သျှမ်းပြည် ကျောက်မဲခရိုင်အတွင်းတွင် တစ်ရက်တည်း အတွင်း အာဏာသိမ်း စစ်ကောင်စီ တပ်ဖွဲ့က လက်နက်ကြီးဖြင့် ၁၀ လုံးထက်မနည်း ပစ်ခတ်မှု ရှိနေကြောင်း သတင်းသိရသည်။
ယမန်နေ့ (ဧပြီ ၁၉) ရက် ညနေပိုင်း ၇ နာရီမှ စတင်ကာ ကျောက်မဲမြို့နယ် မြောက်ဘက်ရှိ စစ်ကောင်စီ ခြေမြန်တပ်ရင်း တပ်အမှတ် ၅၀၁ (ခမရ) သည် တအာင်း (ပလောင်) အမျိုးသားလွတ်မြောက်ရေး တပ်မတော် TNLA ပူးပေါင်း တပ်ဖွဲ့ PDF တို့နှင့် ထိတွေ့တိုက်ပွဲ ဖြစ်ပွားပြီး လက်နက်ကြီးများ ပစ်ခတ်မှု ရှိနေကြောင်း သိရသည်။
အဆိုပါ တိုက်ပွဲသည် ယနေ့ (ဧပြီ ၂၀) ရက် နံနက်ပိုင်း ၅ နာရီအထိ ပစ်ခတ်သံများ ကြားရကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီဘက်က လက်နက်ကြီး ၄ လုံး ထက်မနည်း ပစ်ခဲ့တယ်။ ခမရ ၅၀၁ တပ်စခန်းကို TNLA နဲ့ PDF က ပေါင်းပြီး လာပစ်တာလို့ သိရတယ်။ အများဆုံးကတော့ စက်သေနတ်သံတွေ ကြားရတာ” ဟု ကျောက်မဲမြို့မှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ ဧပြီလ ၁၉ ရက်နေ့ ညနေ ၆ နာရီဝန်းကျင်တွင် ထိတွေ့တိုက်ပွဲ ပစ်ခတ်မှုများ မရှိသည့် ကျောက်မဲခရိုင်၊ နောင်ချိုမြို့နယ်ရှိ လုံခန်ကျေးရွာ အတွင်းသို့လည်း လက်နက်ကြီး ၆ လုံးထက် မနည်း ပစ်ခတ် လိုက်ကြောင်း ဒေသခံများက သျှမ်းသံတော်ဆင့်ကို ပြောသည်။
“ချောင်းဆုံမှာ တပ်စွဲထားတဲ့ စစ်ကောင်စီက လုံခန်ရွာဘက်ကို လက်နက်ကြီး ၆ လုံးထက်မနည်း ပစ်သွားတယ်၊ ရွာထဲကိုတော့ ကျရောက်ပေါက်ကွဲတာမျိုး မရှိဘူး၊ လုံခန်ရွာကို ကျော်ပြီးတော့ လုံခန်ရွာနဲ့ ပိန်းညုရွာ (ဝၢၼ်ႈပဵင်းၼိဝ့်) ကျကွဲတာ၊ တိုက်ပွဲတွေလည်း မရှိပဲနဲ့ စစ်ကောင်စီက ပစ်တာ” ဟု နောင်ချိုဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
တိုက်ပွဲမရှိဘဲ စစ်ကောင်စီ တပ်ဖွဲ့မှ လက်နက်ကြီးများ ပစ်ခတ်မှုကြောင့် ဒေသအတွင်း ကျန်ရှိနေသေးသည့် ဒေသခံပြည်သူများကို ကြောက်လန့်စေပြီး တချို့ကလည်း ကြိုတင် စစ်ရှောင်ထွက်ပြေးသွားကြောင်း ဒေသခံများက ဆက်ပြောသည်။
လက်ရှိတွင် နောင်ချိုမြို့နယ်အတွင်း၌ မြေပြင်ထိတွေ့တိုက်ပွဲ ငြိမ်သက်နေသော်လည်း အာဏာသိမ်း စစ်ကောင်စီ တပ်ဖွဲ့ နှင့် ပြည်သူ့ကာကွယ်ရေးပူးပေါင်း တပ်ဖွဲ့ PDF တို့အကြား စစ်ရေးတင်းမာမှုများ ရှိနေသေးကြောင်း သိရသည်။
လက်ရှိတွင် နောင်ချိုမြို့နယ်အတွင်း ရက်ရှည် တိုက်ပွဲ ဖြစ်ပွားမှုကြောင့် ဒေသခံ (၃,၀၀၀) နီးပါး စစ်ရှောင်ထွက်ပြေး နေကြရကြောင်းလည်း သိရသည်။
အာဏာသိမ်း စစ်ကောင်စီ တပ်ဖွဲ့သည် ငြိမ်းချမ်းရေး လုပ်ငန်းစဥ်များ ဖော်ဆောင်ရန် အတွက်ဟုဆိုကာ တစ်နိုင်ငံလုံး အတိုင်းအတာဖြင့် တစ်နှစ်ကြာ အပစ်ရပ်ထားကြောင်း ထုတ်ပြန်ကြေညာထားသော်လည်း မြေပြင် တိုက်ပွဲက ဆက်လက်ဖြစ်ပွားနေဆဲ ဖြစ်သည်။
Leave a Comments