Sunday, May 26, 2024

ကွမ်လုံတံတားကို ယခုနှစ်အတွင်း ပြီးစီးအောင် ဆောက်လုပ်မည်

Must read

သျှမ်းပြည် လားရှိုးခရိုင် လားရှိုးမြို့နယ် ကွမ်လုံမြို့ရှိ ကွမ်လုံတံတားသစ်သည် ယခုနှစ် ၂၀၂၃ ခုနှစ် အတွင်း အပြီးအစီးဆောက်လုပ်မည် ဖြစ်ကြောင်း မြန်မာနိုင်ငံဆိုင်ရာ တရုတ်သံရုံး ထုတ်ပြန်ချက်အရ သိရသည်။

လက်ရှိ တည်ဆောက်နေတဲ့ ကွမ်လုံတံတား

ယင်းကဲ့သို့ ထုတ်ပြန်ကြေညာခြင်း နှင့် ပတ်သက်ပြီး သံလွင်မြစ် နှင့် တရုတ်ပြည်မှ နုကျန်းမြစ်သို့ကို ဆက်သွယ် ထားသည့် ကွမ်လုံ တံတားသည် မြန်မာ နှင့် တရုတ် အင်ဂျင်နီယာ ပူးပေါင်း ဆောက်လုပ်နေခြင်း ဖြစ်ပြီး ယခုနှစ် ၂၀၂၃ ခုနှစ် အတွင်း အပြီးဆောက်လုပ် ပြီးစီးမည် ဖြစ်ကြောင်း ဒေသအတွင်း တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ဒီ တံတားသစ်က မြန်မာ နဲ့ တရုတ် အင်ဂျင်နီယာ ပူးပေါင်းပြီးတော့ ဆောက်လုပ်ထားတာ ဖြစ်ပါတယ်၊ မြန်မာ နဲ့ တရုတ် နယ်စပ်ကုန်သွယ်ရေး လမ်းကြောင်းအတွက် အရေးပါတဲ့ လမ်းကြောင်း တစ်ခု ဖြစ်တာပေါ့၊ အခုမှာတော့ တံတားက ပြီးစီးသလောက် ဖြစ်နေပေမယ့် ဖြတ်သန်း သွားလာဖို့အတွက်တော့ အဆင်သင့် မဖြစ်သေးဘူး” ဟု အထက်ပါ တာဝန်ရှိသူက သျှမ်းသံတော်ဆင့်ကို ပြောသည်။

လက်ရှိတွင် သံလွင်မြစ် ဖြတ်သန်းရန်အတွက် လမ်းလွဲကြိုးတံတား တစ်ခု ရှိနေပြီး ကုန်တင်ကားကို တန်ချိန် အလိုက် အလှည့်ကျ ဖြတ်သန်းသွားလာနေရသည့်အတွက် အချိန် နှောင့်နှေးမှုများ ဖြစ်ပေါ်စေကြောင်းလည်း သိရသည်။

အဆိုပါ ကွမ်လုံ တံတားသည် သိန္နီ – ကွမ်လုံ – ချင်းရွှေဟော် လမ်းမကြီးအတွက် အဓိက အရေးပါသည့် နယ်စပ် လမ်းကြောင်း တစ်ခုဖြစ်သည့် အတွက် တံတားမြန်မြန် ပြီးစေလိုကြောင်းလည်း အဆိုပါ လမ်းပိုင်းတစ်လျှောက် ကားမောင်းသည့် ကားသမား တစ်ဦးက သျှမ်းသံတော်ဆင့်ကို ပြောသည်။

“ဒီ ကွမ်လုံ တံတားပြီးသွားရင်တော့ လားရှိုး – သိန္နီကနေ ကွမ်လုံ၊ ချင်းရွှေဟော်အထိ တိုက်ရိုက်မောင်းလို့ ရပြီ၊ အခုတော့ လမ်းလွဲ တံတားကနေပဲ မောင်းခွင့် ပြုထားတော့ တခါတလေ တန်းစီစောင့်ရပြီး အချိန်က ကြန့်ကြာမှု ရှိနေတယ်၊ ဒါကြောင့် ဒီတံတား အသစ်ကိုတော့ မြန်မြန်ပြီးရင် ကောင်းတယ်” ဟု ကားသမား တစ်ဦးက ဆိုသည်။

ကွမ်လုံ တံတားကြီး တည်ဆောက်သည့် စီမံကိန်းသည် ပြီးခဲ့သည့် ၂၀၂၀ ဒီဇင်ဘာလတွင် စတင်ခဲ့ခြင်း ဖြစ်ပြီး အရှည် ၄.၂ ကီလိုမီတာခန့်ရှိပြီး ၎င်း တံတားအရှည်သည် ၂၈၆ မီတာရှိကြောင်းလည်း သိရသည်။

ပြီးခဲ့သည့် မတ်လ ၇ ရက်မှ ၉ ရက်နေ့တွင် မြန်မာနိုင်ငံဆိုင်ရာ တရုတ်သံရုံး စီးပွားရေးသံမှူး Mr. Tan Shufu ကွမ်လုံတံတားအသစ် စီမံကိန်းအား သွားရောက်ကြည့်ရှု့ခဲ့ပြီး တရုတ် – မြန်မာ နယ်စပ် ကုန်သွယ်ရေး၊ ပိုးစာပင်စိုက်ကာ ပိုးကောင်မွေးမြူခြင်း၊ အသားစား နွားများ တရုတ်နိုင်ငံသို့ တင်ပို့ခြင်း၊ အစားထိုး စိုက်ပျိုးခြင်းစသည့် ပူးပေါင်းဆောင်ရွက်ရေး အခြေအနေများကို လေ့လာခဲ့ကြောင်း သိရသည်။

Leave a Comments

- Advertisement -spot_img

Latest article