သျှမ်းပြည် ကွတ်ခိုင်မြို့နယ် မှ မူဆယ်မြို့ သွားသည့် ပြည်ထောင်စု ကားလမ်းပိုင်း တစ်လျောက်တွင် အာဏာသိမ်း စစ်ကောင်စီ တပ်ဖွဲ့က ကုန်တင်ကားများထံ ငွေကြေးကောက်ယူ နေကြောင်း စုံစမ်းသိရသည်။

ဖေဖော်ဝါရီလ နှောင်းပိုင်းမှ စတင်ကာ ကွတ်ခိုင် – မူဆယ်မြို့ ပြည်ထောင်စု လမ်းပိုင်း တစ်လျောက်တွင် စစ်ကောင်စီ တို့သည် ငွေကျပ် တစ်သိန်းကျပ်မှ စတင်ကာ ကုန်တင်ကား အမျိုးအစားအလိုက် ပိုက်ဆံ ကောက်ယူ နေကြောင်း ကားသမားများထံ သိရသည်။

“ကုန်တင်ကား ၁၀ ဘီးဆိုရင် တစ်သိန်းကျပ်တောင်းတယ်၊ ၁၈ ဘီးတွေကို ၃ သိန်း တောင်းတယ်၊ ကျနော် ကြုံရ တုန်းကတော့ လားရှိုးကနေ ကုန်တချို့ တင်လာတာ၊ မူဆယ်ဘက် သွားမလို့ပေါ့၊ ကွတ်ခိုင် အကျော်မှာ သူတို့ စောင့်တယ်၊ စစ်သားတွေ ချည်းပဲ၊ အဲ့တုန်းက ၁ သိန်းပေးရတယ်” ဟု ကိုယ်တိုင် ကြုံတွေ့ရတဲ့ ၆ ဘီး ကုန်တင် ကားမောင်း အမျိုးသား တစ်ဦးက သျှမ်းသံတော်ဆင့်ကိုပြောသည်။

ပိုက်ဆံကောက်ရန် စောင့်နေသည့် စစ်ကောင်စီ တပ်ဖွဲ့သည် နမ့်ဖတ်ကာ အခြေစိုက် ခြေလျင်တပ်ရင်း ၁၉၀ ဖြစ်ပြီး ကုန်တင်ကားများ အပြင် အိမ်စီးကားများကိုလည်း ပိုက်ဆံ တောင်းယူ ကောက်ခံကြောင်း သတင်းသိရသည်။

ယင်းကဲ့သို့ အိမ်စီးကားများကို ပိုက်ဆံတောင်းယူ ကောက်ခံသည့်အချိန်တွင် လက်ဆွဲနှုတ်ဆက်သည့် အသွင်ဖြင့် ငါးထောင် ၊ သုံးထောင် ကောက်ယူ တောင်းခံ နေကြောင်း သိရသည်။

“ကျမတို့က အိမ်စီးကားနဲ့ ကွတ်ခိုင် ကနေ မူဆယ်ဘက် ထွက်သွားတဲ့ အချိန်မှာ စစ်ကောင်စီ တပ်ဖွဲ့ ကွတ်ခိုင်မြို့ အပြင်မှာ စောင့်တဲ့ စစ်ကောင်စီက လက်ဖက်ရည်ဖိုး ဟင်းဖိုးပေးပါတဲ့၊ အဲ့တာ ကားမောင်းတဲ့သူက လက်ဆွဲ နှုတ်ဆက်သလိုနဲ့ ငါးထောင်ထည့်ပေးလိုက်ရတယ်၊ တခြား ဆိုင်ကယ်တွေလည်း အဲ့လိုတောင်းတယ်” ဟု မြင်တွေ့ ရတဲ့ ခရီးသွား အမျိုးသမီးတစ်ဦးကလည်း ပြောသည်။

လက်ရှိ ကွတ်ခိုင် – မူဆယ် လမ်းပိုင်း တစ်လျောက် ကုန်တင်ကားများကို ပိုက်ဆံ တောင်းယူ ကောက်ခံနေသည့် စစ်ကောင်စီ ခြေလျင်တပ်ရင်း ခလရ (၂၉၀) တပ်သည် ပြီးခဲ့သည့် ၂၀၂၂ ခုနှစ် အောက်တိုဘာလ အတွင်းတွင် မူဆယ်မြို့ရှိ တပ်ရင်းမှူး နှင့် အပြန်အလှန် နေရာလဲလှယ်ပြီး ပြန်လည် တာဝန်ကျလာသည့် တပ်ရင်းမှူး အသစ်ဖြစ်ကြောင်း သိရသည်။

ယင်းကဲ့သို့ တပ်ရင်းမှူး အပြောင်းအလဲ လုပ်ပြီးနောက်ပိုင်းတွင် ကွတ်ခိုင် – မူဆယ် လမ်းပိုင်း တစ်လျှောက် စစ်ကောင်စီ တပ်ဖွဲ့၏ ငွေကြေးကောက်ယူ တောင်းခံမှုများလည်း တိုးလာကြောင်း သိရသည်။

ကိုဗစ် နောက်ဆက်တွဲ အပြင် စစ်အာဏာသိမ်းမှု နှင့် နိုင်ငံရေး မငြိမ်မသက်မှုတွေကြောင့် ဒေသခံပြည်သူများက စားဝတ်နေရေး ခက်ခဲနေချိန်တွင် အာဏာသိမ်း စစ်ကောင်စီ တပ်ဖွဲ့မှ ငွေကြေးကောက်ယူ တောင်းခံနေခြင်း သည် ပြည်သူများကို ပိုပြီး ဒုက္ခရောက်စေကြောင်း ဒေသခံများက ပြောဆိုနေကြသည်။