သျှမ်းပြည်တောင်ကြီးခရိုင် ပင်လောင်းမြို့နယ် မြောက်စလုံးရွာကို စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးလာရောက်ကြဲခဲ့ကြောင်း သတင်းသိရှိရသည်။

ယမန်နေ့ (မတ်လ ၂၈ ရက်) နေ့လည်ပိုင်း ၁ နာရီအချိန်မှစပြီး စစ်ကောင်စီတပ်ဖွဲ့မှ ပင်လောင်းမြို့နယ် မြောက်စလုံးရွာကို တိုက်လေယာဉ်တစ်စီး လာရောက်ပျံဝဲကာ ဗုံးကြဲချသွားခဲ့ကြောင်း ပအိုဝ်းအမျိုးသား ကာကွယ်ရေးတပ်ဖွဲ့ (ခမ်းကောင်) PNDF (KK) မှ တာဝန်ခံတစ်ဦးက သျှမ်းသံတော်ဆင့်ကို ပြောသည်။

“ မနေ့ညအခြေနေတော့ ရွာထဲတော့ မဟုတ်ဘူး။ တောင်ပေါ်ဖက်မှာ ဖြစ်တာ။ သူတို့တော့ (.5) နဲ့ လာပစ်သွားတယ်။ ထိခိုက်မှုကတော့ လက်ရှိအချိန်ထိ ဒီကနေပြောဆိုလာတာ မရှိသေးဘူး။ စစ်ကောင်စီကတော့ ဝင်တဲ့ရွာတိုင်းကို ဖျက်ဆီးနေတာ “ ဟု ၎င်းက ပြောသည်။

အဆိုပါ မြောက်စလုံးရွာတွင် ထိတွေ့တိုက်ပွားဖြစ်ပွားခြင်းမရှိဘဲ စစ်ကောင်စီတပ်ဖွဲ့မှ တစ်ဖက်သတ် တိုက်လေယာဉ်ဖြင့် ဗုံးကြဲချခဲ့ပြီး နေအိမ် ပျက်စီးဆုံးရှုံးမှုကိုတော့ မသိရသေးပေ။

အလားတူ ယမန်နေ့ (မတ်လ ၂၈ရက်) ညနေပိုင်းအချိန်တွင် ကယားပြည် (ကရင်နီ) ဒီးမောဆိုအနောက်ခြမ်းရှိ စစ်ရှောင်စခန်းတစ်ခုကိုလည်း စစ်ကောင်စီတပ်ဖွဲ့မှ တိုက်လေယာဉ်ဖြင့် ဗုံးကျဲတိုက်ခိုက်ခဲ့ကြောင့် လူ ၁ ဦးသေဆုံးပြီး ၄ ဦးထိခိုက်ဒဏ်ရာရရှိခဲ့ကြောင်း ကယား (ကရင်နီ) တော်လှန်ရေးတပ်ပေါင်းစု (KRU) ပြန်ကြားရေး တာဝန်ခံ ကိုလင်းလင်းက ပြောသည်။

“ မနေ့က ညနေ၊ မနက်သေးတဲ့အချိန်မှာ စစ်ကောင်စီက တိုက်လေယာဉ် ဗုံးလာကြဲတယ်။ (၄-၅) ချက်လောက် ပေါက်ကွဲသံကြားတာ။ ၁ ယောက်ကတော့ ပွဲချင်းပြီးသွားတယ်။ ကျန်တဲ့ ၄ ယောက်ကတော့ ထိခိုက်ဒဏ်ရာ ရသွားတယ် “ ဟု ကိုလင်းလင်းက ပြောသည်။

တိုက်ပွဲ ဆက်လက်ပြင်းနေသည့် သျှမ်း-ကယား နယ်စပ်ဒေသတွင် စစ်ကောင်စီတပ်ဖွဲ့ဖက်မှ လက်နက်ကြီး နေ့စဉ်နီးပါး ပစ်ခတ်နေသလို တိုက်လေယာဉ်များဖြင့် နေ့စဥ်လာရောက် ပျံဝဲနေကြောင်းလည်း သိရသည်။

ပြီးခဲ့သည့် (ဖေဖော်ဝါရီ ၂၄ ရက်)မှစပြီး စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားမှုကြောင့် ပင်လောင်းမြို့နယ် မြောက်စလုံး၊ တောင်စလုံး၊ တောင်မဲသင်း၊ လုံးပျဉ်၊ ပင်ပုံနှင့် နိမ့်နိန်း စသည့်ကျေးရွာမှ ပြည်သူ (၅,၀၀၀) ကျော်သည် အိုးအိမ်စွန့်ပြီးထွက်ပြေးတိမ်းရှောင်နေရကြောင်း သိရသည်။