သျှမ်းပြည် တောင်ကြီးခရိုင် ပင်လောင်းမြို့နယ် နှင့် ဖယ်ခုံမြို့နယ်ရှိ ကျေးလက်ဒေသတွင် စစ်ကောင်စီတပ်ဖွဲ့မှ စစ်ကြောင်းထိုးလာခြင်းကြောင့် တိုက်ပွဲ အချိန်မရွေး နေ့စဉ် နီးပါးဖြစ်ပွားနေကြောင်း စုံစမ်းသိရှိရသည်။
ပြီးခဲ့သည့် (ဖေဖော်ဝါရီ ၂၄ ရက်)မှစပြီး သျှမ်း – ကယားနယ်စပ်ဒေသ တလျှောက်ရှိ ပင်လောင်း၊ ဖယ်ခုံ၊ မိုးဗြဲဘက်တွင် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့ရာ ၁ လကျော်ကြာပြီ ဖြစ်ကြောင်း သိရသည်။
ယနေ့ အချိန်ထိ စစ်ကောင်စီဘက်မှ စစ်ကြောင်းထိုးလာခြင်းကြောင့် ကျေးလက်ဒေသတွင် အချိန်မရွေး တိုက်ပွဲ ဆက်လက်ဖြစ်ပွားနေဆဲဖြစ်ပြီး ၊ တိုက်ပွဲများ အရှိန်ပိုပြင်းထန်သွားနိုင်ကြောင်း ပအိုဝ်းအမျိုးသား ကာကွယ်ရေးတပ်ဖွဲ့ (ခမ်းကောင်) PNDF KK မှ တာဝန်ခံတစ်ဦးက ပြောသည်။
“ လက်ရှိ တိုက်ပွဲကတော့ ကျနော်တို့ အပြန်အလှန် ပစ်ခတ်မှုတော့ ရှိပါတယ်။ အချိန်မရွေး ဖြစ်နေတယ်။ စစ်ကောင်စီကလည်း သူတို့နေရာတွေ ယူထားတာတွေရှိတော့ ထိတွေ့တိုက်ပွဲက နေ့တိုင်းနီးပါးရှိတယ်။ နေရာကတော့ အတိတကျ မရှိဘူး။ စစ်ကောင်စီအနေ နဲ့လည်း နေရာပေါင်းစုံ စစ်ကြောင်းထိုးလာနေတော့ တိုက်ပွဲကတော့ ဒီထက် ပိုပြင်းထန်ဖို့ရှိတယ် “ ဟု ၎င်းက ပြောသည်။
လက်ရှိ တိုက်ပွဲသည် အချိန်မရွေး တိုက်ပွဲဖြစ်ပွားနေသောကြောင့် လုံခြုံရေးအတွက် မည်သည့်နေရာ၊ မည်သည့်ဒေသတွင် တိုက်ပွဲဖြစ်ပွားနေခြင်းကို အတိအကျကိုတော့ ပြောဆို၍ မရနိုင်ကြောင်း PNDF KKမှ တာဝန်ရှိသူ တစ်ဦးက ထပ်လောင်းပြောသည်။
ထို့အပြင် တိုက်ပွဲအတွင်းမှာ စစ်ကောင်စီတပ်ဖွဲ့မှ အင်အား အလုံးအရင်းသုံးပြီး လေကြောင်းဖြင့်ပါ တိုက်ခိုက်လာသည့်အပေါ်တွင် အထူးသတိထားရကြောင်းလည်း PNDF KK က ပြောဆိုလိုက်သည်။
“ ကျနော်တို့ နွေဦးတော်လှန်ရေး ဖြစ်လာတဲ့အခါ၊ စစ်ကောင်စီကို ပြန်လည်ခုခံတဲ့အခါမှာ စစ်ကောင်စီကတော့ သူတို့ အဝေးပစ်လက်နက်၊ လက်နက်ကြီးတွေကော သုံးတယ်။ လေယာဉ်နဲ့သုံးတဲ့အခါတော့လည်း မနိုင်တော့လို့ ရှိတဲ့ အင်အားနဲ့အကုန်ထုတ်သုံးနေတာ။ လေယာဉ်နဲ့ တိုက်ခိုက်တဲ့ အပေါ်မှာလည်း ကျနော်တို့တော့ သတိထားနေရတာပေါ့ “ ဟု ၎င်းက ဖြည့်စွက်ပြောသည်။
အလားတူ ပင်လောင်းမြို့နယ် နမ့်နိန်းကျေးရွာကိုလည်း စစ်ကောင်စီမှ ရှေ့တန်းဆေးကုစခန်းအဖြစ် အသုံးပြုနေကြောင်း သိထားရသော်လည်း သျှမ်းသံတော်ဆင့် သတင်းမီဒီယာမှ အတည်ပြု၍ မရသေးပေ။
စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ ၁ လကျော်ကြာ တိုက်ပွဲကြောင့် အိုးအိမ်စွန့်ပြီး ထွက်ပြေးတိမ်းရှောင်နေရသူ စစ်ရှောင်ဦးရေ (၅,၀၀၀) ကျော် ရှိနေပြီး စားနပ်ရိက္ခာ၊ ဆေးဝါး နှင့် အဝတ်အထည် စသည် လိုအပ်ချက်များလည်း အကူညီ လိုအပ်နေကြောင်း သိရသည်။
