သျှမ်းပြည် လွိုင်လင်ခရိုင် ခိုလမ်မြို့နယ် တပ်ထိန်းတပ်မှူး၏ဇနီးသိမ်းယူသွားသည့် ပစ္စည်းများကို ပိုင်ရှင်ထံ ပြန်သွားပေးဆောင် သော်လည်း လက်ရှိအချိန်ထိ အိမ်မရောက်သေး စုံစမ်းသိရှိရသည်။
ပြီးခဲ့သည့် မတ် ၂၅ ရက် ခိုလမ်မြို့ ရပ်ကွက် ၆ အမျိုးသမီးအိမ်ထဲတွင် တပ်ထိန်းတပ်မှူးဇနီးက အိမ်ရှင်မရှိချိန် သွားရောက် ယူဆောင်ခဲ့သည့် ပစ္စည်းများကို ပြန်သွားပေးခဲ့ကြောင်း သိရသည်။
အဆိုပါ ရပ်ကွက် ၆ တွင်းနေထိုင်သည့် အမျိုးသမီးသည် တပ်မှူးဇနီးထံ ငွေသိန်း ၃၀ အကြွေးတင် ထားသောကြောင့် တပ်မှူးဇနီးက အိမ်ရှင်မရှိချိန် နေအိမ်တွင်း ပစ္စည်းများကို သွားရောက်ယူဆောင်ခဲ့သည်။
“ ပြန်လာပေးပြီးလို့ပြောတယ်။ ဒါမဲ့ အိမ်မရောက်သေးဘူး။ ရပ်ကွက်အုပ်ချုပ်ရေးအိမ်မှာရှိတယ်တဲ့။ သွားမယူရသေးဘူး” ဟု ရပ်ကွက် ၆ အတွင်းနေထိုင်သည့် အမျိုးသမီးက ပြောသည်။
တပ်မှူးဇနီးသိမ်းယူသွားသည့် ကုတင် နှင့် စတီးခုံးများကို ယမန်နေ့ (မတ် ၂၈) ည ၉ နာရီခွဲအချိန်တွင် သွားရောက်ပေးဆောင် ခဲ့သော်လည်း အိမ်ရှင်က နေအိမ်တွင်မရှိသည့်အတွက်ကြောင့် ရပ်ကွက် အုပ်ချုပ်ရေးအိမ်ထံ သွားရောက်ထားရှိကြောင်း သိရသည်။
“ မနေ့ညပြန်သွားပေးတာတဲ့။ သွားပေးတော့ အိမ်မှာ လူမရှိလို့ ကျနော်အိမ်မှာလာထားထားတာ။ ကျနော်တို့လည်း ဘာလုပ်ပေးရမလဲမသိတော့ဘူး။ ဘာကြောင့် ပြန်သွားပေးတာလဲတော့ ကျနော်တို့လည်း မသိဘူး” ဟု ခိုလမ်မြို့ ရပ်ကွက် ၆ အုပ်ချုပ်ရေးမှူး က ပြောသည်။
ပစ္စည်းများလာရောက်သယ်ချိန်တွင် နေအိမ်ထဲတွင် တစုံတဦးမရှိသည့်အတွက် နေအိမ်ခြံတံခါးနှင့် နေအိမ်တံခါးများကို သော့ဖျက်ပြီး ဝင်ရောက်ခဲ့ပြီး ပစ္စည်းများကို သယ်ခဲ့ရာမှ ပစ္စည်းလာပေးချိန်တွင် လူမရှိသည့်အတွက် အုပ်ချုပ်ရေးမှူးကိုပေးခဲ့ရခြင်းမှာ လွှဲမှားနေကြောင်း လည်း ပစ္စည်းသိမ်းခံရသည့် အမျိုးသမီး၏ နီးစပ်သူတစ်ဦးကသျှမ်းသံတော်ဆင့်ကိုပြောသည်။
“ လာသယ်တုန်းကတော့ လူမရှိလည်း အိမ်ခြံဖျက်သိမ်တယ်။ ပြန်ပေးတော့ လူမရှိလို့ အုပ်ချုပ်ရေးမှူးအိမ်ထားတယ်ဆိုတာ မဟုတ်သေးဘူး။ သူတို့ဘက်က စာချုပ်အတုတွေချုပ်တာပါ။ ချေးငှားတုန်းက ဘာစာချုပ်မှမရှိကြဘူး။ နောက်ပြီး အတိုးပေးထားတယ်လေ” ဟု အထက်ပါ ပုဂ္ဂိုလ်က ပြောသည်။
ရပ်ကွက် ၆ တွင်းနေထိုင်သည့် အမျိုးသမီးသည် စီးပွားရေးလုပ်ရန်အတွက် တပ်မှူးဇနီးထံ ပိုက်ဆံ သိန်း ၃၀ ချေးငွေယူခဲ့ပြီး ၊လက်ရှိမှာ အချို့တဝက်ပြန်ဆပ်ထားပြီး အနည်းငယ်ကျန်ရှိနေသေးကြောင်း သိရသည်။
