သျှမ်းပြည် ကွတ်ခိုင် – နမ့်ဖက်ကာ – မူဆယ် မှ မန္တလေးဆင်းသည့် ကားလမ်းတလျောက်တွင် လက်နက်ကိုင်တပ်ဖွဲ့ များသည် ကားသမားများထံ ဆက်ကြေး (အခွန်) အများအပြား ကောက်ယူမှုကြောင့် ကားတချို့ ရပ်နားလိုက်ရကြောင်း သတင်းသိရသည်။

နမ့်ဖတ်ကာ – ကွတ်ခိုင်ကြားရှိ ရှု့ခင်းသာအနီး နှင့် မူဆယ် – မန္တလေး လမ်းမကြီး တလျောက်တွင် ကချင်လွတ်မြောက်ရေး တပ်မတော်( KIA)၊ တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် စစ်ကောင်စီတပ်ဖွဲ့များသည်ကားသမားများထံ ဆက်ကြေးကောက်ယူမှုများရှိကြောင်း ဒေသခံ ကားသမားများ ပြောပြချက်အရ သိရသည်။

“အခုချိန်က ကုန်ဈေးနှုန်းတွေရော၊ ဆီဈေးနှုန်းတွေရော တက်တယ်၊ ကားတစ်ခေါက်ထွက်ရင် ကုန်က နည်းနည်း နဲ့ လမ်းမှာပေးရတဲ့ အခွန်တွေက အရမ်းများတော့ အရင်းမကိုက်ဘူး၊ အဲ့ကြောင့် တချို့ကားသမား တွေက ကားမထွက်တော့ဘဲ နားလိုက်တော့တယ်” ဟု အဆိုပါ လမ်းပိုင်း ကားမောင်းသည့် ကားသမားက သျှမ်းသံတော်ဆင့်ကို ပြောသည်။

နမ့်ဖက်ကာ – ကွတ်ခိုင်ကြား ရှု့ခင်းသာတွင် စောင့်နေသည့် KIA တပ်ဖွဲ့သည် ကုန်တင် (၆) ဘီးကား တစ်စီးကို မြန်မာငွေ ၂ သိန်းကျပ် တောင်းယူနေသည့် အကြောင်းလည်း အထက်ပါ ကားသမားက သျှမ်းသံတော်ဆင့်ကို ပြောသည်။

“သူတို့ (KIA) စောင့်နေတဲ့ ရှု့ခင်းသာနား မရောက်ခင်မှာ ကျနော့် ကားလာနေတယ်၊ ကားနံပါတ် ဘယ်လောက်၊ ဘယ်လိုကားမျိုးလဲ ဆိုပြီးတော့ သူတို့ကို အရင်ဖုန်းဆက်ပြောရတယ်၊ ဖုန်းဆက်မပြောရင် သူတို့က ပိုတောင်းတယ်၊ ဥပမာ ၂ သိန်းပေးရမယ့်ကားကို ၂ ဆ/၃ ဆ အဲ့လို တိုးတောင်းတာရှိတယ်၊ ၆ ဘီးကို ၁ သိန်းခွဲကနေ ၂ သိန်းထိ တောင်းတယ်”ဟု အထက်ပါ ကားသမားက ပြောသည်။

ထို့အပြင် အဆိုပါ လမ်းပိုင်းတစ်လျှောက်ရှိ TNLA တပ်ဖွဲ့ကလည်း ကုန်တင်ကားတစ်စီးကို ၅ သောင်းကျပ် မှ စတင်ကာ ၃ သိန်း အထိ ဆက်ကြေး ကောက်ယူတောင်းခံမှုများရှိနေကြောင်းလည်း ကားသမားများက ပြောဆိုနေကြသည်။

ထို့အပြင် မြို့ဝင်၊ မြို့ထွက် နေရာများ နှင့် စစ်ကောင်စီ စစ်ဆေးရေး ဂိတ်ရှိသည့် နေရာများမှာလည်း ထပ်မံပိုက်ဆံ ပေးဆောင်ရသည့်အတွက် ကားသမားများသည် ကုန်ပေါက်များနေပြီး အမြတ်မကျန်သဖြင့် ကားများ ရပ်နားရကြောင်း သိရသည်။

“တချို့က ကားမထွက်နိုင်တော့လို့ ကားကို ရပ်လိုက်ပြီး ကြုံရာ အလုပ်နဲ့ မိသားစုဝန်ကို ဖြေရှင်းနေတာရှိတယ်၊ တချို့ကလည်း လုံးဝ အလုပ်လက်မဲ့ဖြစ်ပြီး မိသားစုကိုပဲ ပြန်မှီခိုရတာမျိုးတွေ ရှိတယ်၊ တော်တော်များများ ခက်ခဲကြတယ်၊ လက်နက်ကိုင်တပ်ဖွဲ့တွေကိုပြောချင်တာက မကောက်နဲ့ မဟုတ်ဘူး၊ ဒါပေမဲ့ ကားသမားတွေကိုလည်း ငဲ့ညှာပြီး အများကြီး မကောက်ဖို့ တောင်းဆိုချင်တယ်” ဟု မူဆယ် – မန္တလေး ကားမောင်းသည့် အသက် ၄၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကားမောင်း ရပ်နားရသည့် ကားသမားများ တချို့သည် အလုပ်လက်မဲ့ဖြစ်ပြီး အခက်အခဲ ရင်ဆိုင် ကြုံတွေ့နေရသည့် အတွက် ကားသမားများ ကားပြန်ထွက်နိုင်ရန် လက်နက်ကိုင် တပ်ဖွဲ့များ အခွန်ကောက်ယူမှု လျှော့ပေါ့စေလိုကြောင်း ကားသမားများက တောင်းဆိုနေကြသည်။