သျှမ်းပြည် တာချီလိတ်ခရိုင် တာချီလိတ်မြို့ တော်ကော့တွင်းရပ်ကွက်တွင် အမျိုးသားတစ်ဦး ဦးခေါင်းဓားခုတ်ခံရပြီး သေဆုံးမှုဖြစ်ပွားကြောင်း စုံစမ်းသိရှိရသည်။
ယမန်နေ့ (မတ်လ ၃၁ ရက်) ညနေပိုင်း ၅ နာရီအချိန်ဝန်းကျင်တွင် တာချီလိတ်မြို့ တော်ကော့တွင်းရပ်ကွက်ရှိ အိမ်ခြေမဲ့အဖြစ် နေထိုင်သူ အသက် (၅၀) နှစ်ဝန်းကျင် အမျိုးသားတစ်ဦး၏ ဦးခေါင်းတွင်း ဓားခုတ်သည့် ဒဏ်ရာဖြင့် သေဆုံးနေေသာ အလောင်းကိုတွေ့ရှိခဲ့ကြောင်း ဦးလှမိုး(တာချီလိတ်) လူမှုကူညီရေးအသင်းမှ တာဝန်ခံတစ်ဦးက ပြောသည်။
“ ပျံကျနေထိုင်သူ အချင်းချင်း ရန်ဖြစ်ပြီး ဓားနဲ့အပြန်အလှန်ခုတ်ကြတာ။ အဲ့အမျိုးသားတော့ ဦးခေါင်မှာ ဓားနဲ့တစ်ချက် ခုတ်ခံထားရတာ တွေ့ရတယ်။ အခင်းမှာလည်း တုတ်ချောင်းတွေလည်း တွေ့ရတယ်။ သူတို့အချင်းချင်း ရန်ဖြစ်ပြီး ဓားတွေ၊ တုတ်တွေနဲ့ ရိုက်ကြတာ ဖြစ်နိုင်တယ် “ ဟု ၎င်းတာဝန်ခံတစ်ဦးက ပြောသည်။
အဆိုပါ ဓားဖြင့်ခုတ်ခံရသည့် အမျိုးသားကို တာချီလိတ်ပြည်သူ့ဆေးရုံသို့ ပို့ဆောင်ထားလိုက်ပြီဖြစ်ကြောင်း သိရသည်။
ထို့အပြင် စစ်တပ်က အာဏာသိမ်းပြီးနောက်ပိုင်း တာချီလိတ်မြို့တွင် ရွှေ့ပြောင်းအလုပ်သမားများ သောင်းကျော်ရောက်ရှိနေပြီး အလုပ်လုပ်ကိုင်ရှာဖွေနေကြသည့်အပြင် လောင်းကစားဝိုင်း၊ မူးယစ်ဆေးဝါးနှင့် တရားမဝင် အလုပ် အွန်လိုင်းဂိမ်းများလည်း အဆမတန် ပေါများလာနေပြီး ခိုးဆိုးလုယက်၊ ဓားပြတိုက်မှုနှင့် ရိုက်နှိက်မှုမှာလည်း မကြာခဏ ဖြစ်ပွားနေကြောင်း သိရသည်။
“ တာချီလိတ်မှာတော့ လူမျိုးပေါင်းစုံရှိတယ်။ မူးယစ်ဆေးဝါးတွေလည်း ပေါသလို အွန်လိုင်းဂိမ်းတွေလည်း အများကြီးရှိတယ်။ တစ်ခါတလေ မူးယစ်ဆေးဝါး ကြောင်တဲ့တွေသူ လမ်းသွားလမ်းလာမှာ ဓားတွေ၊ တုတ်တွေ ကိုင်ပြီး လျောက်သွားနေတာလည်း တွေ့ရတယ်။ ပြည်သူတွေကတော့ လုံခြုံရေးစိုးရိမ်ရတာပေါ့။ အပြင်သွားရင် အရင်လို လွတ်လွတ်လပ်လပ်၊ စိတ်ချလက်ချ မသွားရဲတော့ဘူး “ ဟု ၎င်း တာချီလိတ်ဒေသခံ အမျိုးသားတစ်ဦးက ပြောသည်။
စစ်တပ်က အာဏာသိမ်းပြီး ၂ နှစ်ကာလအတွင်း မြန်မာနိုင်ငံမှာ စစ်ရေးပဋိပက္ခများကြောင့် နိုင်ငံရေး မတည်မငြိမ်မှုဖြစ်ပြီး တရားဉပဒေမဲ့ခေတ်ရောက်ရာ ခိုးဆိုးလုယက်၊ ဓားပြတိုက်မှု၊ ခြိမ်းခြောက် ငွေတောင်းယူမှုနှင့် ပြန်ပေးဆွဲမှုများလည်း မကြာခဏ ဖြစ်ပွားနေကြောင်း သိရသည်
