သျှမ်းပြည် ကျောက်မဲခရိုင် နမ့်လန်မြို့နယ်ခွဲ နမ့်လန် – ကျောက်ဂူ ကားလမ်းမပေါ်တွင် သစ်တုံးတင်လာသည့် ထော်လာဂျီတစ်စီး တိမ်းမှောက်ပြီး မောင်းနှင်လာသူ အမျိုးသားတစ်ဦး ပွဲချင်းပြီး သေဆုံးခဲ့ကြောင်း စုံစမ်း သိရှိရသည်။
ယနေ့ (မတ်လ ၂၃ ရက်) မနက်ပိုင်း ၁၁ နာရီခွဲ အချိန်မှာ နမ့်လန် – ကျောက်ဂူ သွားလမ်း တောင်ကြီး – ဖာရေးလမ်းခွဲအနီးရှိတွင်သစ်တုံးတင်လာသည့် ထော်လာဂျီတစ်စီး လမ်းဘေးမြောင်းထဲသို့ တိမ်းမှောက်သွားပြီး မောင်းနှင်လာသူ အမျိုးသားတစ်ဦး သေဆုံးသွားခဲ့ကြောင်း ဖြူစင်နှလုံးသား လူမှုကူညီရေး အသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။
“ ပရိတ်ပေါက်သွားတဲ့ ပုံစံလိုမျိုးဘဲ လမ်းမကြီးရဲ့ ဘယ်ဖက်မြောင်းထဲမှာ တိမ်းမှောက်သွားတာ။ မောင်းလာတဲ့ အမျိုးသားကတော့ ပွဲချင်းပြီး ဆုံးသွားတယ်။ သူက သစ်တုံးတွေ တင်လာပြီး နမ့်လန်မြို့ကို လာမယ်လို့တော့ သိရတယ် “ ဟု ၎င်းက ပြောသည်။
အဆိုပါ ယာဉ်တိမ်းမှောက်မှုကြောင့် သေဆုံးသွားခဲ့သည့် အမျိုးသားတစ်ဦးသည် အသက် ၄၀ နှစ် ဝန်းကျင် အရွယ်ရှိကြောင်း သိရသည်။
ထို့အပြင် ယာဉ်တိမ်းမှောက်မှု နှင့် ပတ်သက်ပြီး ပြည်သူများအနေဖြင့် ဆင်ခြင်မောင်းကြရန် နှင့် သတိထားပြီး မောင်းနှင်ပေးရန် ၎င်းက တိုက်တွန်းထားသည်။
နမ့်လန်တွင် ယာဉ်စည်းကမ်း၊ လမ်းစည်းလမ်း မလိုက်နာမှုကြောင့် မတော်မဆ ယာဉ်တိုက်မှုမှာ မကြာခဏ ဖြစ်ပွားလေ့ရှိနေပြီး ယခု (မတ်လ) အတွင်းမှာ ပထမဆုံးအကြိမ် ယာဉ်တိမ်းမှောက်မှုကြောင့် လူ ၁ ဦး သေဆုံးကြောင်း သိရသည်။
Leave a Comments