သျှမ်းပြည် လားရှိုးခရိုင် လားရှိုးမြို့နယ် နားမခေါ်ကျေးရွာကို စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကြဲတိုက်ခိုက်မှုကြောင့် ပြည်သူ ၃ ဦးထိခိုက်ဒဏ်ရာရရှိခဲ့ကြောင်း စုံစမ်းသိရှိရသည်။
ယနေ့ (ဧပြီလ ၇ ရက်) နံနက် ၈ နာရီအချိန်ခန့်တွင် လားရှိုးမြို့နယ် နားမခေါ်ကျေးရွာကို စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကြဲတိုက်မှုကြောင့် အသက် ၁ နှစ်ခွဲ ကလေးငယ်အပါအဝင် မိသားစုဝင် ၃ ဦး ထိခိုက်ဒဏ်ရာ ရရှိခဲ့ကြောင်း လားရှိုးမြို့ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ မနက်က ကျမ စာသင်နေတုန်း ရဟတ်ယာဉ်ဖြတ်ပျံသွားတာ။ နားမခေါ်ရွာဘက်မှာ တိုက်ပွဲဖြစ်နေတာ။ စစ်ကောင်စီက တိုက်လေယာဉ်နဲ့ ဗုံးကြဲတိုက်ခိုက်လို့ ပြည်သူ ၃ ဦးလည်း ထိခိုက်ဒဏ်ရာရတယ်” ဟု ၎င်းအမျိုးသမီးတစ်ဦးက ပြောသည်။
အဆိုပါ ထိခိုက်ဒဏ်ရာရသူ ပြည်သူ ၃ ဦးကို လက်ရှိမှာ လားရှိုးပြည်သူ့ဆေးရုံတွင် ပို့ဆောင်ထားပြီး ဆေးဝါးကုသခံယူနေကြောင်းလည်း သိရသည်။
ထို့အပြင် လားရှိုးမြို့နယ် နားမခေါ်ကျေးရွာအနီးတဝိုက်တွင် တအာင်း (ပလောင်) အမျိုးသားလွတ်မြောက်ရေး တပ်ဖွဲ့ မှလှုပ်ရှားနေသည်ဟု စစ်ကောင်စီတပ်ဖွဲ့မှ သတင်းရရှိမှုကြောင့် ယခုလို တိုက်လေယာဉ်ဖြင့် ဗုံးကြဲတိုက်ခိုက်ခဲ့ကြောင်း သိရသည်။
ယင်းကဲ့သို့ စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံကြဲတိုက်ခိုက်မှုကြောင့် လားရှိုးမြို့နယ် ကျေးလက်ဒေသတွင် အချိန်မရွေးတိုက်ပွဲဖြစ်နိုင်ကြောင်း လားရှိုးမြို့ဒေသခံ အမျိုးသမီးတစ်ဦးက ထပ်လောင်း ပြောသည်။
“ မြို့တွင်းမှာတော့ အေးအေးဆေးဆေးပါပဲ။ မြို့ပြင်ဘက်ထွက်ရင်တော့ အချိန်မရွေးတိုက်ပွဲဖြစ်နိုင်တယ်။ တခါတလေ မူဆယ်ဘက်သွားရင် လမ်းမှာခြေလျင်စစ်ကြောင်းတွေ တွေ့ရတယ်။ သူတို့ဘက်က သတင်းရရင် ဆိုင်ကယ် အဖုံးဖွင့်စစ်တဲ့အထိတော့လုပ်တယ်။ ကျမကတော့ မြန်မြန်ဖြစ်၊ မြန်မြန်နိုင်လေ အေးလေပဲလို့ မြင်တယ်။ ဒါပေမယ့် ပြည်သူတွေ အထိအခိုက်အပျက်အစီးတွေများရင်တော့ စိတ်မကောင်းဖြစ်မိတယ် “ ဟု ၎င်း အမျိုးသမီးတစ်ဦးက ထပ်လောင်းပြောသည်။
လားရှိုးမြို့နယ်အတွင်း စစ်ကောင်စီ၏ အရှေ့မြောက်ပိုင်းစစ်ဌာနချုပ် အခြေစိုက်သည့်နေရာဖြစ်သည့်အပြင် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၊ တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၊ မြန်မာ အမျိုးသားဒီမိုကရက်တစ် မဟာမိတ်တပ်မတော် (MNDAA) တို့ လှုပ်ရှားသည့်နယ်မြေဖြစ်သည်။
