လာမည့် သင်္ကြန်ကာလအတွင်း စစ်ကောင်စီက ဦးဆောင်ကျင်းပပေးမည့် သင်္ကြန် မဏ္ဍပ်တွင် အသွားလာ သတိထားရန်အတွက် ပြည်သူ့ကာကွယ်ရေးတပ်ဖွဲ့ PDF က တိုက်တွန်းလိုက်ကြောင်း စုံစမ်းသိရသည်။
ယခုနှစ်အတွင်း သျှမ်းပြည်တစ်ဝှမ်းတွင် သင်္ကြန်ပွဲကျင်းပရန်အတွက် စစ်ကောင်စီက ဦးဆောင်ပြီး ရေကစားမဏ္ဍပ်များကို အကြီးအကျယ် ပြုလုပ် ပေးနေလျက်ရှိကြောင်း သိရသည်။
အလားတူ သျှမ်းပြည် တောင်ကြီးမြို့တွင် သင်္ကြန် ရေကစား မဏ္ဍပ် အတွက် (၇) နေရာတွင် ဖွင့်လှစ်ပေးသွားမည် ဖြစ်ကြောင်း သိရသည်။
“ တောင်ကြီးမှာတော့ အခုက မဏ္ဍပ်တွေ စလုပ်နေပြီ ။ စစ်ကောင်စီက လုပ်ပေးတဲ့ဟာကတော့ ၇ ခုလောက်တော့ရှိတယ်။ သူတို့က အကြီးကြီး လုပ်ပေးတယ်။ မြို့မဈေးနား နဲ့ လွှတ်တော်ရုံးတွေဘက်မှာလည်း လုပ်ပေးနေတယ်” ဟု တောင်ကြီးမြို့ ဒေသခံ အမျိုးသမီးတစ်ဦးက ပြောသည်။
ထိုအပြင် သျှမ်းပြည်တစ်ဝှမ်း မြို့ကြီးများဖြစ်သည့် လားရှိုးမြို့ ၊ မူဆယ်မြို့ ၊ တောင်ကြီးမြို့ စသည့် မြို့ကြီးများထဲတွင် စစ်ကောင်စီက သင်္ကြန်ပွဲအတွက် အကြီးအကျယ် ကျင်းပပေးသွားမည် ဖြစ်ကြောင်းသိရသည်။
အလားတူ ယခုနှစ် အတွင်းတွင် ဒုတိယအကြိမ်အဖြစ် အင်းလေးရေပေါ်သင်္ကြန်ကိုလည်း ကျင်းပသွားမည်ဖြစ်ကြောင်း သိရသည်။
အဆိုပါ သင်္ကြန်အတွင်းတွင် သွားလာရန်အတွက် အထူးသတိပြု သွားလည်ကြပါရန်အတွက် သျှမ်းတောင် ဖယ်ခုံမြို့နယ်အတွင်း လှုပ်ရှားနေသည့် ပြည်သူ့ကာကွယ်ရေးတပ်ဖွဲ့ PDF က ပြောသည်။
“တပ်တွင်း မိသားစု မဟုတ်တဲ့ မိဘပြည်သူတွေ အနေနဲ့တော့ အဲ့လိုနေရာတွေကို သွားရင် အထူးသတိထားစေချင်တယ်။ ဘာလို့လဲဆိုတော့ သူတို့ အဖွဲ့ထဲကပဲ မိုင်းထောင်ထားပြီးတော့ PDF တွေလုပ်မယ်ဆိုပြီး သူတို့ သတင်းတွေမှာ လွင့်နေမယ်။ ကျနော်တို့အနေနဲ့လည်း သွားလာတာ သတိထားဖို့ပဲ မှာချင်တယ်” ဟု ဖယ်ခုံမြို့ ပြည်သူ့ကာကွယ်ရေးတပ်ဖွဲ့ PDF တပ်ခွဲ ၂ ကပြောသည်။
ပြီးခဲ့သည့် ၂၀၂၂ ခုနှစ်တွင်လည်း စစ်ကောင်စီက သင်္ကြန်ပွဲအတွက် မဏ္ဍပ်များကို ဦးဆောင်ပြီး ပြုလုပ်ပေးခဲ့သော်လည်း သွားရောက်လည်ပတ်သူ မရှိကြောင်း သိရသည်။
