သျှမ်းပြည် မူဆယ်မြို့ ရဲစခန်းတွင် ပစ်ခတ်မှုဖြစ်ပြီး စစ်ကောင်စီ၏ လက်အောက်ခံ ပြည်သူ့စစ်မှ ဗိုလ်မှူးတစ်ဦးအပါအဝင် အရပ်သားပြည်သူ ထိခိုက်ဒဏ်ရာရရှိခဲ့ကြောင်း စုံစမ်းသိရှိရသည်။
ယမန်နေ့ (ဧပြီလ ၁၆ ရက်) ညနေ ၈ နာရီခွဲကျော် အချိန်၌ မူဆယ်မြို့ ရဲစခန်း၏ အနောက်ဘက်ခြမ်းတွင် ပစ်ခတ်မှုဖြစ်ပြီး နာရီဝက်ခန့်အကြာ ပစ်ခတ်မှုသံများ ငြိမ်သွားပြီးနောက် စစ်ကောင်စီ၏ လက်အောက်ခံ ပြည်သူ့စစ်တပ်ဖွဲ့မှ ဗိုလ်မှူးတစ်ဦးအပါအဝင် အရပ်ပြည်သူအချို့ ထိခိုက်ဒဏ်ရာရရှိခဲ့ကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ပစ်ခတ်မှုကတော့ နာရီဝက်ကျော်ကျော်လောက် ဖြစ်သွားတယ်။ ဒါပေမယ့် ဖြစ်သွားတဲ့အချိန်က စကစဖက်က တစ်ဖက်သတ် ရမ်းပစ်တာတွေက များတယ်။ ပုံမှန်အားဖြင့် ဟိုဘက်၊ ဒီဘက် ဖြစ်တာတော့ ခဏလေးပါပဲ။ စကစဘက်က ပြည်သူ့စစ် ဗိုလ်မှူးတစ်ယောက်တော့ ထိခိုက်ဒဏ်ရာရတယ်။ အရပ်သားလည်း ထိခိုက်ဒဏ်ရတယ်ဗျ။ ဘယ်နှစ်ဦးထိခိုက်ရတယ်ဆိုတာလည်း သေချာမသိရဘူး “ ဟု ၎င်းက ပြောသည်။
အဆိုပါ ပစ်ခတ်မှုအတွင်း အရပ်သားအချို့ ထိခိုက်ဒဏ်ရသည်ဟု သိရသော်လည်း အသေးစိတ်ကို မသိရှိကြောင်း ၎င်းက ထပ်လောင်းပြောသည်။
အလားတူ လားရှိုးမြို့ ရပ်ကွက် ၇ တွင်လည်း ပစ်ခတ်မှုဖြစ်ပြီး သေနတ် ပစ်ခတ်သံ ၁၀ ချက်ခန့်ထက်မနည်း ကြားနေရကြောင်း လားရှိုးမြို့ဒေသခံ အမျိုးသမီးတစ်ဦးက ပြောသည်။
“ မနေ့ညကတော့ ကျမတို့ သူငယ်ချင်းသွားတည်းတဲ့ အိမ်ရှေ့လမ်း သေနတ်သံ ၁၀ ချက်ကျော် ခန့်မှန်းကြားရတယ်။ သူတို့ ပတ်လည်အိမ်တွေအကုန် မီးမှိတ်ပြီး ငြိမ်နေကြရတယ်။ အခုနောက်ပိုင်း လားရှိုးလည်း မငြိမ်တော့ဘူး။ ဘယ်သူနဲ့ပစ်ကြတာလဲဆိုတာ မသိရသေးဘူး “ ဟု လားရှိုးဒေသခံ အမျိုးသမီးက ဆိုသည်။
စစ်တပ်က အာဏာသိမ်းပြီးနောက်ပိုင်း မူဆယ်မြို့တွင် မကြာခဏ ပစ်ခတ်မှုဖြစ်ပွားနေပြီး အရပ်သားပြည်သူများလည်း ထိခိုက်ဒဏ်ရရှိခဲ့ကြောင်း သိရသည်။
ပြီးခဲ့သည့် (ဧပြီလ ၁၃ ရက်) လားရှိုးမြို့ ရန်တိုင်းအောင် ဘရားဝင်အနီးရှိ ရေကစားမဏ္ဍပ်တွင် ဗုံး ၃ လုံးပေါက်ကွဲပြီး လူငယ် ၄ ဦးသေဆုံးခဲ့ကြောင်း သိရသည်။
Leave a Comments