သျှမ်းပြည် လင်းခေးခရိုင် မောက်မယ်မြို့နယ်အတွင်း ဖြစ်ပွားခဲ့သည့် သျှမ်းပြည်ပြန်လည် ထူထောင်ရေး ကောင်စီ၊ သျှမ်းပြည် တပ်မတော် (RCSS/SSA) နှင့် ပအိုဝ်းအမျိုးသား လွတ်မြောက်ရေး တပ်မတော် (PNLO/ PNLA) ထိတွေ့တိုက်ပွဲအကြား ထိခိုက်သေဆုံးမှုများ ရှိနေကြောင်း စုံစမ်းသိရသည်။
ပြီးခဲ့သည့် ဧပြီလ (၃) ရက်နေ့တွင် မောက်မယ်မြို့နယ်၊ ကဒူးကြီးဒေသ၊ နားဟီးကျေးရွာအုပ်စုမှ နမ့်ပါတက် ကျေးရွာ အနီးတွင် RCSS/SSA နှင့် PNLO/PNLA က ထိတွေ့တိုက်ပွဲ ဖြစ်ပွားခဲ့ခြင်းဖြစ်ပြီး နှစ်ဖက်တပ်ဖွဲ့မှ ထိခိုက် သေဆုံးမှုများ ရှိနေကြောင်း သိရသည်။
ယင်းကဲ့သို့ ထိတွေ့တိုက်ပွဲဖြစ်စဥ် နှင့် ပတ်သက်ပြီး RCSS/SSA ၏ ပြောရေးဆိုခွင့်ကို ဆက်သွယ် မေးမြန်းရာ PNLO/PNLA တပ်ဖွဲ့က စတင်တိုက်ခိုက်ခဲ့ခြင်းဖြစ်ကြောင်း ဗိုလ်မှူးခမ်းစံက သျှမ်းသံတော်ဆင့်ကို ပြောသည်။
“ကျနော်တို့ တပ်ဖွဲ့ရဲ့ စစ်ကြောင်းတစ်ခုက နမ့်ပါတက် ကျေးရွာ အနီးနားမှာ စခန်းချ နားနေတာပေါ့နော်၊ အဲ့ဒီမှာ PNLO တပ်ဖွဲ့က လာပစ်ခတ်တယ်၊ ပြီးတော့ ပြန်ဆုတ်သွားတယ်၊ သူတို့ ပြန်ဆုတ်သွားတဲ့ အချိန်မှာ ကျနော်တို့ တပ်ဖွဲ့က သူတို့ (PNLO) စစ်အသုံးအဆောင် တချို့ သိမ်းမိတာရှိတယ်၊ ပြီးတော့ သူတို့လူ ထိခိုက်ဒဏ်ရာရလို့ ဆွဲခေါ်သွားတဲ့ အနေအထားတွေ တွေ့ရတယ်” ဟု ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။
အဆိုပါ ထိတွေ့ပစ်ခတ်မှုသည် နံနက် ၁၁ နာရီမှ မွန်းလွဲပိုင်း အထိ ဖြစ်ပွားခဲ့ပြီး နှစ်ဖက် ထိတွေ့ ကျဆုံးမှုများ ရှိနေကြောင်း ဒေသအတွင်း သတင်းရင်းမြစ်များက ပြောသော်လည်း RCSS/SSA ဘက်မှ ထိခိုက်ကျဆုံးမှု မရှိကြောင်း ဗိုလ်မှူးခမ်းစံက ဆက်ပြောသည်။
“ကျနော်တို့ RCSS/SSA ဘက်ကတော့ မရှိဘူး၊ အခု ကျနော် ပြောနိုင်တာက သူတို့ (PNLO) လူကို ခေါ်သွားတဲ့ လမ်းကြောင်း အထောက်အထားတွေ့ရတယ်၊ သူတို့ဘက်က ထိခိုက်ကျဆုံးမှု ရှိတယ်ပေါ့” ဟု ဗိုလ်မှူးခမ်းစံက သျှမ်းသံတော်ဆင့် ကိုပြောသည်။
The People’s Voice သတင်းရေးသားချက်အရ RCSS/SSA ဘက်မှ ၈ ဦးထက် မနည်း ကျဆုံးပြီး၊ PNLO/PNLA က (၃) ဦး ထိခိုက်ဒဏ်ရာရကြောင်း ထုတ်ပြန်ထားသည်။
ထို့အပြင် တိုက်ပွဲအတွင်း၌ PNLO/PNLA ဘက်မှ လက်နက်ကြီးများ ဖြစ်ကြသည့် ၆၀ မမ မော်တာ၊ RPG နှင့် စက်သေနတ်တွေကို အသုံးပြု ပစ်ခတ်တိုက်ခိုက်ခြင်း ဖြစ်ကြောင်း ဗိုလ်မှူးခမ်းစံက ဆက်ပြောသည်။
“ကျနော်တို့ RCSS တပ်သားတွေ နားနေတဲ့ နေရာကို သူတို့သိတယ်လေ၊ ဒါကြောင့်မို့ သူတို့ဘက်က တမင် ရည်ရွယ်ချက် ရှိရှိလာပစ်တယ်လို့ ကျနော်တို့ ယူဆတယ်၊ ဘာဖြစ်လို့လဲဆိုရင် ၁၆၀ မမတို့လို လက်နက်ကြီးတွေက တိုက်ပွဲကြီးမဟုတ်ရင် သုံးလေ့ မရှိဘူးလေ” ဟု ဗိုလ်မှူးခမ်းစံက ပြောသည်။
RCSS/SSA နှင့် PNLO တပ်ဖွဲ့ နှစ်ဖွဲ့သည် NCA လက်မှတ် ရေးထိုးထားသည့် PPST အဖွဲ့ဝင် လက်နက်ကိုင် တပ်ဖွဲ့အနေဖြင့် ထိတွေ့တိုက်ပွဲ ဖြစ်ပွားသော်လည်း နိုင်ငံရေးလမ်းကြောင်းမှ ငြိမ်းချမ်းရေးများ ထိခိုက်မှု မရှိနိုင်ကြောင်းလည်း ဗိုလ်မှူးခမ်းစံက ဆက်ပြောသည်။
RCSS/SSA နှင့် PNLA/PNLO တပ်ဖွဲ့ (၂) ဖွဲ့သည် စစ်ကောင်စီ နှင့် ငြိမ်းချမ်းရေးဆွေးနွေးမှု ဆက်လက် ပြုလုပ်နေသေးသည့် အဖွဲ့များဖြစ်ကြသည့် တပ်ဖွဲ့များ ဖြစ်ကြသည်။
မောက်မယ်မြို့နယ် ကဒူးကြီးဒေသ အတွင်း RCSS နှင့် PNLO တို့သည် လွန်ခဲ့သည့် ၂၀၂၂ ခုနှစ်တွင်လည်း တိုက်ပွဲ ဖြစ်ပွားခဲ့သေးသည်။
RCSS/SSA နှင့် PNLO / PNLA တပ်ဖွဲ့နှစ်ခုသည် သျှမ်းပြည်တွင်း နှစ်ပေါင်းများစွာ အတူတကွ နေထိုင်လာကြသည့် တိုင်းရင်းသားများ အချင်းချင်း ဖြစ်သောကြောင့် RCSS/SSA အနေဖြင့် ထိတွေ့ပစ်ခတ်မှုကို အတတ်နိုင်ဆုံး ရှောင်ရှားပြီး တွေ့ဆုံဆွေးနွေးမှုဖြင့် ပြဿနာဖြေရှင်းနိုင်ရေးကို ဆက်လက်ကြိုးပမ်း ဆောင်ရွက်သွားမည် ဟုလည်း RCSS/SSA ၏ သတင်းစာမျက်နှာ ဖြစ်သည့် Tai Freedom မှ ထုတ်ပြန်ထားသည်။
