သျှမ်းပြည် တောင်ကြီးခရိုင် ပင်လောင်းမြို့နယ် နမ့်နိမ့်ရွာကို စစ်ကောင်စီတပ်ဖွဲ့မှ လက်နက်ကြီး၊ လက်နက်ငယ် သာမက လေကြောင်းဖြင့်ပါ ပစ်ခတ်တိုက်ခိုက်သောကြောင့် ဘုန်းကြီးကျောင်းအပါအဝင် အိမ်ခြေ တစ်ဝက်နီးပါး မီးလောင်ပျက်စီးဆုံးရှုံးသွားကြောင်း သတင်းသိရှိရသည်။
ယမန်နေ့ (မတ်လ ၁၁ ရက်) နံနက်အစောပိုင်း ၅ နာရီမှစပြီး ပင်လောင်းမြို့နယ် နမ့်နိမ့်ရွာတွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့တိုက်ပွဲဆက်လက်ပြင်းထန်ခဲ့ပြီး စစ်ကောင်စီတပ်ဖွဲ့မှ လက်နက်ကြီး လက်နက်ငယ် သာမက လေကြောင်းဖြင့်ပါ ပစ်ခတ်တိုက်ခိုက်သည့်အပြင် ဒေသခံ နေအိမ်များ မီးရှို့ပျက်စီးခံရကြောင်း ဒေသခံအုပ်ချုပ်ရေးမှူးတစ်ဦး၏ ပြောချက်အရသိရသည်။
နမ့်နိမ့်ရွာသည် အိမ်ခြေ စုစုပေါင်း ၃၅၀ ခန့်ရှိပြီး လက်ရှိ မီးရှို့ခံထားရသည့် အိမ်ခြေမှာ ဘုန်ကြီးကျောင်း အပါအဝင် တစ်ဝက်နီးပါး ပျက်စီးဆုံးရှုံးသွားကြောင်း ၎င်းကပြောသည်။
“ မနေ့ နေ့လည်ပိုင်းအချိန်ထိတော့ အိမ်ခြေ တစ်ဝက်နီးနီးလောက် ပါသွားပြီ။ ညမိုးချုပ်အထိ ဘယ်သူမှ မနေရဲတော့ အကုန်ထွက်ပြေးရတယ်။ နမ့်နိမ့်ရွာမှာ အိမ်ခြေက စုစုပေါင်း ၃၅၀ လောက်ရှိတယ်။ အခုမီးထဲပါသွားတာ တစ်ဝက်နီးပါး ရှိတယ် “ ဟု ၎င်းက ပြောသည်။
အဆိုပါ တိုက်ပွဲကြောင့် နမ့်နိမ့်ဘုန်းကြီးကျောင်းအတွင်း ခိုလှုံနေသည့် ဘုန်းကြီး ၃ ပါးနှင့် ဒေသခံ ၁၅ ဦးသည် လက်ရှိအချိန်ထိ ဆက်သွယ်၍ မရသေးကြောင်း ပေ။
“ ဘုန်းကြီးကျောင်းက ဘုန်းကြီးကော၊ ဒေသခံ ၁၅ ယောက်ကော အခုထိ ဆက်သွယ်လို့ မရတော့ဘူး။ တချို့ ပြောတာတော့ အလောင်းဖြစ်ကုန်ပြီလို့ ပြောတယ်။ ကျနော်တို့လည်း အတည်မပြုနိုင်သေးဘူး “ ဟု ၎င်းက ထပ်လောင်းပြောသည်။
ထို့အပြင် တိုက်ပွဲအတွင်းမှာ စစ်ကောင်စီတပ်ဖွဲ့၊ ပအိုဝ်းပြည်သူ့စစ်တပ်ဖွဲ့ PNO နှင့် ပြည်သူ့ကာကွယ်ရေးတပ်ဖွဲ့ KNDF တို့တိုက်ပွဲကြောင့် ကျေးရွာ ၆ ရွာနှင့် ပြည်သူဦးရေ ၆၀၀၀ ဝန်းကျင် ထွက်ပြေး တိမ်းရှောင်နေရကြောင်း သိရသည်။
