ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တပ်ဖွဲ့ နှင့် မြောက်ပိုင်းမဟာမိတ် တပ်ဖွဲ့ဝင် တချို့တို့သည် “ဝ” တပ်ဖွဲ့ UWSA ထိန်းချုပ်ရာ ပန်ဆန်းမြို့တွင် တွေ့ဆုံဆွေးနွေးမှု ပြုလုပ်နေကြောင်း သတင်းသိရသည်။
ယခု ရက်သတ္တပတ်အတွင်းတွင် သျှမ်းပြည် ပန်ဆန်းမြို့၌ ရှမ်းပြည်တိုးတက်ရေးတပ်မတော် SSPP နှင့် မြောက်ပိုင်း မဟာမိတ် တပ်ဖွဲ့ဝင် တချို့တို့က တွေ့ဆုံခြင်း ဖြစ်ကြောင်း သိရသည်။
ယင်းကဲ့သို့ တွေ့ဆုံဆွေးနွေးမှု နှင့် ပတ်သက်ပြီး SSPP/SSA ၏ ပြောရေးဆိုခွင့် ရှိသူကို ဆက်သွယ်မေးမြန်းရာ မဟာမိတ်ကြား ဆက်ဆံရေး မြှင့်တင်ရန်အတွက် ဆွေးနွေးမှု လုပ်ဆောင်နေခြင်းဖြစ်ကြောင်း ပြောရေးဆိုခွင့် ရှိသူ ဗိုလ်မှူး ဖုန်းဟန်က သျှမ်းသံတော်ဆင့်ကို ပြောသည်။
“ကျနော်တို့ ကိုယ်စားလှယ်အဖွဲ့ ပန်ဆန်း ရောက်နေတာက ဟုတ်ပါတယ်၊ မဟာမိတ် အချင်းချင်းကြား ဆက်ဆံရေး မြှင့်တင်ဖို့အတွက် ဆွေးနွေးနေတာလို့ပဲ ကျနော်ပြောနိုင်သေးတယ်၊ FPNCC က အစည်းအဝေးတော့ မဟုတ်ဘူး” ဟု ဗိုလ်မှူး ဖုန်းဟန်က သျှမ်းသံတော်ဆင့်ကို ပြောသည်။
မြောက်ပိုင်း မဟာမိတ် လက်နက်ကိုင် တပ်ဖွဲ့တချို့တို့မှ ပန်ဆန်းတွင် တွေ့ဆုံခြင်းသည် FPNCC အနေဖြင့် ကျင်းပပြုလုပ်သည့် တွေ့ဆုံမှု မဟုတ်ကြောင်းလည်း ဗိုလ်မှူး ဖုန်းဟန်က ပြောသည်။
SSPP/SSA တပ်ဖွဲ့နှင့်အတူ တွေ့ဆုံဆွေးနွေးမှု၌ ပါဝင်သည့် တပ်ဖွဲ့များကို မေးမြန်းရာ၌ ဆွေးနွေးမှု ပြီးမှ ပြောနိုင်မည် ဖြစ်ကြောင်း ၎င်းက ဆက်ဆိုသည်။
“ကျနော်တို့ တပ်ဖွဲ့ နဲ့အတူ ဘယ်တပ်ဖွဲ့တွေ ပါလဲ ဆိုတာကိုတော့ မပြောနိုင်သေးပါဘူး၊ တခြား မဟာမိတ်တွေရဲ့ သဘောထားလည်း ဘယ်လိုရှိလဲ ဆိုတာ ရှိအုံးမယ်လေ၊ တွေ့ဆုံဆွေးနွေးမှုပြီးမှပဲ ပြောနိုင်မှာပါ” ဟု ဗိုလ်မှူးဖုန်းဟန်က သျှမ်းသံတော်ဆင့်ကို ပြောသည်။
အဆိုပါ တွေ့ဆုံဆွေးနွေးမှုတွင် မြောက်ပိုင်း မဟာမိတ် တပ်ဖွဲ့ဝင် (၇) ဖွဲ့မှ တပ်ဖွဲ့တချို့ ပါဝင်ကြောင်း သတင်း သိရသော်လည်း ပါဝင်သည့် တပ်ဖွဲ့များကို သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိသေးပေ။
မြောက်ပိုင်း မဟာမိတ်တပ်ဖွဲ့ EAOs (၇) ဖွဲ့တွင် “ဝ”ပြည် သွေးစည်း ညီညွှတ်ရေးပါတီ (UWSA) ၊ အမျိုးသားဒီမိုကရက်တစ် မဟာမိတ်တပ်မတော် (NDAA)၊ ရက္ခိုင့်တပ်တော် (AA) ၊ တအာင်း (ပလောင်) အမျိုးသား လွတ်မြောက်ရေး တပ်မတော် (TNLA)၊ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ၊ ကချင်လွတ်မြောက်ရေး တပ်မတော် (KIA) နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ ပါဝင်ကြောင်း သိရသည်။
တရုတ် အထူးသံတမန် မစ္စတာ ဆွန်ကော့ရှန် နေရာကို ဆက်ခံနေသည့် မစ္စတာ တိန့်ရှီးဂျွန်း သည် ပြီးခဲ့သည့် ၂၀၂၂ ခုနှစ် ဒီဇင်ဘာလတွင် တစ်ကြိမ်၊၂၀၂၃ ခုနှစ် ဖေဖော်ဝါရီလ နှောင်းပိုင်းတွင် တစ်ကြိမ် တရုတ်နယ်စပ် တလျှောက်ရှိ တိုင်းရင်းသားလက်နက်ကိုင်များ နှင့် သီးခြား တွေ့ဆုံမှုအပြီး ယခုလို မြောက်ပိုင်းမဟာမိတ် တိုင်းရင်းသား လက်နက်ကိုင်တပ်ဖွဲ့တချို့က တွေ့ဆုံခဲ့ခြင်း ဖြစ်သည်။
သျှမ်းပြည် အခြေစိုက် နိုင်ငံရေး လေ့လာသုံးသပ်သူများက မြောက်ပိုင်း မဟာမိတ် တပ်ဖွဲ့တချို့ တွေ့ဆုံ ဆွေးနွေးခြင်း သည် တရုတ် အထူးကိုယ်စားလှယ် နှင့် တွေ့ဆုံဆွေးနွေးရန် ကြိုတင်ဆွေးနွေးမှုများ ပြုလုပ်ခြင်း ဖြစ်နိုင်ကြောင်း သုံးသပ်ပြောဆိုထားသည်။
မြောက်ပိုင်း တိုင်းရင်းသား လက်နက်ကိုင်တပ်ဖွဲ့ဝင်တချို့ တွေ့ဆုံဆွေးနွေးမှု လုပ်နေသည့် ပန်ဆန်းသည် စစ်အင်အား ၃ သောင်းကျော် ရှိသည့် ‘ဝ’ ပြည် သွေးစည်းညီညွတ်ရေးတပ်မတော် (UWSA) ၏ ထိန်းချုပ်ထားသော မြို့လည်း ဖြစ်သည်။
