သျှမ်းပြည် ကျောက်မဲခရိုင် နောင်ချိုမြို့နယ် ဟိုခဲကျေးရွာအုပ်စုတွင် စစ်ကောင်စီတပ်ဖွဲ့ နှင့် မန္တလေး ပြည်သူ့ကာကွယ်ရေး ပူးပေါင်းတပ်ဖွဲ့ (MDY- PDF) တို့ ထိတွေ့တိုက်ပွဲကြား နေအိမ် ၂၀ လုံးထက်မနည်း ထိခိုက်ပျက်စီးခဲ့ရကြောင်း စုံစမ်းသိရသည်။
ပြီးခဲ့သည့် (ဧပြီလ ၅ ရက်)မှစပြီး ၁၀ ရက်ကျော်ကြာ နောင်ချိုမြို့နယ်အတွင်းတွင် စစ်ကောင်စီတပ်ဖွဲ့ နှင့် MDY – PDF တို့ ထိတွေ့တိုက်ပွဲအကြား ဒေသခံနေအိမ် ၂၀ လုံးထက်မနည်း ပျက်စီးဆုံးရှုံးခဲ့ရကြောင်း နေရပ်ပြန်သွားသည့် စစ်ရှောင်တစ်ဦးက သျှမ်းသံတော်ဆင့်ကို ပြောသည်။
“ လောလောဆယ် ကျနော်တို့ ရွာမှာတော့ နေအိမ် ၂၀ လုံးလောက်က ထိထားတယ်ဗျ။ အိမ်ခေါင်မိုးတွေ၊ ထရံအကာတွေ အကုန် ပျက်စီးသွားတာပေါ့။ ရွာထဲမှာ ၁၀ ရက်ကျော်ကျော်လောက် တိုက်ပွဲဆက်တိုက် ဖြစ်ထားတာ။ ဒီနေ့ အခြေနေလေးငြိမ်တယ်ဆိုလို့ ရွာကိုပြန်ကြည့်တော့ ရွာမှာ ဘယ်သူမှလည်း မရှိတော့ဘူး တစ်ရွာလုံး ထွက်ပြေးခဲ့ရတယ် “ ဟု ၎င်းက ပြောသည်။
အဆိုပါ တိုက်ပွဲဖြစ်ပွားမှုကြောင့် ကုန်းကြီး၊ ဟိုခဲ၊ ကုန်းညောင်၊ ရေဦးကြူကော်၊ နားနွဲ့၊ တော်မွန်း၊ အင်းမဟိုခို၊ ကုလားရွာလွယ်ငင်းမှ ဒေသခံပြည်သူ စုစုပေါင်း (၁,၀၀၀) ကျော်သည် နေရပ်စွန့်ပြီး ထွက်ပြေးတိမ်းရှောင်နေရကြောင်း သိရသည်။
လက်ရှိ စစ်ရှောင်အများစုသည် နောင်ချိုမြို့နယ်ရှိ အုမ္မသီးကျောင်း၊ လမ်းခွဲကျောင်း နှင့် ဘန့်ဘွေးကျောင်းတွင် ထွက်ပြေးတိမ်းရှောင်နေရပြီး နေရပ်ပြန်ရန် စိုးရိမ်ပူပန်နေရကြောင်း သိရသည်။
“ အခုချိန်မှာတော့ ဝမ်းနည်းတဲ့ သူဝမ်းနည်းနဲ့ နေရပ်ပြန်ချင်တဲ့သူကလည်း စိုးရိမ်ရ နဲ့ စိတ်ဒုက္ခအမျိုးမျိုး ကြုံနေရတာပေါ့။ တချို့ စုဆောင်းထားတဲ့ စပါးတွေလည်း မီးလောင်သွားကုန်ပြီ၊ နေအိမ်တွေလည်း နေချင်စရာ မရှိအောင် ပျက်စီးသွားတော့ အကုန်ပြန်ပြင်ရတော့မယ်။ ပြန်ပြင်ဖို့အတွက် ကူညီပေးတဲ့ သူရှိရင်တော့ ကောင်းတာပေါ့ “ ဟု ၎င်းက ထပ်လောင်းပြောသည်။
ထို့အပြင် နောင်ချိုမြို့နယ် နှင့် ပြင်ဦးလွင်မြို့နယ်တွင် စစ်ကောင်စီဘက်မှ စစ်ကြောင်းထိုးခြင်း၊ အင်အားဖြည့်တင်းခြင်း ရှိနေသဖြင့် အချိန်မရွေးတိုက်ပွဲ ဖြစ်ပွားနိုင်ကြောင်း မန္တလေးပြည်သူ့ကာကွယ်ရေး ပူးပေါင်းတပ်ဖွဲ့ MDY-PDF မှ တာဝန်ခံတစ်ဦးက ပြောသည်။
“လက်ရှိ စစ်ရေးက တင်းမာနေဆဲပါဗျ။ အချိန်မရွေး တိုက်ပွဲက ဖြစ်နိုင်တယ်။ သူတို့က လေယာဉ်တွေနဲ့ အဆမတန်၊ ကျနော်တို့ပြည်သူတွေကိုကော၊ တိုက်ပွဲနေရာမဟုတ်တဲ့ နေရာတွေရော လေယာဉ်တွေနဲ့ ဗုံးကြဲတယ်။ ဒေသခံအတွက် ကာကွယ်ရေး၊ လုံခြုံရေးအရတော့ ကျနော်တို့ ကြိုတင်သတိပေးထားတယ်ဗျ။ တိုက်ပွဲဖြစ်တဲ့နေရာနဲ့ ဝေးဝေးရှောင်ဖို့အတွက် သတိပေးထားတယ် “ ဟု ၎င်း တာဝန်ခံတစ်ဦးက ပြောသည်။
နောင်ချိုမြို့နယ်အတွင်း ဖြစ်ပွားသည့် အာဏာသိမ်း စစ်ကောင်စီ တပ်ဖွဲ့ နှင့် MDY PDF ပူးပေါင်း တပ်ဖွဲ့တို့ အကြား တိုက်ပွဲကြောင့် ကလေးငယ် အပါအဝင် အရပ်သား ၅ ဦးထက် မနည်း ထိခိုက် ပျက်စီးရသည့်အပြင် နေအိမ် အဆောက်အအုံများလည်း ထိခိုက်ပျက်စီးရသည်။
