သျှမ်းပြည် ကျောက်မဲခရိုင် နောင်ချိုမြို့နယ်အတွင်း အာဏာသိမ်း စစ်ကောင်စီ နှင့် ပြည်သူ့ကာကွယ်ရေး ပူးပေါင်း တပ်ဖွဲ့ PDF ကြား ထိတွေ့တိုက်ပွဲ ဖြစ်ပွားမှုကြောင့် ဒေသခံတို့၏ နေအိမ် ၉ လုံးထက် မနည်း ထိခိုက် ပျက်စီးရ ကြောင်း စုံစမ်းသိရသည်။
ပြီးခဲ့သည့် ဧပြီလ ၅ ရက်နေ့မှ ၉ ရက်နေ့ အထိ အာဏာသိမ်း စစ်ကောင်စီ နှင့် ပြည်သူ့ကာကွယ်ရေး ပူးပေါင်း တပ်ဖွဲ့ တို့ ထိတွေ့တိုက်ပွဲအကြား စစ်ကောင်စီ ဘက်မှ လက်နက်ကြီးများဖြင့် ပစ်ခတ်မှုကြောင့် ပြည်သူအိမ် ၉ လုံး ထက်မနည်း ထိခိုက်ပျက်စီးရကြောင်း သိရသည်။
“ကုန်းကြီးကျေးရွာ အုပ်စုထဲမှာဆိုရင် ပျက်စီးတဲ့အိမ်က ၈/၉ အိမ်လောက်ရှိနေပြီ၊ တိုက်ပွဲ ၄ ရက်ဆက်တိုက် ဖြစ်တာ ရွာထဲကို လက်နက်ကြီးတွေက နေ့တိုင်းကျတယ်၊ ပျက်စီးတဲ့ အရေအတွက် တိတိကျကျကိုတော့ မသိ ရသေးဘူး၊ ရွာခံ အိမ်ရှင်တွေတော့ စစ်ရှောင်ထွက်ပြေးနေကြတယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ တိုက်ပွဲဖြစ်ပွားမှုကြောင့် နောင်ချိုမြို့နယ်မှ ကုန်းကြီးကျေးရွာအုပ်စု ဟိုခဲရွာ၊ ကြူကော်ရွာ၊ နမ့်ကောင်း ရွာ၊ ဟိုခိုရွာ၊ ကြူအင်း စသည့် ကျေးရွာများမှ ရွာခံများသည် အိုးအိမ် စွန့်ခွာထွက်ပြေးကာ စစ်ရှောင် ထွက်ပြေး နေရသည်။
လက်ရှိတွင် ကျေးရွာအတွင်းတွင် ထိခိုက်ပျက်စီးမှုများကို အသိစိတ်မသိနိုင်သေးသည့်အကြောင်း နှင့် ရွာအတွင်း ပေါက်ကွဲမည့် လက်နက်များ ရှိမည်ကိုလည်း စိုးရိမ်ရကြောင်း ဒေသခံများက သျှမ်းသံတော်ဆင့်ကို ဆက်ပြော သည်။
“တချို့ရွာတွေထဲမှာလည်း စစ်ကောင်စီတပ်တွေ ရှိနေတာ တွေ့ရတယ်၊ တချို့ရွာတွေကလည်း စစ်သားတွေ မရှိပေမဲ့ ပေါက်ကွဲစေတဲ့ ပစ္စည်း လက်နက်တွေ ရှိမှာစိုးလို့ ရွာတွေထဲ မဝင်ရဲဘူး၊ အဲ့ကြောင့် ရွာထဲက ထိခိုက် ပျက်စီးမှုတွေ ဘယ်လိုရှိလဲဆိုတာတော့ အသေးစိတ် မသိရဘူး၊ ဒီနေ့အထိ တိုက်ပွဲက ဖြစ်နေတုန်းပဲ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ နှင့် ပြည်သူ့ကာကွယ်ရေး ပူပေါင်းတပ်ဖွဲ့ တို့အကြား ထိတွေ့တိုက်ပွဲသည် ယနေ့ အထိ ဖြစ်ပွားနေလျက်ရှိပြီး ယနေ့ တိုက်ပွဲ ဖြစ်စဥ်နှင့် ပတ်သက်ပြီး အသေးစိတ်ကို ဆက်လက်ဖော်ပြသွားမည် ဖြစ်သည်။
လက်ရှိတွင် နောင်ချိုမြို့နယ် ချိုခမ်းဘုန်းကြီးကျောင်းတွင် စစ်ရှောင် ၃၀၀ နီးပါး ရှိနေသည့်အပြင် နောင်ချိုမြို့ ပေါ်နှင့် ပြင်ဦးလွင်မြို့ပေါ်သို့ စစ်ရှောင်ထွက်ပြေးသူများလည်း ၅၀၀ နီးပါးရှိနေကာ ထိုထဲတွင် ကလေးသူငယ်များ၊ သက်ကြီးရွယ်အိုများလည်း ပါဝင်နေပြီး လက်ရှိတွင် စားနပ်ရိက္ခာများ၊ အသုံးအဆောင်ပစ္စည်းများ ကူညီထောက်ပံ့ ပေးမည့် အလှူရှင်များ လိုအပ်နေကြောင်းလည်း သိရသည်။
ယခုဖြစ်ပွားနေသည့် နောင်ချိုမြို့နယ်အတွင်း အာဏာသိမ်း စစ်ကောင်စီတပ်ဖွဲ့ နှင့် ပြည်သူ့ကာကွယ်ရေး ပူးပေါင်း တပ်ဖွဲ့တို့ အကြား ထိတွေ့တိုက်ပွဲကြောင့် ကလေးငယ် နှစ်ဦး သေဆုံးရသည့်အပြင် အရပ်သားများလည်း ထိခိုက် ဒဏ်ရာရမှု ရှိနေသည်။
ပြီးခဲ့သည့် ဧပြီလ ၃ ရက် နံနက်ပိုင်းတွင်လည်း နောင်ချိုမြို့နယ် ကုန်းညောင်ကျေးရွာမှ ကြံစိုက်ခင်း သွားသည့် ဒေသခံ အမျိုးသား တစ်ဦးသည် မြေမြှုပ်မိုင်း နင်းမိခဲ့မှု ရှိခဲ့သည်။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်မှ စပြီး ဒီဇင်ဘာ (၃၁) ရက်ထိ တစ်နှစ်ကြာ အပစ်ရပ် ကြေညာထားသော်လည်း စစ်ကောင်စီတပ်၏ တိုင်းရင်းသား ဒေသများထံ တိုက်လေယာဥ်ဖြင့် ထိုးစစ်ဆင်မှု နှင့် စစ်မြေပြင် ထိတွေ့တိုက်ပွဲများ ဆက်လက် ဖြစ်ပွားနေဆဲ ဖြစ်သည်။
Leave a Comments