ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) ကျားခေါင်း ပါတီသည် နိုင်ငံရေးမှတ်ပုံတင် မတင်သည့် အတွက် ပါတီဖျက်သိမ်းကြောင်း စစ်ကောင်စီမှ ထုတ်ပြန်လာသော်လည်း စစ်ရှောင်များကို ကူညီထောက်ပံ့မှုပေးနေကြောင်း သိရသည်။

ယမန်နေ့ (ဧပြီ ၆) ရက်တွင် သျှမ်းပြည် တောင်ကြီးခရိုင် ဟိုပုံးမြို့နယ် ညောင်ထောက်ကျေးရွာရှိ စစ်ရှောင်စခန်းမှ အိမ်ထောင်စု ၁၉၆ ခုထံသို့ SNLD ကိုယ်စား စိုင်းစွမ်ဝမ်းမှ ဆန်များသွားရောက် ကူညီပေးခဲ့ကြောင်း ပါတီမှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ညောင်ထောက်စစ်ရှောင်စခန်းက ဆိုရင် ကျောက်မဲဘက်က ပြည်သူတွေ စစ်ရှောင်ပြီး နေထိုင်ကြတာပေါ့နော်၊ အိမ်ထောင်စု ၁၉၆ ခု၊ လူဦးရေ ၅၃၆ ဦးရှိတယ်၊ အခုတော့ ဆန်အိတ် သွားကူညီပေးခဲ့တာပေါ့နော်၊ ဆန် ၆ အိတ်ပါ၊ စုစုပေါင်း တန်ဖိုးငွေက ၄၅၀,၀၀၀ (လေးသိန်းခွဲ) ပေါ့နော်” ဟု SNLD ပါတီမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ထို့အပြင် ပြီးခဲ့သည့် ဧပြီလ ၂ ရက်နေ့မှ ၄ ရက်နေ့အထိမှာလည်း SNLD ကျားခေါင်းပါတီမှ တစ်ဆင့် သျှမ်း – ကယား (ကရင်နီပြည်) နယ်စပ်တစ်လျှောက်ရှိ စစ်ဘေးရှောင်များကို အသုံးအဆောင် ပစ္စည်း နှင့် စားနပ်ရိက္ခာများ သွားရောက် ကူညီပေး ခဲ့ကြောင်းလည်း ပင်လောင်းမြို့မှ SNLD ပါတီ၏ မြို့နယ်ဥက္ကဌ စိုင်းသန်းထွန်း ထံမှ သိရသည်။

“ဗဟိုကနေ ကူညီထောက်ပံ့လာတဲ့ အကူအညီတွေနဲ့ ကျနော်တို့က စစ်ရှောင်တွေကို သွားရောက်ကူညီပေးခဲ့တာပါ၊ အဝတ် အထည်တွေ၊ ရိက္ခာခြောက်တွေ၊ ပြီးတော့ တခြား အသုံးအဆောင်ပစ္စည်းတွေကို သွားကူညီပေးဖြစ်ပါတယ်၊ ကရင်နီဘက်က စစ်ရှောင်တွေ အတွက် ၁၅ သိန်း၊ ပင်လောင်းမြို့မှာ ရှိတဲ့ စစ်ရှောင်တွေအတွက် ၁၅ သိန်း နဲ့ ခရစ်ယာန် ကျောင်းမှာ ရှိနေတဲ့ စစ်ရှောင်တွေအတွက် ၃၀၅,၀၀၀ ကျပ် (သုံးသိန်း ငါးထောင်ကျပ်) ကူညီပေးခဲ့ပါတယ်” ဟု စိုင်းသန်းထွန်းက သျှမ်းသံတော်ဆင့်ကို ပြောသည်။

လက်ရှိတွင် ပင်လောင်းမြို့နယ်အတွင်း စစ်ဘေးရှောင်များသည် စုစုပေါင်း တစ်သောင်း ထက်မနည်းရှိနေပြီး ဖယ်ခုံ၊ မိုးဗြဲ ၊ ဒီးမော့ဆို နှင့် လွိုင်ကော် တို့ဘက်မှ ဒေသခံများ စစ်ရှောင် ရောက်လာကြခြင်း ဖြစ်ကြောင်း သိရသည်။

အာဏာသိမ်း စစ်ကောင်စီတပ်ဖွဲ့မှ နိုင်ငံတော် အာဏာသိမ်းယူပြီးချိန်မှ စတင်ပြီး ယနေ့အထိ သျှမ်း – ကယား နယ်စပ်နှင့် ကရင်နီပြည် အတွင်းမှ ပြည်သူ့ကာကွယ်ရေး ပူးပေါင်း တပ်ဖွဲ့များကို ပြင်းထန်စွာ ထိုးစစ် တိုက်ခိုက်နေသည့်အတွက် ဒေသအတွင်းက ပြည်သူများ နေအိမ်စွန့်ခွာ စစ်ရှောင်ထွက်ပြေးနေရခြင်း ဖြစ်ကြောင်း သိရသည်။

ပြီးခဲ့သည့် မတ်လ ၁၁ ရက်နေ့တွင်လည်း စစ်ကောင်စီတပ်မှ နမ့်နိန်းရွာ (ဝၢၼ်ႈၼမ့်ၼဵင်ႈ) မှ ဘုန်းကြီးကျောင်း ဝန်းထဲ ဝင်ရောက်နေရာယူပြီး သံဃာတော် (၃) ပါး အပါအဝင် အရပ်သား ၁၉ ဦးကို စစ်ကောင်စီမှ ပစ်သတ်မှု ရှိခဲ့သည်။

ကျားခေါင်းပါတီ SNLD ပါတီသည် စစ်ကောင်စီ လက်အောက်ခံ ရွေးကောက်ပွဲ ကော်မရှင်ထံကို နိုင်ငံရေးပါတီ မှတ်ပုံတင်ခြင်း မပြုလုပ်သည့်အတွက် နိုင်ငံရေးပါတီ အဖြစ်မှ ဖျက်သိမ်းခံလိုက်ရကြောင်း မတ်လ ၂၈ ရက်နေ့ တွင် စစ်ကောင်စီ တပ်ဖွဲ့က ထုတ်ပြန်ကြေညာ ခဲ့သည်။

ပြီးခဲ့သည့် ၂၀၂၁ – ၂၀၂၂ ခုနှစ်အတွင်း သျှမ်းတပ် နှစ်တပ် တိုက်ပွဲဖြစ်ပွားမှုကြောင့် သျှမ်းပြည် မြောက်ပိုင်းမှ တောင်ပိုင်း အထိ စစ်ရှောင်ပြည်သူများအတွက် ကျပ်သိန်း ထောင်နဲ့ချီ စုပေါင်း ကူညီထောက်ပံ့ပေးမှုလည်း ပြုလုပ်ခဲ့သည်။