သျှမ်းပြည် တောင်ကြီးခရိုင် ပင်လောင်းမြို့နယ် ကောင်းမဲသင်းကျေးရွာတွင် စစ်ကောင်စီ လက်နက်ကြီး ပစ်ခတ်မှုကြောင့် ဘုန်းကြီးကျောင်း နှင့် နေအိမ်တစ်ချို့ ပျက်စီးခဲ့ကြောင်း စုံစမ်းသိရှိရသည်။

၂ လနီးပါး ပင်လောင်းမြို့နယ် နှင့် ဖယ်ခုံမြို့နယ်တွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ကြား တိုက်ပွဲပြင်းထန်ပြီး စစ်ကောင်စီဘက်မှ နေ့စဉ် လက်နက်ကြီး ရမ်းသမ်းပစ်ခတ်နေကြောင်း ပင်လောင်းမြို့ ဒေသခံ အမျိုးသားတစ်ဦးက ပြောသည်။

“စစ်တပ်ဘက်ကနေတော့ လက်နက်ကြီးတွေကို နေ့တိုင်းလိုလိုပစ်နေတာပဲ။ ကောင်းမဲသင်းဘက်မှာ စစ်တပ်က လက်နက်ကြီးပစ်လို့ နေအိမ်တွေ နဲ့ ဘုန်းကြီးကျောင်းတွေ ပျက်စီးတာတွေရှိတယ်။ ဘယ်လောက်ပျက်စီး လဲတော့ ကျနော်တို့လည်း အတိအကျမပြောနိုင်ဘူး။ အဲ့ဘက်က သွားလာလို့တော့ မရဘူးလေ” ဟု ၎င်းက ပြောသည်။

ယခုရက်ပိုင်းအတွင်း စစ်ကောင်စီက လက်နက်ကြီးဖြင့်သာ အများဆုံး တိုက်ခိုက်နေပြီး တိုက်ပွဲ ဆက်လက် ပြင်းထန်နေကြောင်း သိရသည်။

ထိုအပြင် ယနေ့ထိတိုင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တိုက တိုက်ပွဲနေ့စဉ်ဖြစ်ပွား နေလျက်ရှိကြောင်း ပအိုဝ်းအမျိုးသားကာကွယ်ရေးတပ်ဖွဲ့ PNDF KK က သတင်းနှင့် ပြန်ကြားရေး တာဝန်ခံ ခွန်ဗွေဟုန်း က ပြောသည်။

“ တိုက်ပွဲကတော့ ပြင်းထန်နေသေးတယ်။ ပြီးခဲ့တဲ့ရက်ကတော့ စစ်ကောင်စီက လက်နက်ကြီးတွေကို ဆက်တိုက်ပစ်တာရှိတယ်။ လက်နက်ကြီးက ရွာတွေထဲ နဲ့ ဘုန်းကြီးကျောင်းတွေမှာကျတာရှိပါတယ်။ သူတို့အခုက လက်နက်ကြီးတွေနဲ့ပဲ အများဆုံး ပြန်သုံးလာတယ်။ လေယာဉ်နဲ့လည်း ဝဲတယ်။ လေယာဉ်နဲ့ တိုက်ခိုက်လာတာတော့ မရှိသေးဘူး” ဟု ခွန်ဗွေဟုန်းက ပြောသည်။

ပြီးခဲ့သည့် မတ် ၁၁ ရက်နေ့တွင် ပင်လောင်းမြို့နယ် နမ့်နိန်းကျေးရွာအတွင်း စစ်ကောင်စီ ဝင်ရောက်စီးနင်းခဲ့သည့် အတွက်ကြောင့် ကျေးရွာဘုန်းကြီးကျောင်း ပျက်စီးခဲ့ပြီး သံဃာတော် အပါအဝင် ဒေသခံ ၂၂ ဦး သေဆုံးသွားခဲ့သည်။

အဆိုပါ တိုက်ပွဲကြောင့် ပင်လောင်းမြို့နယ်အတွင်း ဆောင်းပြောင် ၊ နမ့်နိန်း ၊ကောင်းမဲသင်း စသည့် ကျေးရွာဒေသခံများက ထွက်ပြေးတိမ်းရှောင်နေရပြီး ၂ လကြာ နေရပ်မပြန်နိုင်သေးပေ။

လက်ရှိ ပင်လောင်းမြို့နယ်ထဲတွင် စစ်ဘေးရှောင် ၆ ထောင်ဝန်းကျင်ရှိနေပြီး စစ်ရှောင်စခန်း ၁၄ ခုရှိထားကြောင်း စစ်ဘေးရှောင်များကို ကူညီပေးနေသည့်သူက ပြောသည်။

“ စစ်ရှောင်တွေကတော့ ပင်လောင်းမြို့ထဲမှာပဲရှိနေသေးတယ်။ နေရပ်မပြန်နိုင်သေးဘူး။ ကျနော်တို့ ပင်လောင်းမြို့နယ်ထဲ မှာတော့ အရင်ကလိုပဲ ၅ ထောင်ကျော် ၆ ထောင်လောက်ရှိတယ်။ သူတို့တွေ အများစုတော့ ဘုန်းကြီးကျောင်း နဲ့ ဓမ္မာရုံတွေမှာနေတယ်။ အခုက စစ်ရှောင်စခန်း ၁၄ ခုလောက်ရှိတယ်” ဟု ၎င်းက ပြောသည်။

စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့သည် ပင်လောင်းမြို့နယ် နှင့် ဖယ်ခုံမြို့နယ် နယ်စပ် တောင်စလုံး၊ မြောက်စလုံး ၊ ခေါင်းအိကျေးရွာဘက်တွင် တိုက်ပွဲဖြစ်ပွားနေလျက်ရှိသည်။