သျှမ်းပြည် လွိုင်လင်ခရိုင် ခိုလမ်မြို့ ရှိ အမျိုးသမီးတစ်ဦးသည် တပ်ထိန်းတပ်မှူး ဇနီးထံ အကြွေးသိန်း ၃၀ တင်ထားရာမှ အကုန်မဆပ်နိုင်သေးသဖြင့် ၎င်းအမျိုးသမီး နေအိမ်တွင်းမရှိချိန်တွင် သော့ဖျက်ပြီး ပစ္စည်းများကို ယူဆောင်သွားခဲ့ကြောင်း စုံစမ်းသိရှိရသည်။
ပြီးခဲ့သည့် မတ် ၂၅ ရက်နေ့ ခိုလမ်မြို့ ရပ်ကွက် ၆ အတွင်း နေထိုင်သည့် အမျိုးသမီးတစ်ဦးသည် စီးပွားရေးလုပ်ရန် တပ်မှူးဇနီးထံ ငွေချေးငှားခဲ့ပြီး အကုန်မဆပ်နိုင်သေးသဖြင့် တပ်မှူးဇနီးက အိမ်တွင်းရှိ ပစ္စည်းများကို ခွင့်ပြုချက်မရဘဲ လာရောက်ယူဆောင်သွားခဲ့ကြောင်း ပစ္စည်းသိမ်းခံရသည့် အမျိုးသမီး က သျှမ်းသံတော်ဆင့် ကိုပြောသည်။
“ ကျမကလည်း စီးပွားရေး တစ်ခုအတွက် ငွေတောင်းချေးတာ။ ငွေချေးတုန်းကတော့ ဘာစာချုပ် နဲ့ ချေးတာတော့ မဟုတ်ဘူး။ ယုံကြည်မှုတွေနဲ့ပဲ။ ငွေချေးလာတာ ၁၀ လလောက်တော့ ရှိတော့မယ်။ ကြားထဲမှာ နည်းနည်းချင်းတော့ ဆပ်သွားတယ်။ ၁၀ သိန်းကျော်လောက်တော့ ဆပ်ပြီးပြီ။ အခုက ကျမအိမ်မှာ မရှိချိန် ရပ်ကွက် ဥက္ကဌတွေနဲ့ ခေါ်ပြီးတော့ အိမ်သော့တွေဖျက်ပြီးတော့ ပစ္စည်းတွေကို ကားနဲ့ လာတင်သွားတာ” ပစ္စည်းသိမ်းခံလိုက်ရသည့် အမျိုးသမီးက ပြောသည်။
အဆိုပါ တပ်မှူးဇနီး လာရောက်သိမ်းသွားသည့် ပစ္စည်းများသည် သိန်း ၅၀ ဝန်းကျင်ရှိကြောင်း သိရသည်။
“ သူသိမ်းယူသွားတာက သိန်း ၅၀ လောက်တော့ရှိတယ်။ ဘာလို့လဲဆိုတော့ ကျမအိပ်တဲ့ ကုတင်ထဲမှာ ရွှေဆွဲကြိုး တစ်ခုနဲ့ လက်စွပ်တစ်ခု ထည့်ထားတာ။ အိမ်မှာရှိတဲ့ ကုတင်တွေ ၊ ခုံတွေယူသွားတာ။ ကျမက မုဆိုးမ ဖြစ်တယ်။ ကလေးကို ကျောင်းထားဖို့ဆိုပြီး အဲ့ဒါကို မပေးဘဲ ထားထားတာ” ဟု ၎င်း အမျိုးသမီးက ပြောသည်။
တပ်မှူးဇနီးသည် ထိုသို့ နေအိမ်တွင် လူမရှိချိန် သော့ဖျက်ပြီး ပစ္စည်းများကို လာရောက်ယူဆောင်သွားခြင်းသည် ဓားပြတိုက် ခိုးယူမှုဖြစ်ကြောင်း ၎င်းအမျိုးသမီးက ပြောသည်။
“ သူတော့ ဒီတိုင်း လာမယူသွားသင့်ဘူး။ ကျမ အိမ်မှာ မရှိတဲ့အချိန်မှာ သော့တွေဖျက်ပြီးတော့ လာယူသွားတာက အိမ်ခိုးဖောက်ယူတာနဲ့ တူတယ်။ ဒါကို အရေးယူခိုင်း စေချင်ပါတယ်” ဟု အထက်ပါ အမျိုးသမီးက ပြောသည်။
တပ်မှူးဇနီးအနေဖြင့် လူမရှိချိန် နေအိမ်သော့ဖျက်ပြီး ပစ္စည်းယူဆောင်သွားခြင်းသည် အတင်းအဓမ္မ ခေါင်းပုံဖြတ်ခြင်း၊ ခိုးယူခြင်းဖြစ်ကြောင်း၊ လက်ရှိ ချေးငှားထားသည့် အမျိုးသမီး အကြွေးကို ဆပ်နေသည့် ကာလဖြစ်ကြောင်းလည်း ၎င်း၏ ဆွေမျိုးတော်စပ်သည့် သူက သျှမ်းသံတော်ဆင့်ကို ပြောသည်။
“ တပ်ရဲ့ အာဏာကို ယူပြီးတော့ လုပ်နေတာ။ အကြွေးတွေက မဆပ်တာမှ မဟုတ်တာ၊ ယူတာထပ် အခု အိမ်ထဲက ပစ္စည်းတွေက အကြွေးတွေထက် ပိုပြီး များနေပြီ၊ သယ်သွားတာ နည်းတာမဟုတ်ဘူး” ဟု ၎င်းက ဆက်ပြောသည်။
ခိုလမ်မြို့နယ်သည် စစ်ကောင်စီ အရှေ့အလယ်ပိုင်းတိုင်းစစ်ဌာနချုပ် တည်ရှိရာ နေရာဖြစ်သည်။
