ထိုင်းနိုင်ငံ လမ်းပွန်းခရိုင် လမ်းပွန်းမြို့နယ်အတွင်း နေထိုင်သည့် မြန်မာရွှေ့ပြောင်း လင်မယား နှစ်ဦးသည် စကားများ ရန်ဖြစ်ရာမှ အမျိုးသမီး နှင့် ကလေးငယ် သေဆုံးသည်အထိ ဖြစ်ပွားခဲ့ကြောင်း စုံစမ်းသိရသည်။

ဖြစ်စဉ်မှာ (ဧပြီလ ၉ ရက်) ညသန်းခေါင်ကျော် (၂) နာရီတွင် မြန်မာရွှေ့ပြောင်း လင်မယားနှစ်ဦး ငှားရမ်းနေထိုင်သည့် တိုက်ခန်းတစ်ခု၌ အချင်းချင်း စကားများ ရန်ဖြစ်ခဲ့ပြီး အသက် ၃၈ နှစ်အရွယ်ရှိ စိုင်းထော် (ခင်ပွန်း) ဖြစ်သူက ၎င်း၏ ဇနီးဖြစ်သူ အသက် ၃၀ နှစ်ကျော် နန်းအုံကို တုတ်ချောင်း နှင့် သံရိုက်သည့်တူဖြင့် ရိုက်သတ်ခဲ့ကြောင်း ၎င်းနှင့်နီးစပ်သူ အသိုင်းအဝိုင်းတစ်ဦးက ပြောသည်။

အလားတူ အသက် ၇ နှစ်အရွယ်ရှိ (စိုင်းမိန်း) ၎င်း၏ သားငယ်ကိုလည်း သတ်ဖြတ်ခဲ့ပြီး အဆိုပါ အလောင်းကို အခန်းထဲတွင် သော့ခတ်ပြီး လျှို့ဝှက်ခဲ့ကာ ယမန်နေ့ (ဧပြီ ၁၁ ရက်) ညနေပိုင်းတွင် ပုတ်ပွပြီး သေဆုံးနေသည့် မိခင်နှင့်ကလေး အလောင်းကို ရှာဖွေတွေ့ရှိခဲ့ကြောင်း ၎င်းက ဆက်ပြောသည်။

“ ကျနော် အလုပ်ပြန်လာတော့ သူ့ယောင်္ကျားဖြစ်သူက ပြည်တွင်းပြန်သွားပြီဆိုပြီး တန်းသတင်းကြားရတာ။ ဘာလို့ကျနော်တောင်မှ မသိလိုက်ရသလဲပေါ့။ သူတို့အခန်းရဲ့ အနီးမှာလည်း ယင်တွေ တအောင်းအောင်းထပြီး လူသေ ညှီနံ့တွေရတော့ ဒီမှာပုံမှန်မဟုတ်တော့ဘူးလို့ သံသယ ဝင်လာကာမှ ကြည့်တော့ သူ့မိန်းမကော၊ ကလေးကော ပုတ်ပွပြီး သေနေတာတွေ့ရတယ်။ သူ့ကလေးကို တူနဲ့ရိုက်ထားတာလို့ ခေါင်းတောင် ချိုင့်သွားတယ်လို့ ပြောတယ်။ ပြီးတော့ ကလေး အလောင်းကိုစောင်နဲ့အုပ်ထားတာ “ ဟု ၎င်းက မြင်တွေ့ခဲ့တာတွေကို ပြန်ပြောပြသည်။

လက်ရှိ သေဆုံးသွားခဲ့သည့် မိခင်နှင့်ကလေးငယ်ကို ထိုင်းနိုင်ငံ လမ်းပွန်းဆေးရုံတွင် ပို့ဆောင်ထားပြီး စစ်ဆေးမှု ပြုလုပ်နေလျက်ရှိကြောင်း သိရသည်။

ထို့အပြင် အခင်းမှာ နန်းအုံဖြစ်သူက ဦးခေါင်းမှာ တုတ်ချောင်းနှင့် ရိုက်နက် ခံထားရသည်ဟု သိထားရသော်လည်း အလောင်းဟာ ပုတ်ပွနေပြီဖြစ်သောကြောင့် ရိုက်နက် ခံထားရသည့် ဒဏ်ရာကို သေချာစစ်ဆေးနေကြောင်း လည်းသိရသည်။

အဆိုပါ လူသတ် ပြစ်မှု ကျူးလွန်သူ စိုင်းထော်ကိုတော့ လက်ရှိမှာ ထိုင်းရဲတပ်ဖွဲ့များက လိုက်လံစုံစမ်းပြီး စစ်ဆေးမှုတွေ ပြုလုပ်နေကြောင်း၊ ၎င်းသည် ပြည်တွင်းကို ပြန်သွားပြီဟုလည်း သတင်းထွက်ပေါ်နေသဖြင့် ၎င်းကို တွေ့ရှိပါက ဖုန်းနံပါတ် 063-6120 163 ကို ဆက်သွယ် အကြောင်းကြားပေးရန် ၎င်းက တောင်းဆိုသည်။

“ ကျနော်ကတော့ သတိပေးချင်တာ ယောင်္ကျားယူတော့မယ် ဆိုရင်လည်း သူ့ဆွေမျိုး၊ အပေါင်းအသင်း၊ အလုပ်အကိုင်၊ အမှုအရာတွေကို များများ လေ့လာပြီးမှ သူ့စိတ်ရင်းနဲ့အမှန်တကယ်ကိုသိမှ ယူကြပါလို့။ တန်းပြီး တွေ့ပြီဆိုတာနဲ့ မယူပါနဲ့ “ ဟု ၎င်းက ထပ်လောင်းပြောသည်။

ပြီးခဲ့သည့် ဇန်နဝါရီ ၁၅ ရက်တွင်လည်း ထိုင်းနိုင်ငံ ဘန်ကောက်မြို့မှာ အသက် ၃၁ နှစ်အရွယ်ရှိ ခွန်သူရိန်စိုး ဆိုသူမှာလည်း နေအိမ်မှ ပျောက်ဆုံးသွားရာမှ ဓားဒဏ်ရာ၊ ဒဏ်ချက်ဖြင့် သေဆုံးနေသည့် အလောင်းကို ပြန်လည်ရှာတွေ့ခဲ့သည့် ဖြစ်စဥ်ရှိဖူးသည်။