သျှမ်းပြည် မူဆယ်ခရိုင် မူဆယ်မြို့မ အမှတ် (၁) ဈေးထဲရှိ ရွှေဆိုင်တစ်ခုထဲတွင် အမျိုးသားတစ်ဦးသည် ရွှေဝယ်ဟန်ဆောင်ပြီး ရွှေဆွဲကြိုး (၃) ကုံး ကို လုယူသွားခဲ့ကြောင်း သတင်းရရှိသည်။

ယမန်နေ့ ဧပြီ ၃၀ ရက် မွန်းလွဲ ၃ နာရီဝန်းကျင်တွင် အသက် ၃၀ အရွယ်ရှိ အမျိုးသားတစ်ဦးသည် ရွှေဝယ်ဟန်ဆောင်ပြီး ရွှေဆွဲကြိုးကို လုယက်ခိုးယူသွားခဲ့ကြောင်း သိရသည်။

သို့သော် ထိုလုယက်သွားသည့် အမျိုးသားကို ဆိုင်ရှင် နှင့် ပြည်သူတို့က ဝိုင်းဝန်းပြီး ဖမ်းဆီး သွားနိုင်ခဲ့သည်။

“ ဟုတ်တယ်။ အမျိုးသားတစ်ယောက် ဆိုင်ကိုလာပြီးတော့ ရွှေဆွဲကြိုးဝယ်မယ့်ဟန် နဲ့လာတောင်းကြည့်တာ။ ကြည့်နေတုန်းပဲ ရွှေဆွဲကြိုးတွေကို လုယူပြီး ထွက်ပြေးသွားတာ။ ၃ စင်းလောက်တော့ ရသွားတယ်။ ရွှေဆွဲကြိုး တစ်စင်းကို တန်ဖိုး ကျပ်ငွေသိန်း ၃၀ လောက်ရှိတယ်။ ကံကောင်းလို့ ရွှေဆိုင်ရှင် နဲ့ ဈေးထဲကသူတွေ ဝိုင်းဖမ်းလိုက်တော့ အဲ့သူခိုးကို မိသွားတယ်” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။

အဆိုပါ အမျိုးသားကို ဆိုင်ရှင်များက မေးမြန်းရာတွင် ၎င်းတို့ အဖွဲ့သည် အင်အား ၂၀ ကျော်ရှိကြောင်း သိရသည်။

အလားတူ ပြီးခဲ့သည့် ဇန်နဝါရီ ၁၇ ရက် မနက် ၁၀ နာရီဝန်းကျင် အမှတ် ၁ ဈေးထဲတွင် အမျိုးသမီး ၂ ဦး လောဝ်ခမ်း ရွှေဆိုင်ထဲကို ဝင်ရောက်ခိုးယူခဲ့ပြီး ငွေကျပ်သိန်း ၃၀၀ နီးပါး ဆုံးရှုံးသွားခဲ့ကြောင်း သိရသည်။

စစ်တပ်အာဏာသိမ်းပြီးနောက်ပိုင်း မူဆယ်မြို့ ဒေသခံများသည် တိုင်းရင်းသားလက်နက်ကိုင် နှင့် ငွေလိမ်ဂိုဏ်းများ ငွေခြိမ်းခြောက်တောင်းယူမှုများ ခံနေရသည့်အပြင် သူခိုး၊ ဓားပြတွေလည်း သောင်းကျန်း လျက်ရှိသည်။