သျှမ်းပြည် တောင်ကြီးခရိုင် ပင်လောင်းမြို့နယ် ကျေးလက်ဒေသမှ တိုက်ပွဲကြောင့် တောင်သူများ လက်ဖက် မခူးနိုင်သဖြင့်လက်ဖက်ဈေးတက်နေကြောင်း စုံစမ်းသိရှိရသည်။
စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ တိုက်ပွဲ ဖြစ်ပွားမှုကြောင့် ပင်လောင်းမြို့နယ် နမ်းနိန်း ၊ လုံးပျဉ်၊ တောင်မဲသင်း စသည့် ကျေးရွာ ၄ ရွာခန့်မှ ဒေသခံ တောင်သူများသည် လက်ဖက်ကို မခူးနိုင်ကြတော့သဖြင့် လက်ဖက်ထွက်နှုန်း လျော့နည်းသွားကာမှ ခူးပြီး လက်ကျန် လက်ဖက်များ ဈေးနှုန်းမြင့်တက်သွားကြောင်း ဒေသခံတောင်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲဖြစ်တဲ့ နေရာမှာတော့ လက်ဖက်ခူးဖို့ အဆင်မပြေဘူး။ တချို့တိုက်ပွဲ နဲ့ ဝေးတဲ့ ရွာတွေကလည်း ခြံက တောင်ပေါ်မှာဆိုတော့ သွားခူးရမှာ နည်းနည်းကြောက်ရတယ်။ သူများလည်း မပေးသွားဘူး။ တိုက်ပွဲဖြစ်တော့ တောင်သူတွေက လက်ဖက်ခူးဖို့ ကြောက်လည်းကြောက်ရ၊ လုံခြုံရေးလည်း စိုးရိမ်ရ နဲ့ လက်ဖက် မခူးနိုင်ဘူး။ လက်ဖက် မခူးနိုင်တော့ ရောင်းဖို့ လက်ဖက်က ရှားသွားတယ်။ အဲ့ကြောင့်လည်း ဈေးတက်သွားတယ် “ ဟု ၎င်းက ပြောသည်။
ယခင်က လက်ဖက်ခြောက် တစ်ပိဿကို ကျပ် (၄,၀၀၀) ထိ ဈေးနှုန်းရှိသော်လည်း တိုက်ပွဲဖြစ်ပွားပြီး နောက်ပိုင်း လက်ဖက်ခြောက် တစ်ပိဿလျှင် ကျပ် (၈,၀၀၀) ထိ ဈေးနှုန်းမြင့်တက် သွားကြောင်း သိရသည်။
ထို့အပြင် ပင်လောင်းမြို့နယ်အတွင်း တိုက်ပွဲ ဆက်လက်ဖြစ်ပွားနေပါက လက်ဖက်ဈေးနှုန်းသည် လက်ရှိ ပမာဏ ဈေးနှုန်းထက် ပိုမြင့်တက်လာနိုင်ဖွယ်ရှိကြောင်း လက်ဖက်ရောင်းဝယ်သူ အမျိုးသမီးတစ်ဦးက ထပ်လောင်းပြောသည်။
“ လက်ဖက် ဈေးကတော့ ဒီထက်တက်ဖို့ အလားလာရှိတယ်။ သိတဲ့အတိုင်းပဲ နိုင်ငံရေးက မကောင်းတော့ ဆန်၊ ဆီ၊ ဆားကအစ ဈေးတက်နေတယ်။ အဲ့ဒါတွေနဲ့လည်း သက်ဆိုင်တယ်။ အရင်က ဈေးမတက်ခင်တုန်းက ဆီဘူး သေးတစ်ဘူးကို ကျပ် (၁,၀၀၀) ကနေ (၁,၅၀၀) အထိပဲရှိတယ်။ အခုဆိုရင် အဲ့ဘူးသေး တစ်ဘူးကို (၄,၀၀၀) ကျော် (၅,၀၀၀) လောက်ရှိသွားပြီ “ ဟု ၎င်းအမျိုးသမီးတစ်ဦးက ပြောသည်။
အလားတူ လက်ဖက်ဈေးနှုန်း အဆမတန် မြင့်တက်သွားလျှင် စားသုံးသူ၊ သောက်သုံးသူ အနေဖြင့်လည်း ဝယ်ယူဖို့ရန် ခက်ခဲနေကြောင်း သိရသည်။
စစ်တပ်သည် နိုင်ငံတော်ကို အာဏာသိမ်းပြီးနောက် မြန်မာနိုင်ငံတွင် နိုင်ငံရေး မတည်မငြိမ်မှုကြောင့် စီးပွားရေး အဆမတန်ကျဆင်းလာခြင်း၊ ငွေကြေးဖောင်းပွလာခြင်းတို့ကြောင့် စက်သုံးဆီ၊ ကုန်ဈေးနှုန်းများလည်း ယခင်ထက် ဈေးနှုန်းမြင့်တက်လာနေကြောင်း သိရသည်။
Leave a Comments