Sunday, May 26, 2024

စစ်ကောင်စီ မူဝါဒ အသစ်ကြောင့် ဆန်ကုန်သည်များ အလုပ်မှ ရပ်ဆိုင်းရ

Must read

စစ်အာဏာသိမ်းပြီးနောက် စစ်ကောင်စီဘက်မှ မြန်မာ – တရုတ် နယ်စပ်ကုန်သွယ်ရေးစခန်းမှ တစ်ဆင့် တရုတ်နိုင်ငံသို့ ဆန်နှင့်ဆန်ထွက်ပစ္စည်း တင်သွင်းမှု မူဝါဒအသစ်ကြောင့် ဆန်ကုန်သည်များ အလုပ်မှ ရပ်ဆိုင်းလိုက်ရကြောင်း စုံစမ်းသိရသည်။

ပုံ – စားသုံးသူရေးရာ ဦးစီးဌာန

ပြီးခဲ့သည့် (ဖေဖော်ဝါရီ ၂၃ ရက်) က စစ်ကောင်စီ လက်အောက်ခံ စီးပွားရေး နှင့် ကူးသန်းရောင်းဝယ်ရေး၊ နယ်စပ်ကုန်သွယ်ရေး ဦးစီးဌာနမှ လာမည့် (မတ်လ ၁ရက်) မှစ၍ နယ်စပ်တစ်လျှောက် ဆန် နှင့် ဆန်ထွက်ပစ္စည်းများ တင်ပို့မှုမှ ရရှိလာသည့် ပို့ကုန်ရငွေများ၏ ၆၅ ရာခိုင်နှုန်းကို စစ်ကောင်စီမှ သတ်မှတ်ထားသည့် နိုင်ငံခြားငွေ လဲလှယ်နှုန်းအတိုင်း လဲလှယ်ရမည်ဖြစ်ကြောင်း ထုတ်ပြန်ခဲ့သည်။

အဆိုပါ စစ်ကောင်စီမှ ထုတ်ပြန်ခဲ့ပြီးနောက်ပိုင်း မူဆယ်မြို့နယ်အတွင်းရှိ ဆန်ကုန်သည်များအား စစ်ကောင်စီမှ သတ်မှတ်သည့် ငွေလဲလှယ်နှုန်းကြားတွင် အရှုံးပေါ်ခဲ့သည့်အပြင် အလုပ်မှ ရပ်ဆိုင်းသွားခဲ့ရကြောင်း မူဆယ်မြို့ဒေသခံ ဆန်ကုန်သည်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

တရုတ်နယ်စပ်ဂိတ်သို့ တင်ပို့မည့် ကုန်များ

“ ကျမတို့ ပစ္စည်းရောင်းပြီး ရောင်းလို့ ရလာတဲ့ငွေ ၆၅ ရာခိုင်နှုန်းကို စစ်ကောင်စီ အစိုးရမှာ ပြန်ပြီးရောင်းပေးရတယ်။ ကျမတို့ဆီမှာ ကျပ် ၁ သိန်းဝင်ရင်၊ (၆၅,၀၀၀) ကျပ်ကို စစ်ကောင်စီ အစိုးရထံ ရောင်းပေးရတယ်။ ကျန်တဲ့ (၃၅,၀၀၀) ကို အပြင်မှာရောင်းရမှာပေါ့။ အပြင်မှာ ရောင်းရင်တော့ ဈေးနှုန်းပိုရတယ်။ သူတို့ကို ရောင်းပေးရင်တော့ ဈေးပေါတယ်။ သူတို့ သတ်မှတ်ထားတာ တရုတ်ငွေ ၁ ယွမ်ကို (၃၀၀) ရတယ်။ အပြင်မှာ ၁ ယွမ်ကို (၄၀၀) ကျော်ရတယ် “ ဟု ၎င်း အမျိုးသမီးတစ်ဦးက ပြောသည်။

အဆိုပါ စစ်ကောင်စီမှ သတ်မှတ်ထားသော ငွေလဲလှယ်နှုန်းကြားတွင် ဆန်ရောင်းဝယ်ရေး ကုန်သည် ၂၀ ကျော်သည် အရှုံးပေါ်ခဲ့ရပြီး အလုပ်မှ ရပ်ဆိုင်းသွားခဲ့ရကြောင်း သိရသည်။

ထို့အပြင် စစ်ကောင်စီ အစိုးရထံ ရောင်းပေးရသည့် ၆၅ ရာခိုင်နှုန်းသည် အလွန်များပြားနေသဖြင့် ရောင်း၍ရသည့်ငွေ ပမာဏသည် တွက်ချေမကိုက်ကြောင်း ၎င်း အမျိုးသမီးတစ်ဦးက ထပ်လောင်းပြောသည်။

၁၀၅ မိုင် ကုန်သွယ်ရေးစခန်း

“ စစ်ကောင်စီ အစိုးရထံ ရောင်းပေးရတာ အရမ်းများလွန်းတယ်။ ကိုယ့်မှာ အမြတ်က ဘယ်လောက်မှ ပြန်မရဘူး။ ဒီအလုပ်ကိုဆက်လုပ်မယ်ဆိုလည်း မတတ်နိုင်တော့ဘူး။ ကျွန်မတို့ မူဆယ်ဖက်မှာတော့ ဆန်အရောင်းအဝယ်လုပ်ဖို့ တော်တော်များ ရပ်ဆိုင်းသွားကြပြီ။ ပုံမှန်လုပ်နေတဲ့ ကုန်သည် ၂၀ ခုလောက်တောင် အခု ရပ်ဆိုင်းသွားကုန်ပြီ “ ဟု ၎င်းက ပြောသည်။

အလားတူ ဆန်နှင့် ဆန်ကွဲ တင်ပို့ခွင့် လိုင်စင်ကိုလည်း စီးပွားရေး နှင့် ကူးသန်းရောင်းဝယ်ရေး၊ နယ်စပ်ကုန်သွယ်ရေး ဦးစီးဌာနမှ ယခုရက်ပိုင်းမှာ ရပ်ဆိုင်းထားကြောင်း သိရသည်။

စစ်တပ်က အာဏာသိမ်းပြီး ၂ နှစ်ကျော် ကာလအတွင်း သျှမ်းပြည် ဆန်၊ စပါး ထွက်သည့် ဒေသ၌ ရေးကြီးရေလျှံ ဖြစ်ပွားခြင်း၊ တိုက်ပွဲဖြစ်ပွားခြင်း စသည့် စစ်ရေးပဋိပက္ခဖြစ်ပွားမှုကြောင့် ယခုနှစ် စပါးထွက်နှုန်းမှာ လျော့ကျသွားပြီး ဆန်ဈေးမှာ ဈေးနှုန်းမြင့်တက်သွားကြောင်း သိရသည်။

လက်ရှိ လက်ကျန်စပါး တင်းတစ်ရာကို ကျပ် (၁,၅၈၀,၀၀၀) မှာရှိနေပြီး ယခုအသစ်ပေါ်နေသည့် နွေစပါးတင်းတစ်ရာကိုတော့ ၁၄ သိန်းဝန်းကျင်မှာ ရှိနေကြောင်း သိရသည်။

Leave a Comments

- Advertisement -spot_img

Latest article