သျှမ်းပြည် လွိုင်လင်ခရိုင် လဲချားမြို့ ရပ်ကွက် (၅) ဟိုရင်ကျေးရွာတွင် နေထိုင်သည့် အမျိုးငယ်တစ်ဦး (၄) ရက် ပြန်ပေးဆွဲခံရပြီးနောက် မန္တလေးမြို့တွင် ပြန်လည်တွေ့ရှိခဲ့ကြောင်း သတင်း သိရှိရသည်။
ပြီးခဲ့သည့် (မတ်လ ၁၉) ရက် နံနက်ပိုင်း ၁၀ နာရီကျော်တွင် မန္တလေး နေအိမ်တစ်လုံး၌ ပြန်ပေးဆွဲခံရသူ အသက် (၁၈) နှစ်ပြည့် နန်းထက်ထက်ဝင်း (ခ) နန်းယွတ်နွံ ကို ပြန်လည်ရှာတွေ့ခဲ့ကြောင်း ပြန်ပေးဆွဲခံရသည့် မိန်းကလေး၏ မိသားစုဝင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ မန္တလေး နေအိမ်တစ်လုံးမှာ သူများခေါ်ထားပေးလို့ ပြန်တွေ့တာ။ သူက အွန်လိုင်းပေါ်က အလုပ်ရှာရာကနေ ပြန်ပေးဆွဲခံရတာ။ အစက သူ့ကို အလုပ်လာခေါ်တယ်ဆိုပြီး သူက လိုက်သွားတာ။ အွန်လိုင်းပေါ်က ဘာသာပြန် အလုပ်ဆိုလားဘဲ။ အဲ့ကလူတွေက သူတို့ အလုပ်မှာ မခေါ်သွားဘဲ၊ မန္တလေးထိကို ပြန်ပေးဆွဲသွားတာ “ ဟု ၎င်းကပြောသည်။
အဆိုပါ ပြန်ပေးဆွဲခံရသည့် နန်းထက်ထက်ဝင်း (ခ) နန်းယွတ်နွံသည် လက်ရှိမှာ ကြောက်ရွံ့စိတ်၊ သိမ်ငယ်စိတ် ခံစားနေကြောင်းလည်း သိရသည်။
“ သူက စကားပြောနည်းတယ်။ တခြား နေရာဆိုလည်း ဘယ်မှ သိပ်မသွားဖူးဘူး။ အခု ပြန်ပေးဆွဲခံရတော့ သိမ်ငယ်စိတ်တွေ ဝင်နေတယ်။ သူ့ကို အလုပ်လာခေါ်မယ်လို့ဘဲ ပြောတယ်။ သူ့ကိုဘာမှ မေးလို့မရသေးဘူး။ များများမေးရင် မျက်ရည်ဝဲပြီး ငိုတော့မလိုလို ဖြစ်နေတာ “ ဟု ၎င်းက ပြောသည်။
ထို့အပြင် ပြန်ပေးဆွဲမှု နှင့် ပတ်သက်ပြီး အလုပ်လုပ်ချင်သူ လူငယ်များ အပါအဝင် အွန်လိုင်းပေါ်မှ အလုပ်ရှာဖွေနေသည့် သူများအနေဖြင့် အွန်လိုင်းပေါ်မှ အလုပ်တစ်ခုကို လျှောက်မည်ဆိုပါက သေချာ စုံစမ်းမေးမြန်းစေလိုကြောင်း၊ ပိုက်ဆံတစ်ခုတည်းသာအတွက် မစဉ်းစားစေချင်ကြောင်း ၎င်းက တိုက်တွန်းထားသည်။
စစ်တပ်က အာဏာသိမ်းပြီး ၂ နှစ်ကျော် ကာလအတွင်းမှာ ပညာရေး၊ စီးပွားရေး၊ အလုပ်အကိုင် အခွင့်အလမ်းများ ရှားပါးလာသည့်အတွက် လူငယ်များသည် အလုပ်ရှာဖွေရာကနေ အွန်လိုင်းပေါ်မှ တစ်ဆင့် ဆက်သွယ်ပြီး အလုပ်ရှာခြင်း၊ အိမ်နီးချင်း နိုင်ငံ ထိုင်း၊ တရုတ် စသည့် နိုင်ငံတို့ကို သွားရောက် အလုပ်လုပ်ကိုင် ကြသည်။
Leave a Comments