သျှမ်းပြည် လွိုင်လင်ခရိုင် လဲချားမြို့ ရပ်ကွက် (၅) ဟိုရင်ကျေးရွာတွင် နေထိုင်သည့် အမျိုးသမီးငယ်တစ်ဦး ပြန်ပေးဆွဲခံနေရကြောင်း စုံစမ်းသိရှိရသည်။
ဖြစ်စဉ်မှာ ယမန်နေ့ (မတ်လ ၁၅ ရက်) မနက် ၈ နာရီ အချိန်မှစပြီး ၎င်း အမျိုးသမီးငယ်တစ်ဦး နေထိုင်သည့် ဟိုရင်ရွာ နေအိမ်အနီးရှိ ဟိုနောင်လုံကန်တွင် အမျိုးသား (၂) ဦး နှင့် အမျိုးသမီး (၁) ဦးတို့သည် သူမကို Surf (ခဲရောင်) ကားအမျိုးအစားဖြင့် လာရောက်ခေါ်ဆောင်သွားခဲ့ကြောင်း ပြန်ပေးဆွဲခံရသည့် မိန်းကလေး၏ မိသားစုဝင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ မနေ့ မနက်အစောပိုင်းတုန်းက နေအိမ် အနီးနားမှာ ကားနဲ့ လာခေါ်သွားတာ။ ထမင်းစားနေရင်း တန်းလန်းထပြီး သူကလိုက်သွားတယ်လို့ ပြောတယ်။ လာခေါ်သွားတာတော့ အမျိုးသား (၂) ယောက်နဲ့ အမျိုးသမီး ၁ ယောက် ပါတယ်။ ကားပေါ်ကို တက်တက်ချင်း ဖုန်းပိတ်လိုက်တယ်လို့ အဲ့ အနီးနားက တွေ့တဲ့သူတွေ ပြန်ပြောပြတယ်။ သူလည်း ဖုန်းနဲ့ မှတ်ပုံတင် နှစ်ခုဘဲ ယူသွားတာ။ ဘာအဝတ်အထည်၊ ပစ္စည်းမှ ယူမသွားဘူး “ ဟု ၎င်းက ပြောသည်။
အဆိုပါ ပြန်ပေးဆွဲခံရသည့် အမျိုးသမီးတစ်ဦးသည် အသက် ၁၈ နှစ်ပြည့် နန်းထက်ထက်ဝင်း (ခ) နန်းယွတ်နွံ ဖြစ်ကြောင်းလည်း သိရသည်။
ထို ပြန်ပေးဆွဲ သွားပြီးနောက် ယနေ့ (မတ်လ ၁၆ ရက်) နံနက်အစောပိုင်းမှာ အသက် (၅၀) အရွယ်ခန့် အမျိုးသားတစ်ဦးသည် နန်းထက်ထက်ဝင်း (ခ) နန်းယွတ်နွံကို ခေါ်ဆောင်ထားကြောင်းသိရသည်။
“ဒီနေ့ အစောပိုင်းက အမျိုးသားတစ်ယောက် ဖုန်းဆက်လာတယ်။ လေသံကတော့ အသက် (၅၀) အရွယ်လောက်ရှိမယ်လို့ ခန့်မှန်းလို့ ရတယ်။ “ဒီကလေးမနဲ့ ဘာတော်လဲ။ ဒီကလေးကို ငါခေါ်ထားတယ်၊ လိုချင်လား ” လို့ မေးလာတယ်။ ကျမလည်း ပြန်လိုချင်တာပေါ့ပြောတော့ “ အဲ့ဆိုနေရာချိန်းမယ်၊ နင်တို့လာခေါ်လိုက် “ဆိုပြီးပြောတယ်။ အဲ့ဆို ဒီကလေး နဲ့ စကား (တစ်ခွန်း၊ နှစ်ခွန်း) ပြောလို့ရလားဆိုတော့ ကျမတို့ကို ပြန်ဆဲဆိုပြီး “ငါသတင်းပို့တာတောင်မှ ကျေးဇူးတင်ရအုံးမယ် “ ပြောပြီး ဖုန်းချသွားတယ် “ ဟု ၎င်းက ပြောသည်။
အဆိုပါ ဖုန်းဆက်ပြောဆိုလာသူသည် ရိုင်းစိုင်းစွာ သုံးနှုန်းပြီး ပြောဆိုခဲ့သည်။
လက်ရှိမှာ နန်းထက်ထက်ဝင်း (ခ) နန်းယွတ်နွံကို အမျိုးသားတစ်ဦးက ပြန်ပေးဆွဲထားကြောင်း သိရှိရထားပြီး ၎င်း၏ မိသားစုဝင်များကလည်း အသက် အန္တရာယ်အတွက် စိုးရိမ်နေရကြောင်း သိရသည်။
ထို့အပြင် နန်းထက်ထက် (ခ) နန်းယွတ်နွံ ပျောက်ဆုံးမှုနှင့် ပတ်သက်ပြီး သက်ဆိုင်ရာ တိုင်း နှင့် ပြည်နယ် ရဲတပ်ဖွဲ့များ အပြင် လက်နက်ကိုင် တပ်ဖွဲ့များကိုလည်း တိုင်ကြားထားကြောင်း သိရသည်။
ပြန်ပေးဆွဲခံရသည့် အသက် (၁၈) နှစ်ပြည့် နန်းထက်ထက်ဝင်း (ခ) နန်းယွတ်နွံသည် အထက်တန်းကျောင်း ပြီးဆုံးခဲ့သူ ဖြစ်သလို တရုတ်ဘာသာစကားကိုလည်း ကျွမ်းကျင်တတ်မြောက်ထားသူဖြစ်ပြီး ပြန်ပေးဆွဲခြင်းသည် အွန်လိုင်းမှတစ်ဆင့် အလုပ်အကိုင် ရှာဖွေရာကနေ ပြန်ပေးဆွဲခြင်း ခံခဲ့ရကြောင်း ၎င်း၏ မိသားစုဝင် က ယူဆထားကြသည်။
စစ်တပ်က အာဏာသိမ်းပြီးနောက် သျှမ်းပြည်တွင် အလုပ်အကိုင် အခွင့်အလမ်း ရှားပါးလာရာ လူငယ်များသည် အွန်လိုင်းပေါ်မှ တစ်ဆင့် အလုပ်ရှာဖွေခြင်းမှ “ ဝ “ ဒေသဖြစ်သည့် လောက်ကိုင်၊ ပန်ဆန်း စသည့်မြို့ကြီးများမှာ လူကုန်ကူးမှုခံရခြင်း အများအပြားရှိခဲ့ကြောင်း သိရသည်။
