သျှမ်းပြည် လားရှိုးခရိုင် မိုင်းရယ်မြို့နယ်အတွင်းတွင် အာဏာသိမ်းစစ်ကောင်စီ တပ်ဖွဲ့ နှင့် ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့ ထိတွေ့တိုက်ပွဲ ဖြစ်ပွားခဲ့ကြောင်း သတင်းရရှိသည်။
ယမန်နေ့ (မတ်လ ၁၁) ရက်နေ့ မွန်းလွဲပိုင်း ၁ နာရီဝန်းကျင်မှ စတင်ကာ မိုင်းရယ်မြို့ အမှတ် (၁) ရပ်ကွက် အနောက်ဘက်ရှိ နားဆန်းကျေးရွာ နှင့် နားယန်းကျေးရွာကြားရှိ ခိုလောင်းတံတားအနီးတွင် စစ်ကောင်စီတပ်ဖွဲ့နှင့် SSPP/SSA တို့ ထိတွေ့တိုက်ပွဲ ဖြစ်ပွားခဲ့ခြင်း ဖြစ်ကြောင်း အသက် ၃၀ ကျော် မိုင်းရယ်မြို့ခံ တစ်ဦးက ပြောသည်။
“SSPP က ခိုလောင်း နားတစ်ဝိုက် ဒေသလုံခြုံရေး စစ်ဆေးမှု လုပ်နေတဲ့ အချိန်မှာ၊ မြို့ထဲကနေ ရဲကားတစ်စီး စစ်ကားတစ်စီးက ခိုလောင်းဘက်ကို ဦးတည်ပြီး သွားတယ်။ SSPP/SSA ကို တပ်မတော်က စပစ်တာ၊ သေနတ်တွေ ဗုံးတွေရော သုံးတယ်၊ လယ်တွေ ယာတွေထဲမှာ ကျည်ဆံ ဗုံးဆံတွေ ရှိနေသေးတယ်” ဟု မိုင်းရယ် မြို့ခံ ပြောသည်။
တိုက်ပွဲဖြစ်ပွားရာ ခိုလောင်းတံတားသည် သီပေါ – မိုင်းရယ် – လားရှိုး ပြည်ထောင်စု လမ်းမကြီးပေါ်တွင် တည်ရှိပြီး မိုင်းရယ်မြို့နှင့် တစ်မိုင်ခန့်သာ ကွာဝေးသည်။
ထိတွေ့တိုက်ပွဲသည် တစ်နာရီနီးပါး ဖြစ်ပွားခဲ့ခြင်း ဖြစ်ပြီး နှစ်ဖက် တပ်ဖွဲ့ စစ်ကူအင်အားများ ရောက်ရှိလာပြီး ပစ်ခတ်ကြရာမှ အာဏာသိမ်း စစ်ကောင်စီတပ်ဖွဲ့သည် မြို့ထဲသို့ ပြန်လည်ဆုတ်လာကြောင်း အထက်ပါ အမျိုးသားက ဆက်ပြောသည်။
“တိုက်ပွဲက ၁ နာရီကနေ ၂ နာရီထိုးခါနီးအထိ ဖြစ်တာ၊ နှစ်ဖက် တပ်ဖွဲ့ကစစ်အင်အား အကူတွေ ရောက်လာပြီး အချင်းချင်းပစ်ကြတယ်၊ တပ်မတော်ဘက်က မြို့ထဲ ပြန်ဆုတ်လာလို့ တိုက်ပွဲက ငြိမ်သွားတယ်၊ SSPP ဘက် ထိခိုက် ဒဏ်ရာရသူရှိတယ်” ဟု ၎င်းက ဆိုသည်။
ထိတွေ့တိုက်ပွဲ ငြိမ်သွားပြီးနောက် ညနေ ၅ နာရီဝန်းကျင်အချိန်တွင် အာဏာသိမ်း စစ်ကောင်စီ တပ်ဖွဲ့သည် ကား တစ်စီး နှင့် ခိုလောင်း အနီးတစ်ဝိုက်ရှိ ဈေးဆိုင်များ၊ အိမ်များရှိ ပြည်သူထူထုကို ညနေ ၆ နာရီကျော် အထိ သွားရောက်စစ်ဆေး မေးမြန်းမှုများ လုပ်ခဲ့ကြောင်းလည်း သိရသည်။
ယင်းထိတွေ့တိုက်ပွဲ ဖြစ်ပွားမှုနှင့် ပတ်သက်ပြီး SSPP/SSA တပ်ဖွဲ့၏ ပြောရေးဆိုခွင့်ရှိသူများထံသို့ ဖုန်းဖြင့် အကြိမ်ကြိမ် ဆက်သွယ်မေးမြန်းခဲ့သော်လည်း ဖုန်းလက်ခံဖြေကြားခြင်း မရှိပေ။
မိုင်းရယ်မြို့အတွင်း အခြေစိုက် စစ်ကောင်စီ တပ်သည် ခြေမြန်တပ်ရင်း ခမရ အမှတ် ၃၂၅ နှင့် အမြှောက်တပ် တို့ ရှိကြသည်။
စစ်အာဏာသိမ်းပြီးနောက် စစ်ကောင်စီ ခေါင်းဆောင် မင်းအောင်လှိုင်၊ ဒုတိယ ဗိုလ်ချုပ်ကြီး ရာပြည့် ဦးဆောင်သည့် NSPNC အဖွဲ့ နှင့် SSPP/SSA တပ်ဖွဲ့တို့ နေပြည်တော်တွင် ငြိမ်းချမ်းရေး လုပ်ငန်းစဉ်ဆွေးနွေး ဆောင်ရွက်မှု ၂ ကြိမ် ထက်မနည်းရှိခဲ့သည်။
ပြီးခဲ့သည့် ဇန်နဝါရီလအတွင်းတွင်လည်း စစ်ကောင်စီဘက်မှ SSPP/SSA ဌာနချုပ်ရှိရာနေရာကို ဦးတည်ပြီး ရဟတ်ယာဥ်ဖြင့် လာရောက်ပျံဝဲခြိမ်းခြောက်မှု ပြုခဲ့သည်။
