သျှမ်းပြည် တောင်ကြီးခရိုင် ပင်လောင်းမြို့နယ် နမ့်ဟူးကျေးရွာ ပရဟိတ ဘုန်းကြီးကျောင်းအတွင်းသို့ ခိုလှုံနေသည့် စစ်ရှောင်များ နေရာအထိုင်အခင်း နှင့် စောင်များ လိုအပ်နေကြောင်း သတင်းသိရှိရသည်။
စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲကြောင့် အိုးအိမ်စွန့်ပြီး နမ့်ဟူးကျေးရွာ ပရဟိတ ဘုန်းကြီးကျောင်းအတွင်းသို့ ထွက်ပြေးတိမ်းရှောင်နေရသည့် စစ်ရှောင် ဦးရေ ၁၀၀ ကျော်သည် လက်ရှိမှာ နေရာ အထိုင်အခင်းနှင့် စောင်များ လိုအပ်နေကြောင်း ပင်ပုံစစ်ရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ အခု စောင်တွေ၊ ခေါင်းအုံးတွေ၊ အခင်းတွေ လိုတယ်။ တချို့က တစ်ယောက်ကို စောင်တစ်ထည်ဘဲ ပါလာတယ်။ တချို့ ၃ ယောက် မိသားစုတွေလည်း စောင် ၂ ထည်ဘဲပါလာတယ်။ ညဘက်အိပ်ရင် အခင်းတွေ မလုံလောက်တော့ အေးတယ်။ အေးတဲ့အခါကျတော့ ကလေးငယ်တွေလည်း ချောင်းဆိုးတယ်။ ကလေးနဲ့ အဖွားတွေ ကျန်းမားရေး ထိခိုက်တယ် “ ဟု ၎င်းစစ်ရှောင်အမျိုးသမီးတစ်ဦးက ပြောသည်။
အဆိုပါ နေရာ အထိုင်အခင်း နှင့် စောင်များ မလုံလောက်မှုကြောင့် ၅ နှစ်အောက် ကလေးငယ် ၁၅ ဦးသည် ချောင်းဆိုး၊ အအေးမိ ဖျားနာနေကြကြောင်းလည်း သိရသည်။
ထို့အပြင် ပင်လောင်းမြို့နယ်အတွင်းမှာ တိုက်ပွဲဖြစ်ပွားချိန်မှစပြီး နေအိမ်များ မိးရှို့ခံရခြင်း၊ သတ်ဖြတ်ခံရခြင်းကြောင့် လက်ရှိမှာ စစ်ရှောင်များအနေဖြင့် စိုးရိမ်သောက ပူပန်ခြင်း ခံစားနေရကြောင်း အသက် ၅၀ နှစ် စစ်ရှောင် အမျိုးသမီးတစ်ဦးက ပြောသည်။
“ နေအိမ်မီးရှို့ ခံရတာ၊ သတ်ဖြတ်ခံရတာ ခံစားရတာပေါ့။ သူများဘယ်လောက်ဘဲ အကူညီပေးနေ ကိုယ့်ရွာ၊ ကိုယ့်ဒေသလောက် မမူဘူး။ ကိုယ့်ရွာ၊ ကိုယ့်ဒေသမှာ ပျော်ပျော်ပါးပါး နဲ့ နေရတယ်။ အခုမှ သူများတွေ စားစရာ၊ နေရာပေးလည်း စိတ်မချမ်းသာဘူး။ တချို့မိဘတွေကိုလည်း သနားတယ်၊ ဘာမှ မကူညီနိုင်ခဲ့ဘူး။ ကိုယ့်အတွက်နဲ့ ရုန်းကန်ပြီး ပစ္စည်းတွေ သယ်လာရတယ် “ ဟု ၎င်းစစ်ရှောင်အမျိုးသမီးတစ်ဦးက ပြောသည်။
ပြီးခဲ့သည့် (ဖေဖော်ဝါရီ ၂၄ ရက်) မှစပြီး ပင်လောင်းမြို့နယ်အတွင်း တိုက်ပွားဖြစ်ပွားရာ မြောက်စလုံး၊ တောင်စလုံး၊ လုံးပျဉ်၊ ပုံပင်၊ နမ့်နိန်း၊ တောင်မဲသင်း စသည့်ကျေးရွာမှ ပြည်သူ (၆,၀၀၀) ဝန်းကျင်မှာ ထွက်ပြေး တိမ်းရှောင်နေရကြောင်း သိရသည်။
