Saturday, July 20, 2024

ပင်လောင်းမြို့နယ် လွယ်ကြိန်းဘုန်းကြီးကျောင်းမှ စစ်ရှောင် ၃၀၀ ကျော် အလှူရှင်မရှိ

Must read

သျှမ်းပြည် တောင်ကြီးခရိုင် ပင်လောင်းမြို့နယ် လွယ်ကြိန်းဘုန်းကြီးကျောင်းသို့ ရောက်ရှိနေသည့် စစ်ရှောင်ဦးရေ ၃၀၀ ကျော်အတွက် အလှူရှင် ပြတ်တောက်နေကြောင်း စုံစမ်းသိရှိရသည်။

စစ်ရှောင်များ

သျှမ်း – ကယား (ကရင်နီ) နယ်စပ် တိုက်ပွဲကြောင့် ပင်လောင်းမြို့နယ် လွယ်ကြိန်းဘုန်းကြီးကျောင်းသို့ ထွက်ပြေးတိမ်းရှောင်နေရသည့် စစ်ရှောင်ဦးရေ ၃၂၀ ကျော်အတွက် လက်ရှိမှာ စားနပ်ရိက္ခာထောက်ပံ့ပေးမည့်သူ မရှိ၊ ၃ လနီးပါးကြာ အလှူရှင်ပြတ်တောက်နေကြောင်း စစ်ရှောင် အမျိုးသမီးတစ်ဦး ကပြောသည်။

“ အဓိကတော့ စားဝတ်နေရေးတွေ လိုအပ်တာပေါ့။ ဆန်၊ ဆီ၊ ဆား တွေလိုအပ်တယ်။ အခုက အလှူရှင်မလာတာ ၃ လလောက်ရှိပြီ။ နေ့တိုင်းနေ့စား အလုပ်နဲ့ဘဲ ဖြတ်သန်းပြီး ရလာတဲ့နေ့စားခနဲ့ဘဲ ဝယ်စားရတယ်။ တချို့အသက်ကြီးတဲ့သူတွေက အလုပ်မလုပ်နိုင်တော့ နေ့စားမသွားနိုင်ဘူး။ သူတို့တွေတော့ တစ်ခါတလေ ဘုန်းကြီးကျောင်းက စွန့်ပေးတဲ့ဟာတွေဘဲ စားရတာပေါ့ “ ဟု ၎င်းက အမျိုးသမီးတစ်ဦးက ပြောသည်။

အဆိုပါ စစ်ရှောင်များကို ထောက်ပံ့ပေးနေသည့် အလှူရှင်များ ပြတ်တောက်သွားသောကြောင့် စစ်ရှောင်ဦးရေ ၃၀ ခန့်သည် ဘုန်းကြီးကျောင်းမှ လှုဒါန်းထားသော စားနပ်ရိက္ခာများကို စွန့်ပြီး စားသုံးနေရကြောင်း သိရသည်။

ထို့အပြင် ပင်လောင်းမြို့နယ်အတွင်း တိုက်ပွဲပြင်းထန်သည့် အချိန်ကာလမှာ ဒေသတွင်း သွားလာရန် ခက်ခဲနေသောကြောင့် အလှူရှင် ပြတ်တောက်သွားသည့် လွယ်ကြိန်းဘုန်းကြီးကျောင်းမှ စစ်ရှောင်စခန်းအပြင် ဗန်းမောက်ရွာရှိ စစ်ရှောင်များမှာလည်း စားနပ်ရိက္ခာ ထောက်ပံ့ပေးသူ အလှူရှင် လိုအပ်နေကြောင်း သိရသည်။

“ ဗန်းမောက်ရွာဘက်ကလည်း စစ်ရှောင်တွေ အများကြီးရောက်နေတယ်။ သူတို့လည်း အလှူရှင် မရှိဘူး။ စားနပ်ရိက္ခာတွေ၊ နေရာ အထိုင်အခင်းတွေ၊ ဆောင်တွေ အကူညီ အမျိုးမျိုး လိုအပ်နေတယ် “ ဟု လွယ်ကြိန်းဒေသခံ တစ်ဦးကပြောသည်။

လွယ်ကြိန်းဘုန်းကြီးကျောင်းသည် ပင်လောင်းမြို့ နှင့် ၂၅ မိုင် ကွာဝေးပြီး တိုက်ပွဲဖြစ်သည့် နမ့်နိန်းကျေးရွာ နှင့် တစ်တောင်ခြားထားကြောင်း သိရသည်။

ပြီးခဲ့သည့် (ဖေဖော်ဝါရီ ၂၄ ရက်) မှစပြီး စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်ဖွဲ့တို့၏ တိုက်ပွဲကြောင့် ဗန်းမောက်ကျေးရွာတွင် စစ်ရှောင်ဦးရေ ၇၀၀ ကျော် ရောက်ရှိနေကြောင်း သိရသည်။

ပင်လောင်းမြို့နယ်အတွင်း တိုက်ပွဲကြောင့် တောင်စလုံး၊ မြောက်စလုံး၊ လုံးပင်၊ ပျဉ်ပင်၊ နမ့်နိန်း နှင့် တောင်မဲသင်းရွာမှ ပြည်သူများ အိုးအိမ်စွန့်ပြီး ထွက်ပြေးတိမ်းရှောင်နေရကာ ပင်လောင်းမြို့နယ်မှာ စစ်ရှောင်ဦးရေ (၅,၀၀၀) ကျော်ရှိနေကြောင်း သိရသည်။

Leave a Comments

- Advertisement -spot_img

Latest article