သျှမ်းပြည် ကျောက်မဲမြို့နယ် အတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့က ပြည်သူပိုင်အိမ်ကို သိမ်းယူပြီး စခန်းချ နေထိုင်နေကြောင်း သတင်းသိရသည်။

ပြီးခဲ့သည့် မတ်လ ၂၆ ရက် ညနေပိုင်း အချိန်တွင် ကျောက်မဲမြို့နယ် မန်စံကျေးရွာအုပ်စု အုံးငန်းကျေးရွာရှိ ပြည်သူပိုင် နှစ်ထပ်အိမ် တစ်လုံးကို TNLA တပ်ဖွဲ့က သိမ်းယူပြီး ၎င်းတို့ အလံစိုက်ထူကာ စခန်းချ နေထိုင်လျက် ရှိကြောင်း ဒေသခံများထံမှ သိရသည်။

“စစ်သား အယောက် ၆၀ လောက်ကာ ရွာထဲဝင်လာပြီးတော့ သူတို့က ဒီရွာထဲမှာ စခန်းချတဲ့ နေရာလုပ်မယ်၊ ပြီးတော့ ရွာထဲမှာ ရှိတဲ့ အဲ့အိမ်ဆီကို သွားပြီးတော့ ဒီမှာတည်းမှာပေါ့၊ ပစ္စည်းတွေချပြီးတော့ သူတို့ အလံပါ ထောင်ထားလိုက်တယ်၊ အိမ်ရှင်ကိုတောင် ခွင့်မတောင်းဘူး” ဟု အမည်မဖော်လိုသူ ဒေသခံ တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် TNLA စစ်သားများက အဆိုပါ အိမ်တွင် စခန်းချနေထိုင် လျက်ရှိပြီး အိမ်ရှင်ဖြစ်သူများက အတူ မနေရဲသည့် အတွက် ရသလောက် ပစ္စည်းများကို သိမ်းယူကာ ကျောက်မဲမြို့ပေါ်သို့ ညတွင်းချင်း ထွက်ပြေးလာခဲ့ ရကြောင်း သိရသည်။

ထို့အပြင် တခြားသော ဒေသခံရွာသားများ တချို့ကလည်း ရွာထဲ ဝင်နေသည့် TNLA စစ်သားများကို ကြောက်လန့်သည့် အတွက် နီးစပ်ရာ ဆွေးမျိုးများ ရှိရာ နှင့် မြို့ပေါ်သို့ ထွက်ပြေးလာသူလည်း ရှိနေကြောင်း သိရသည်။

“ညတွင်းချင်း ထွက်လာတော့ ပစ္စည်းများများလည်း မပါလာဘူး၊ ကျောက်မဲက သူတို့ အမျိုးဆီကို အကြောင်း အကျိုးပြောပြီး ခိုလှုံခွင့် တောင်းနေနေရတယ်၊ တော်တော်များများကလည်း ကြောက်နေကြလို့ မြို့ပေါ်ကို အိမ် ငှားနေ ၊ သူများအိမ်မှာ ကပ်နေ အဲ့လိုမျိုးတွေ လုပ်ပြီး ရှောင်နေရတယ်” ဟု အထက်ပါ ပုဂ္ဂိုလက် ဆက်ပြော သည်။

ထို့အပြင် ကျောက်မဲမြို့ နှင့် ကပ်လျက်ရှိ မန်ကျောင်းကျေးရွာအုပ်စု ၊ ကျွဲကုန်းကျေးရွာ အုပ်စု နှင့် ခိုမုန်း ကျေးရွာ အုပ်စု အထိ TNLA စစ်သားများက လူဝင်ရောက် ဖမ်းဆီးမှု ရှိနေကြောင်းလည်း ဒေသခံများက ပြောသည်။

ထို့အပြင် ကျောက်မဲမြို့ အခြေစိုက် စရဖ၊ စကစ တို့၏ ခွင့်ပြုချက်ဖြင့် မြိုပေါ် KTV များအထိ လူဝင်ဖမ်းခြင်း ရှိကြောင်းလည်း သိရသည်။
“TNLAတွေက ရွာတွေဘက်မှာရော၊ မြို့ပေါ်မှာရော ဝင်ပြီးတော့ လူလိုက်ဖမ်းတာရှိတယ်၊ တပ်သား သစ် စုဆောင်း ဖို့အတွက်တဲ့၊ လူငယ်တွေလည်း မနေရဲတော့ဘူး၊ ထိုင်းသွားတယ်၊ တရုတ်သွားကြတယ်၊ ပြီးတော့ အိမ်ရှင် အဖိုးအဖွား အဖေအမေတွေက သူများ ခြံ၊ ငှက်ပျောတော၊ ဝါးရုံတောတွေမကျန် သွားအိမ်ရတာ” ဟု ကျောက်မဲမြို့ပေါ်က ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

TNLA တပ်ဖွဲ့သည် ဒေသခံများကို စစ်သားသစ် စုဆောင်းရေးအတွက် ဖမ်းဆီးခြင်း ဖြစ်သည်ဟု သိရပြီး တအာင်း(ပလောင်) လူမျိုးများအပြင် သျှမ်းလူမျိုးများကိုလည်း ဖမ်းဆီးခေါ်ဆောင်မှု ရှိနေကြောင်းလည်း ဒေသခံများက ပြောသည်။

ထို့အတူပင် ၂၀၂၂ ခုနှစ် ဖေဖော်ဝါရီမှ ဇူလိုင်လ အထိ ကျောက်မဲမြို့နယ်၊ လွယ်ကုံကျေးရွာအတွင်း TNLA တပ်သား သစ် စုဆောင်းမှုများကြောင့် ဒေသခံများသည် ထိုင်းနိုင်ငံဘက်ခြမ်းထိ ထွက်ပြေးနေရကြောင်း လည်း သတင်း သိရသည်။

ယင်းကိစ္စ ဖြစ်စဥ်များ နှင့် ပတ်သက်ပြီး ဖြစ်စဥ် သိရှိနိုင်ရန် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၏ ပြောရေးဆိုခွင့် ဗိုလ်မှူးကြီး တားအိုက်ကျော်ထံသို့ အကြိမ်ကြိမ် ဖုန်းဆက်သော်လည်း ဖုန်းလက်ခံ ဖြေကြားခြင်း မရှိပေ။