သျှမ်းပြည် တောင်ကြီးခရိုင် ညောင်ရွှေမြို့နယ် အင်းလေး ဒေသအတွင်း စစ်ကောင်စီ၏ လုံခြုံရေး တင်းကြပ်စွာ ချမှတ်ထားသည့်ကြား နေအိမ်ပေါ်တက်ပြီး ဓားပြတိုက်မှု ဖြစ်ပွားခဲ့ကြောင်း စုံစမ်းသိရသည်။
ယမန်နေ့ (မတ် ၂၂) ရက် ည ၉ နာရီခွဲ ဝန်းကျင်တွင် အင်းလေးဒေသ ရွာကြီးထက်ရွာရှိ နေအိမ်တစ်လုံးကို အမည်မသိလက်နက်ကိုင် လူတစ်စုက မူးယစ်ဆေးဝါး စစ်ဆေးရန်ဟုဆိုကာ ဓားပြတိုက်သွားကြောင်း အသက် ၅၀ ကျော်အရွယ်ရှိ အင်းလေးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“မူးယစ်ဆေးဝါး စစ်ဆေးဖို့ အတွက်ဆိုပြီး Mask တပ်ထားတဲ့ အမျိုးသား ၇/၈ ယောက်လောက်က အိမ်ပေါ်ကို တက်လာတယ်၊ အိမ်သားအားလုံးကို သေနတ် နဲ့ ချိန်ပြီး စုနေခိုင်းတာ၊ အိမ်တွေကို မွေနှောက်ရှာပြီးတော့ ငွေသား (၃) သိန်း နဲ့ ရွှေစုစုပေါင်း (၂) ကျပ်သားလောက်ကို ဓါးပြတိုက်ယူ သွားတယ်၊ ကောင်လေး တစ်ယောက်ကိုလည်း ရိုက်နှက်ပြီး ဖမ်းသွားတယ်” ဟု အင်းလေးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
အဆိုပါ လက်နက်ကိုင် အုပ်စုသည် လူငယ် နှင့် လူလတ်ပိုင်း အရွယ်များသာ ဖြစ်ပြီး ရွှေအင်းတိမ် ဘုရားဘက်ရှိ ကုန်းလမ်းမှ တစ်ဆင့် ရွာကြီးထက်ရွာသို့ ရောက်ရှိလာပြီး ဓားပြတိုက်ယူသွားခြင်း ဖြစ်ကြောင်း သိရသည်။
ထို့အပြင် လက်နက်ကိုင် အုပ်စုတို့က ဗမာစကားသာ ပြောဆိုပြီး အင်းသံဝဲသူ နှင့် ပအိုဝ်းသံဝဲသူ တို့လည်း ပါရှိကြောင်း အထက်ပါ အမျိုးသမီးက ဆက်ပြောသည်။
“စကားပြောတာကတော့ ဗမာစကားပဲ၊ အင်းသံဝဲတဲ့သူ ပါတယ်၊ ပအိုဝ်းသံဝဲတဲ့သူ ပါတယ်၊ အိမ်ကို ဓါးပြတိုက်ပြီး ပြန်ဆင်းသွားတဲ့ အချိန်မှာလည်း တစ်လမ်းလုံး အော်ဟစ် ကြိမ်းမောင်းပြီး ပြောသွားတယ်၊ ရွာကိုပါ မီးရှို့ပစ်မယ် ဆိုပြီးတော့လည်း ခြိမ်းခြောက်သွားတယ်” ဟု ၎င်းက ဆိုသည်။
ဓားပြတိုက်မှု ဖြစ်ပွားသည့် ရွာကြီးထက်ရွာသည် စစ်ကောင်စီမှ ခန့်အပ်ထားသည့် ပြည်နယ် တိုင်းရင်းသား ရေးရာဝန်ကြီး ဦးအောင်ကြည်ဝင်း၏ ဇာတိရပ်ရွာဖြစ်သည့် အင်းပေါခုန် ကျေးရွာအုပ်စုမှ ဖြစ်နေကြောင်းလည်း သိရသည်။
နေအိမ်ခြိမ်းခြောက် ဓားပြတိုက်ခံရခြင်း နှင့် ပတ်သက်ပြီး အိမ်ရှင် မိသားစုဝင်များက ညောင်ရွှေမြို့ ရဲစခန်း နှင့် နန်းပန် ရဲစခန်းကို သွားရောက် တိုင်ချက်ဖွင့်ထားကြောင်း သိရသည်။
“အင်းလေးဒေသမှာက လက်နက်ကိုင်ပြီး ပါဝါ ပြနေတာဆိုလို့ စစ်ကောင်စီရဲ့ ပျူစောထီး နဲ့ PNO တွေပဲ ရှိတယ်၊ အခု ဒီဖြစ်စဥ်မှာ စစ်ကောင်စီ လက်အောက်ခံ ရဲက သူတို့လုပ်တာမဟုတ်၊ သူတို့ မသိဘူးလို့ ပြောကြတယ်။ တိုင်ချက်တော့ ဖွင့်ထားလိုက်တယ်” ဟု အထက်ပါ အမျိုးသမီးက သျှမ်းသံတော်ဆင့်ကို ဆက်ပြောသည်။
လက်ရှိ အင်းလေးဒေသ အဝင်အထွက်များကို စစ်ကောင်စီတပ်ဖွဲ့မှ တင်းကြပ်စွာ စစ်ဆေးနေပြီး ပေါင်းပိုင်းဂိတ်၊ မှော်ဘီဂိတ်၊ အင်းတိန်ဂိတ် နှင့် ဘုရားနီ၊ သန်းထောင်ကြားမှ စစ်ဆေးရေးတို့က စစ်သားများသည် အမျိုးသမီးများကို လိင်ပိုင်းဆိုင်ရာ ကာယိအိန္ဒြေ ကျူးလွန်မှု စစ်ဆေးမှုများလည်း ပြုလုပ်နေသည့် နေရာဖြစ်သည်။
