သျှမ်းပြည် ကျောက်မဲခရိုင် မန်တုံမြို့နယ်အတွင်း တအာင်းအမျိုးသားလွတ်မြောက်ရေးတပ်မတော် TNLA တပ်ဖွဲ့သည် အမျိုးသမီးများကိုပါ အတင်းအဓမ္မ တပ်သားသစ် စုဆောင်းနေကြောင်း သတင်းရရှိသည်။
ယခုနှစ် မတ်လ မှစပြီး ယနေ့ ဧပြီလထိ မန်တုံမြို့နယ်အတွင်းရှိ ကျေးရွာတစ်ချို့ထဲတွင် TNLA တပ်ဖွဲ့သည် တပ်သားသစ်ကောက်ယူနေပြီး၊ အမျိုးသားမရှိပါက အမျိုးသမီးကို ယူဆောင်သွားကြောင်း သား/သမီး မရှိပါက လူစားထိုးရန် မိဘများကို ဖမ်းဆီးခေါ်ဆောင်သွားကြောင်း ဒေသခံများ ပြောပြချက်အရ သိရသည်။
အလားတူ ယမန်နေ့ ဧပြီ ၂ ရက်တွင်လည်း မန်တုံကျေးရွာတွင်း TNLA က တပ်သားသစ် စုဆောင်းရာမှ နေအိမ်တွင်း စစ်မှုထမ်းဆောင်မည့်သူ မရှိသည့်အတွက်ကြောင့် ဖခင်ဖြစ်သူကို ဖမ်းဆီးခေါ်ဆောင်သွားပြီး သမီး နှင့် ပြန်လည် အစားထိုး လာထုတ်ယူခိုင်းကြောင်း ၎င်း မိသားစုဝင် နှင့် နီးစပ်သူ တစ်ဦးက သျှမ်းသံတော်ဆင့်ကို ပြောပြလာသည်။
“ သူတို့ တပ်သားသစ် လာကောက်တာ။ အိမ်မှာ သွားလုပ်မဲ့သူမရှိဘူး။ သူ့ သား/သမီးတွေက တစ်ခြားမြို့တွေမှာ အလုပ်သွားလုပ်တာ။ အဲ့ဒါကို သူ့အဖေကို ဖမ်းခေါ်သွားတာ။ အဖေကို ပြန်လွှတ်လာစေချင်ရင်တော့ အစားထိုး ပြန်သွားရမှာပေါ့။ မနေ့ကပဲ အဲ့အမျိုးသားရဲ့ သမီးက လိုက်သွားတာ။ အခုတော့ သူ့အဖေတော့ ပြန်လွှတ်လာပြီ။ သူ့သမီးက စစ်မှုသွားထမ်းရတာ” ဟု ၎င်းတို့ မိသားစု နှင့် ရင်းနှီးသူက ပြောသည်။
လက်ရှိ စစ်မှု သွားထမ်းဆောင်ရသည့် အမျိုးသမီးသည် ၂၁ နှစ် အရွယ်သာရှိနေပြီး မိသားစု စားဝတ်နေရေးအတွက် လောက်ကိုင်မြို့တွင် အလုပ်သွားရောက် လုပ်ကိုင်နေသူဖြစ်သည်။
၎င်းသည် ယမန်နေ့ ဧပြီ ၂ ရက်တွင် လောက်ကိုင်မြို့မှ တစ်ဆင့် လားရှိုးသို့ ကားနှင့် ပြန်လာခဲ့ပြီး တအာင်းအမျိုးသားလွတ်မြောက်ရေး တပ်မတော် ဌာနချုပ်ရှိရာ နမ့်ဆန်မြို့သို့ သွားရောက်ပြီး စစ်မှုထမ်းခဲ့ကြောင်း သိရသည်။
ထိုအပြင် TNLA တပ်ဖွဲ့ ခေါ်ယူသွားသည့် အမျိုးသမီး၏ ဖခင်သည် ယခင်က TNLA တပ်ဖွဲ့ ထဲက အမှုထမ်းဟောင်းတစ်ဦးဖြစ်ကြောင်း၊ ထို့အပြင် စစ်မှုထမ်းဆောင်ရန်အတွက် လူမရှိပါက ငွေပေး အခွန်ဆောင်သော်လည်း မရဘဲ ရှိတဲ့သူကိုသာ ယူဆောင်သွားကြောင်း သိရသည်။
“ စစ်မှုထမ်းဖို့ လူမရှိရင်လည်း တွေ့တဲ့လူ ရှိတဲ့သူကို ခေါ်သွားတာ။ ပိုက်ဆံပေးပြီး အခွန်ဆောင်မယ်ဆို လည်းမရဘူး။ သူတို့ပိုက်ဆံ မလိုချင်ဘူးတဲ့။ လူလိုချင်တာဆိုပြီးတော့ ခေါ်သွားတာ” ဟု ဒေသခံများ ပြောပြချက်အရ သိရသည်။
သျှမ်းပြည်တစ်ဝှမ်းတွင် တိုင်းရင်းသား လက်နက်ကိုင်တပ်ဖွဲ့ အများဆုံးရှိသည့် နယ်မြေဖြစ်ပြီး ပြည်သူများက အခွန်ကိစ္စ နှင့် တပ်သားစုဆောင်းမှု နှင့် နေ့စဉ်နဲ့အမျှ ရင်ဆိုင်ကြုံတွေ့နေရသည်။
ထိုသို့ တိုင်းရင်းသားလက်နက်ကိုင် တပ်ဖွဲ့များသည် တပ်သားကောက်ယူနေသည်မှာ စည်းစနစ်မရှိကြောင်း ပြည်သူများက ပြောဆိုလိုက်သည်။
“ သူတို့က စည်းမရှိဘူး။ လိုရင် လိုသလို ပဲလာခေါ်သွားတာ။ ကျောင်းတက်နေသေးတယ်ဆိုရင်လည်း လာခေါ်သွားတယ်။ ကျောင်းပြန်တက် ရရင်လည်း သူတို့ထောက်မယ် ပြီးရင် သူတို့နား အလုပ်ပြန် လုပ်ရမယ်ဆိုတာ ပဲပြောတယ်။ သူတို့တွေက စည်းမရှိဘူး။ တပ်သားသစ်တွေကို ခေါ်ယူတာက စည်းရှိသင့်တယ်။ အခုက အတင်းအဓမ္မခေါ်ယူနေတာနဲ့တူတယ်” ဟု မန်တုံဒေသခံတစ်ဦးက ပြောသည်။
မန်တုံမြို့နယ်အတွင်းရှိ တအာင်းကျေးရွာ ထဲတွင် တစ်အိမ်လျှင် တစ်ယောက် မဖြစ်မနေ စစ်မှုထမ်းဆောင်ရကြောင်း သိရသည်။
