သျှမ်းပြည် တောင်ကြီးခရိုင် ပင်လောင်းမြို့နယ်ရှိ ကျေးရွာများသည် စစ်ဘေးရှောင်များကို လက်မခံရန် ကျေးရွာ အုပ်ချုပ်ရေးမှူးများက အစည်းဝေး ခေါ်ဆောင်ခဲ့ကြောင်း သတင်းရရှိသည်။

ယမန်နေ့ (မတ် ၁၄) ရက်တွင် ပင်လောင်းမြို့နယ် ထီးပေါင်းကျေးရွာအုပ်စုထဲရှိ ကျေးရွာများကို စစ်ဘေးရှောင်များ လက်မခံရန်မှာကြားပြီး အစည်းဝေးခေါ်ယူခဲ့ကြောင်း သိရသည်။

“ ရွာနာမည်တော့ ကျနော်လည်း မပြောတော့ဘူး။ ကျနော်တို့ နေတဲ့ရွာမှာတော့ မနေ့က အစည်းဝေးခေါ်တယ်။ စစ်ဘေးရှောင်တွေ လာရင်လည်း ထပ် လက်မခံဖို့ပြောတယ်။ မိဘက လွှဲပြီးတော့ မလက်ခံရဘူးပေါ့။ ဆွေမျိုးတွေတောင် ထပ်လက်မခံခိုင်းဘူး” ဟု အမည် နှင့် နေရာ မဖော်လိုသည့် ဒေသခံတစ်ဦးက သျှမ်းသံတော်ဆင့်ကို ပြောသည်။

ထိုအပြင် စစ်ဘေးရှောင်များထဲမှ ပအိုဝ်းတိုင်းရင်းသားများအပြင် တခြားလူမျိုးများကိုလည်း လက်မခံရန်အတွက် ပြောဆိုခဲ့ကြောင်းသိရသည်။

သို့သော် ပင်လောင်းမြို့ပေါ် နှင့် တခြားဒေသများထဲတွင် စစ်ဘေးရှောင်များကို ဆက် လက်ခံနေဆဲရှိကြောင်း ပင်လောင်းမြို့နယ် စစ်ဘေးရှောင်များကို ကူညီပေးသည့်သူက ပြောသည်။

“ကျနော်တို့ဘက်တော့ ဘာမှမကြားရသေးဘူး။ စစ်ဘေးရှောင်တွေကို မကူညီရဘူးလို့လည်း ပြောလာတာ မရှိဘူး။ အခုချိန်ထိတော့ ဆက် လက်ခံပေးနေတာတော့ ရှိပါတယ်။ ကျနော်တို့လည်း စစ်ဘေးရှောင်တွေ ရှိတဲ့နေရာမှာ သွားပြီးတော့ ကူညီပေးနေပါသေးတယ်။ လက်မခံနဲ့တော့ မပြောလာသေးဘူး”ဟု ၎င်းက ပြောသည်။

ပင်လောင်းမြို့နယ်ထဲတွင် ယခင်က ရှောင်လာသည့် စစ်ဘေးရှောင် နှင့် လက်ရှိ အသစ်ထပ်မံ ရောက်ရှိလာသည့် စစ်ဘေးရှောင်စုစုပေါင်း ၈ ထောင် ဝန်းကျင်ရှိကြောင်း စစ်ဘေးရှောင် ကူညီသူများထံ သိရှိရသည်။

အဆိုပါ စစ်ဘေးရှောင်များကို လက်မခံသည့် ဒေသများသည် စစ်ကောင်စီ နှင့် ပူးပေါင်းပြီး အာဏာကို မက်မောနေသူများ ဖြစ်ကြောင်း၊ လူမျိုးတမျိုး၏ ဂုဏ်သိက္ခာကို ကျဆင်းစေကြောင်း၊ ထိုလုပ်ရပ်ကို ပြန်ဆန့်ကျင်သင့်ကြောင်း ကရင်နီ လူ့အခွင့်ရေးအဖွဲ့ ကိုဗညားက သျှမ်းသံတော်ဆင့်ကို ပြောသည်။

“ဘယ်ဒေသက စစ်ဘေးရှောင်တွေကို ဖြစ်စေ လက်မခံခြင်းဟာ ကျနော်တို့ လူမျိုးတစ်မျိုးရဲ့ ဂုဏ်သိက္ခာကိုလည်း ထိစေတယ်။ အဲ့ကြောင့်မို့ အဲ့ဒေသမှာရှိတဲ့ လူမျိုးစု အားလုံး အဲ့လုပ်ရပ်ကို ပြန်ပြီးဆန့်ကျင်ဖို့ လိုအပ်တယ်။ ဒါတွေကတော့ ကိုယ့်ဘာသာတွေနဲ့ ညီရဲလားလို့ ပြန်မေးရမှာဖြစ်တယ်။ ဒါကတော့ ကျနော့်အနေ နဲ့ စစ်လော်ဘီရဲ့ လုပ်ရပ်တစ်ချို့ပဲ ဖြစ်တယ်လို့ မြင်တယ်” ဟု ကိုဗညားက ပြောသည်။

ယနေ့ (မတ် ၁၅) ရက် နံနက် ၉ နာရီတွင် ပင်လောင်းမြို့နယ် နမ့်နိန်းကျေးရွာရှိ ဘုန်းကြီးကျောင်းမှ ဘုန်းကြီးအပါအဝင် အရပ်သားများ အစုလိုက် အပြုံလိုက်သတ်သည့် ကိစ္စကို စစ်ကောင်စီလက်အောက်ခံ ပအိုဝ်းပြည်သူ့စစ် (PNA) မှ ကရင်နီ ပြည်သူ့ကာကွယ်ရေးတပ်ဖွဲ့ (KNDF) လက်ချက်ဟု စွပ်စွဲပြောဆိုပြီး ဆန္ဒပြခဲ့သည်။

ထို့ပြင် စစ်ကောင်စီ လက်အောက်ခံ PNO/PNA တပ်ဖွဲ့တို့သည်လည်း KNDF ၊ PDF တို့ကို အလိုမရှိကြောင်း ဆန္ဒပြခဲ့ကြသည်။