှမ်းပြည်မြောက်ပိုင်း နမ့်ဆန်မြို့နယ် ငွန်းဆိုင်းကျေးရွာတွင် မီးလောင်မှု ဖြစ်ပွားခဲ့ပြီး အမျိုးသား တစ်ဦး အပါအဝင်၊ နေအိမ်အများအပြားက မီးလောင်ပျက်စီးရကြောင်း စုံစမ်းသိရသည်။

ယနေ့ (ဧပြီ ၂၁) ရက်နေ့ နံနက် ၂ နာရီကျော် မှ စတင်ကာ နမ့်ဆန်မြို့နယ် ငွန်းဆိုင်းကျေးရွာတွင် မီးလောင်မှု ဖြစ်ပြီး အသက် ၈၀ ကျော် အရွယ်ရှိ အမျိုးသား တစ်ဦး နှင့် အိမ်နီးချင်း အချို့ မီးဟပ်ဒဏ်ရာ ရသွားကြောင်း သိရသည်။

“မီးလောင်မှုက ဘယ်ကနေ စသလဲတော့ မသိရဘူး၊ မနက် ၂ နာရီမှာ စလောင်တာ၊ မီးသတ်ကားတွေ ရောက်လာတဲ့ အချိန်က ၃ နာရီ လောက် ရှိနေပြီ၊ အမျိုးသား တစ်ဦးက မီးလောင်ထဲ ပါသွားပြီး သေ သွားတယ်၊ တချို့သူ ကလည်း မီးဟပ်တဲ့ ဒဏ်ရာရသွားတယ်လို့ သိရတယ်။ ကြီးကြီးမားမားတော့ မဟုတ်ဘူး” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

မီးလောင်မှုသည် နံနက် ၂ နာရီဝန်းကျင်မှ စတင်လောင်ကျွမ်းခြင်း ဖြစ်ပြီး နံနက် ၅ နာရီမှ မီးများကို ငြိမ်းသက်နိုင်ခဲ့ခြင်း ဖြစ်ကြောင်း သိရသည်။

အဆိုပါ မီးလောင်မှုကြောင့် အမျိုးသား တစ်ဦး သေဆုံး ရသည့်အပြင် နေအိမ် ၄ လုံးလည်း ပြာကျသွားပြီး၊ တချို့ မီးကူးခံရပြီး မီးလောင်ပျက်စီးရသည့် နေအိမ်လည်း ရှိနေသေးကြောင်း သိရသည်။

လက်ရှိတွင် နေအိမ် မီးလောင်ပျက်းစီးရသည့် ဒေသခံများအတွက် ပြန်လည်နေရာချထားရေးနှင့် ကူညီထောက်ပံ့ပေးမှုများ လိုအပ်နေကြောင်း ဒေသအတွင်းက အမည်မဖော်လိုသူ အသက် ၃၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

“အခုမှာတော့ ပရဟိတ တချို့က လာကြည့်ပေးတာ ရှိတယ်၊ ပြာကျသွားတဲ့ အိမ်တွေ ပြန်ဆောက်နိုင်ဖို့နဲ့ သူတို့ လောလောဆယ်ဆယ် နေနိုင်ဖို့အတွက်ကလည်း စီစဥ်ရအုံးမယ်၊ တစ်နေ့လုပ် တစ်နေ့စားတွေ ဆိုတော့ သူတို့ အတွက် ပြင်ပအကူအညီရနိုင်ရင် ကောင်းမှာ” ဟု အမည်မဖော်လိုသူ အသက် ၃၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်သည် ပွင့်လင်းရာသီ ရောက်ရှိလာသည့်အတွက် မီးဘေးအန္တရာယ်များကို သတိထားကာ ကြိုတင် ရှောင်ရှားသင့်ကြောင်းလည်း နမ့်ဆန်ဒေသအတွင်းက အမည်မဖော်လို ပရဟိတ အသင်းဝင် တစ်ဦးက သျှမ်းသံတော်ဆင့်ကို ပြောသည်။

“ဒီဘက်က ထင်းမီးတွေကိုပဲ အသုံးပြုကြတာ များတယ်၊ တောင်ယာ အလုပ်သွားတဲ့ အချိန်ဆို မီးကို သေချာ ငြိမ်းသတ်ပေးခဲ့ရာမှာပေါ့၊ အခုချိန်က ခြောက်သွေ့တဲ့ ရာသီလည်း ဖြစ်နေတော့ ပိုပြီးတော့ သတိထားရမှာ၊ မီးလောင်လွယ်နိုင်တဲ့ဟာတွေကိုလည်း သေချာ ထိန်းသိမ်းသင့်တယ်” ဟု အထက်ပါ ပရဟိတက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလတုန်းကလည်း သီပေါမြို့နယ် စံဖိတ်ကျေးရွာရှိ ဘုန်းကြီးကျောင်း တစ်ကျောင်း မီးလောင်ရာမှ အသက် (၁၁) နှစ်အရွယ် ကိုရင်တစ်ပါး မီးထဲ ပျံလွန်တော်မူ သွားခဲ့သည်။

၂၀၂၃ ခုနှစ်မှ စတင်ပြီး ယခု ဧပြီလအထိ သျှမ်းပြည်တွင်း မီးလောင်မှုကြောင့် နေအိမ်များ နှင့် ဘုန်းကြီးကျောင်းများ (၁၀၀) နီးပါး မီးလောင် ပျက်စီးဆုံးရှုံးမှု ဖြစ်ပွားခဲ့ပါသည်။

စစ်တပ် အာဏာသိမ်းပြီးနောက်ပိုင်း မြန်မာနိုင်ငံ အပါအဝင် သျှမ်းပြည်တွင်း လျှပ်စစ်မီး ပုံမှန် မရရှိသောကြောင့် မီးများ မကြာခဏ ပျက်ပြီး လျှပ်စစ် ဝါယာရှောခ့်များ ဖြစ်ပွားကာ မီးလောင်မှုများ ဖြစ်ပေါ်စေခဲ့သည်။