သျှမ်းပြည် မူဆယ်ခရိုင် နမ့်ခမ်းမြို့ပြင်တွင် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တပ်သားတို့က စစ်အင်အားဖြည့်တင်းလာပြီး ဒေသခံပြည်သူများ နေအိမ်များထဲလာရောက်နေထိုင်ကြောင်း စုံစမ်းသိရသည်။
ယခု မတ်လ တတိယပတ်က စတင်ပြီး TNLA တပ်သားများသည် နမ့်ခမ်းမြို့ပြင်တွင် စတင်ဝင်ရောက်လာပြီး ယနေ့ မတ်လ ၃၀ တွင် မြို့တွင်း နှင့် နီးစပ်လာကာ ပြည်သူများ၏ နေအိမ်ထဲသို့ ဝင်ရောက်နေထိုင် စားသောက်နေလျက်ရှိသည်။
“ သူတို့ နမ့်ခမ်းဘက်ကိုလာနေတာတော့ ၁၀ ရက်ကျော်လောက်ရှိနေပြီ။ အခုက နမ့်ခမ်းမြို့နဲ့ပိုနီးလာတယ်။ အင်အား ၁၀၀ လောက်ရှိတယ်။ သူတို့ ပြည်သူတွေအိမ်မှာနေတယ်။ အဲအိမ်တွေမှာပဲ စားကြတယ်။ စာသင်ကျောင်းတွေထဲမှာလည်း သွားနေတယ်။ သွားစားတယ်” ဟု နမ့်ခမ်းမြို့ ဒေသခံ အမျိုးသားတစ်ဦးက ပြောသည်။
ထိုသို့ TNLA တပ်သည် စစ်ကောင်စီ တပ်စခန်း နှင့် နီးစပ်လာသည့်အတွက်ကြောင့် စစ်ကောင်စီက မြို့ဝင်မြို့ထွက်ဂိတ်ကို ပိတ်ထားလိုက်ပြီး ပြည်သူများကို မြို့ထွက်ခွင့် ယာယီပိတ်လိုက်ကြောင်း ဒေသခံများက ပြောသည်။
“ TNLA ရောက်လာတဲ့နေရာက စစ်ကောင်စီ တပ်စခန်းနဲ့ နီးတယ်။ မနက်ပိုင်းတုန်းကတော့ မုဉ်ဦးတွေကို စစ်ကောင်စီက ပိတ်လိုက်တာ။ အခုလည်းမုဉ်ဦးတံခါးဖွင့်လိုက်ပြီး။ ပြည်သူတွေကိုလည်း မြို့ပြင်မပေးသွားဘူး” ဟု နမ့်ခမ်းမြို့ ဒေသခံတစ်ဦးက ပြောသည်။
TNLA တပ်သားများသည် နမ့်ခမ်းမြို့ အနီး စယ်ဟိုင်းသို့ရောက်ရှိလာသည့်အတွက်ကြောင့် ပြည်သူများက တိုက်ပွဲဖြစ်ပွားမှာကို စိုးရိမ်နေကြသည်။
တစ်ဖက်တွင်လည်း စယ်ဟိုင်းသည် စစ်ကောင်စီ တပ်စခန်းနှင့် မနီးမဝေး တွင်တည်ရှိထားသည်။
“ TNLA တပ်သားတွေက ရွာသားအိမ်တွေမှာလည်း နေချင်သလိုနေတယ်။ စားချင်တာစားတယ်။ သူတို့ ဒီလိုမြို့ထဲဝင်လာတော့ ပြည်သူတွေကတော့ တိုက်ပွဲဖြစ်ပွားမှု စိုးရိမ်ကြတယ်။ ဖြစ်နိုင်ရင်တော့ တိုက်ပွဲမဖြစ်စေချင်ဘူး” ဟု အမည်မဖော်လိုသည့် ဒေသခံတစ်ဦးက ပြောသည်။
နမ့်ခမ်းမြို့နယ်အတွင်းတို့ စစ်ကောင်စီတပ်အပြင် ရှမ်းပြည်တိုးတက်ရေးပါတီ SSPP/SSA နှင့် တအာင်းအမျိုးသားလွတ်မြောက်ရေးတပ်မတော် TNLA တို့လည်း သွားလာလှုပ်ရှားသည်။
Leave a Comments