သျှမ်းပြည် ကျောက်မဲခရိုင် နမ့်လန်မြို့နယ်ခွဲရှိ ရွှေဆိုင်တစ်ဆိုင်အတွင်း လက်နက်ကိုင် အမျိုးသား (၃) ဦး ဝင်ရောက်ဓားပြတိုက်ရာ အမျိုးသား (၁) ဦး ဖမ်းဆီးရမိကြောင်း စုံစမ်း သိရှိရသည်။
ယနေ့ ဧပြီ (၂၀) ရက် မနက်ပိုင်းချိန်က လက်နက်ကိုင် အမျိုးသား (၃) ဦးမှ နမ့်လန်စျေးအနီးရှိ “ပြည့်ဝရွှေဆိုင်” တစ်ဆိုင်တွင် ဓားပြဝင်တိုက်ရာမှ ပြည်သူများ ဝိုင်းဝန်းဖမ်းဆီးရာ (၁) ဦး ဖမ်းဆီးရမိပြီး (၂) ဦး လွတ်မြောက်သွားကြောင်း သိရသည်။
“မနက်ပိုင်းက ဖြစ်သွားတာ။ အဲ့ ဓားပြတွေလည်း သူတို့ ဆိုင်ဖွင့်ဖို့ကို စောင့်နေတာလဲ ဖြစ်နိုင်တယ်။ ရွှေဆိုင် ဖွင့်လိုက်တာနဲ့ ဓားပြဝင်တိုက်တယ်။ ဘာမှတော့ မရသွားဘူး။ အနီးနားက သူတွေ ဝိုင်းဖမ်းတော့ ၁ ယောက်တော့ ဖမ်းမိပြီး ရဲလက်ထဲကိုတော့ အပ်ထားပြီ” ဟု နမ့်လန်ဒေသခံ အမျိုးသားတစ်ဦး က သျှမ်းသံတော်ဆင့် ကိုပြောသည်။
အဆိုပါ ဖမ်းဆီးရမိသည့် အမျိုးသားတစ်ဦးကို စစ်ဆေးရာတွင် ၎င်းတို့သည် အဖွဲ့လိုက်ရှိပြီး နမ့်လန်စျေးအတွင်း “သစ်ဆန်းရွှေဆိုင်”ကို ပြီးခဲ့သည့် ဇန်နဝါရီလက ဓားပြဝင်တိုက်သည့် အဖွဲ့ဖြစ်နိုင်ကြောင်းလည်း နမ့်လန်ဒေသခံများက ပြောဆိုကြသည်။
“သူတို့က အုပ်စုလိုက်ရှိကြတာ ထင်တယ်။ ဖမ်းမိထားတဲ့ တစ်ယောက်ကို စစ်ဆေးတဲ့အခါမှာ ကျနော်တို့ သိရသလောက်က သစ်ဆန်း ရွှေဆိုင် နဲ့ သီပေါမြို့က “ရီရှင်းရွှေဆိုင်” ကို ဓားပြဝင်တိုက်တာ သူတို့ပဲဖြစ်တယ်” ဟု နမ့်လန်ဒေသခံ တစ်ဦး ကပြောသည်။
ပြီးခဲ့သည့် ၂၀၂၃ ဇန်နဝါရီ ၂၀ ရက် ညနေ ၄ နာရီဝန်းကျင်တွင် နမ့်လန်မြို့နယ်ခွဲရှိ “သစ်ဆန်း” ရွှေဆိုင်သို့ သေနတ်ကိုင်ဆောင်ထားသည့် အမျိုးသား နှစ်ဦးက ဝင်ရောက် ဓားပြတိုက်ယူသည့်အတွက် ရွှေ နှင့် ငွေ စုစုပေါင်း တန်ဖိုး ၃၀၀ ကျော် ဓားပြတိုက်ယူမှု ဖြစ်ပွားခဲ့သည်။
အလားတူ ၂၀၂၃ ဖေဖော်ဝါရီ ၂၁ ရက် ညနေ ၄ နာရီခွဲတွင် သီပေါမြို့ရှိ ရီရှင်းရွှေဆိုင် ဓားပြတိုက်ခံရပြီး ရွှေ ၆ ပိဿကျော် ပါသွားကြောင်း သိရှိရသည်။
ရီရှင်းရွှေဆိုင်သည် လွန်ခဲ့သည့် ၂၀၂၁ ခုနှစ် ဖေဖော်ဝါရီ ၂၁ ရက်တွင်လည်း ဓားပြတိုက်မှု တကြိမ် ကြုံခဲ့ရပြီး ရွှေ ၁ ပိဿခန့် ပါသွားခဲ့ဖူးသည်။
စစ်ကောင်စီမှ နိုင်ငံတော် အာဏာသိမ်းယူပြီးနောက်ပိုင်းတွင် သျှမ်းပြည်အပါဝင် နိုင်ငံတစ်ဝှမ်းလုံး၌ ခိုးဆိုးလုယက်မှု၊ ဓားပြတိုက်မှု ပေါများလာပြီး သက်ဆိုင်ရာ လုံခြုံရေးတာဝန်ရှိသူများကလည်း နှိမ်နှင်းအရေးယူမှု မရှိသဖြင့် ပြည်သူများက လုံခြုံမှု မရှိကြောင်း ပြောဆိုကြသည်။
