သျှမ်းပြည် တောင်ကြီးခရိုင် ရပ်စောက်မြို့နယ် ဘုရားဖြူကျေးရွာရှိ ဘုန်းကြီးကျောင်းတစ်ကျောင်း မီးလောင်ရာမှ မီးထဲသံဃာတော်တစ်ပါး ပျံလွန်တော်မူခဲ့ပြီး ကိုရင်တစ်ပါး ဒဏ်ရာ ရရှိခဲ့ကြောင်း စုံစမ်း သိရှိရသည်။
ယမန်နေ့ (ဧပြီ ၁၉) ရက် ည (၉) နာရီကျော်က မီးလောင်မှုဖြစ်ပွားပြီး သက်တော် (၇၀) ခန့်ရှိ ဆရာတော်တစ်ပါး မီးထဲ ပျံလွန်တော်မူသွားပြီး ကိုရင်တစ်ပါး ဒဏ်ရာရရှိသဖြင့် ဆေးရုံသို့ ဆေးကုသမှု ပို့ဆောင်ထားကြောင်း သိရသည်။
“ကျောင်းက ၂ ထပ် ကျောင်းဆောင်ဖြစ်တယ်။ တစ်ကျောင်းလုံး မီးလောင်သွားတယ်။ ကျောင်းတိုင်တွေပဲ ကျန်တော့တယ်။ တစ်ကျောင်းလုံး ပြာဖြစ်သွားကုန်ပြီ။ ဆရာတော် တစ်ပါး ပျံလွန်တော်မူ သွားပြီးတော့ ရုပ်အလောင်းတောင် ကောက်လို့မရဘူး။ ကိုရင်တစ်ပါးက ကျောင်းပေါ်ကနေ ခုန်ဆင်းတဲ့အတွက် ခြေထောက်ကျိုးသွားတယ်” ဟု ရပ်စောက်မြို့မှ သွားရောက်ကူညီပေးသည့် မဇ္ဇျိမ အသင်း မှ တာဝန်ရှိသူ တစ်ဦး ကပြောသည်။
အဆိုပါ မီးလောင်မှု ဖြစ်ပွားခြင်းသည် ဘုရားမီးပူဇော်ရာမှ စပြီး မီးလောင်မှုဖြစ်ပွားခြင်း သို့မဟုတ် လျှပ်စစ် ဝါယာရှော့ခ်ဖြစ်ပွားခြင်း ဖြစ်နိုင်ကြောင်း အသေးစိတ် အချက်လက်များကို မသိရှိရသေးပေ။
“မီးက ဘယ်ကနေ စလောင်လဲဆိုတာကိုတော့ အသေးစိတ် အချက်လက် မသိရသေးဘူး။ ဘုရားမီး ကနေဖြစ်တာလား ဝါယာရှောခ့် ကနေဖြစ်တာလား မပြောတတ်ဘူး။ မီးညွှန့်အရမ်းကြီးတော့ (၄၅) မိနစ်လောက် မီးလောင်သွားတယ်။ အဲ့ကျောင်းထဲမှာ သံဃာ (၂) ပါးပဲ ရှိတယ်။ တခြား ကျောင်းဆောင်တွေတော့ သံဃာတွေ ရှိတယ်” ဟု ရပ်စောက်မြို့မှ သွားရောက်ကူညီပေးသည့် မဇ္ဇျိမ အသင်း မှ တာဝန်ရှိသူ တစ်ဦး ကပြောသည်။
ပြီးခဲ့သည့် ဖေဖော်ဝါရီလတုန်းကလည်း သီပေါမြို့နယ် စံဖိတ်ကျေးရွာရှိ ဘုန်းကြီးကျောင်း တစ်ကျောင်း မီးလောင်ရာမှ အသက် (၁၁) နှစ်အရွယ် ကိုရင်တစ်ပါး မီးထဲ ပျံလွန်တော်မူ သွားခဲ့သည်။
၂၀၂၃ ခုနှစ်မှ စတင်ပြီး ယခု ဧပြီလအထိ သျှမ်းပြည်တွင်း မီးလောင်မှုကြောင့် နေအိမ်များ နှင့် ဘုန်းကြီးကျောင်းများ (၁၀၀) နီးပါး မီးလောင် ပျက်စီးဆုံးရှုံးမှု ဖြစ်ပွားခဲ့ပါသည်။
စစ်တပ် အာဏာသိမ်းပြီးနောက်ပိုင်း မြန်မာနိုင်ငံ အပါအဝင် သျှမ်းပြည်တွင်း လျှပ်စစ်မီး ပုံမှန် မရရှိသောကြောင့် မီးများ မကြာခဏ ပျက်ပြီး လျှပ်စစ် ဝါယာရှောခ့်များ ဖြစ်ပွားကာ မီးလောင်မှုများ ဖြစ်ပေါ်စေခဲ့သည်။
Leave a Comments