သျှမ်းပြည် မူဆယ်ခရိုင် မူဆယ်မြို့နယ် သိန်းသန်းချီ ကားကွင်းထဲတွင် မြို့မပြည်သူ့စစ်များ ပစ်ခတ်ခံရပြီး တပ်သား ၂ဦးသေဆုံးကာ ၃ဦးထိခိုက်ဒဏ်ရာရကြောင်း သတင်းသိရသည်။
ယနေ့ (မတ်လ ၃၁) ရက်နေ့ ၁၂ နာရီဝန်းကျင်တွင် အမည်မသိလက်နက်ကိုင် တစ်စုသည် သိန်းသန်းချီ ကားကွင်းမှ မြို့မ ပြည်သူ့စစ်တပ်ဖွဲ့ကို လာရောက်ပစ်ခတ်သည့်အတွက် ပြည်သူ့စစ် နှစ်ဦးသေ ၊ အရပ်သား ၂ဦးနှင့် ပြည်သူ့စစ် ဆစ်ဦး ဒဏ်ရာရကြောင်း ဒေသခံများက သျှမ်းသံတော်ဆင့်ကို ပြောသည်။
“ကားတွေ ဝင်လာပြီး ရပ်နားတာ မကြာသေးဘူး၊လက်နက်ကိုင်တပ်ဖွဲ့ ဝင်ပစ်သွားတာ၊ နှစ်ဦးသေ ၊ သုံးဦး ဒဏ်ရာရ၊ ဘယ်အဖွဲ့က လာပစ်သွားမှန်းတော့ မသိဘူး” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ပစ်ခတ်မှုတွင် သေနတ်အပြင် ဗုံး အသုံးပြုမှုလည်း ရှိနေကြောင်း ဒေသခံများက ဆက်ပြောသည်။
လက်ရှိတွင် ထိခိုက်ဒဏ်ရာရသူ နှင့် သေဆုံးသူ ရုပ်အလောင်းများကို ဒေသအတွင်း လူမှုကူညီရေး ပရဟိတ သမားများက လာရောက်သယ်ဆောင်သွားကြောင်းလည်း သိရသည်။
ပြီးခဲ့သည့် မတ်လ ၇ ရက် ည ၆ နာရီဝန်းကျင်မှာလည်း မူဆယ်မြို့ရှောင်လမ်း စိုးသစ္စာ ဆီဆိုင်အနီးရှိ 69 Hotel ၌ အမျိုးသား တစ်ဦး ဗုံးဖြင့် လာရောက်ပစ်ခတ်သဖြင့် ပေါက်ကွဲမှုဖြစ်ပြီး ဆိုင်ကယ်နှစ်စီး ပျက်စီး ခဲ့ရသည်။
မူဆယ်မြို့နယ်သည် မြန်မာ – တရုတ်နယ်စပ် မြို့ဖြစ်သည့်အတွက် လူမျိုးစုံ ဝင်ထွက်သွားလာသည့်အပြင် လက်နက်ကိုင် တပ်ဖွဲ့မျိုးစုံလည်း ရှိသည့် ဒေသဖြစ်သည်။
ထို့အပြင် စစ်အာဏာသိမ်းပြီးနောက်ပိုင်း မူဆယ်မြို့တွင်းတွင် တရားမဝင် လောင်းကစားဝိုင်းများ၊ အကြောင်းရင်း မသိ ပစ်ခတ်သတ်ဖြတ်မှုများ၊ ရာဇဝတ်မှုများလည်း ပေါများသည့် ဒေသလည်း ဖြစ်သည်။
