သျှမ်း – ကယားပြည် နယ်စပ်လုံခြုံရေးအတွက် ပအိုဝ်းတိုင်းရင်းသားလူငယ်များ တတူတကွ ပူးပေါင်းတိုက်ပွဲ ပါဝင်ပေးရန် ပအိုဝ်းအမျိုးသားတပ်မတော် (PNO/PNA) က ပြောဆိုလိုက်ကြောင်း ယမန်နေ့ (မတ်လ ၇ ရက်) ထုတ်ပြန်ချက်အရ သိရသည်။

နယ်စပ်တိုက်ပွဲကြောင့် ပင်လောင်းမြို့နယ် တောင်မဲသင်း၊ တောင်စလုံး၊ မြောက်စလုံး၊ နမ့်နိမ့်၊ လုံးပျဉ်၊ ပင်ပုံ စသည့် ကျေးရွာ ဒေသခံ (၅,၀၀၀) ကျော် အိုးအိမ်စွန့်ပြီး ထွက်ပြေးတိမ်းရှောင်ရကြောင်း ထုတ်ပြန်ချက်တွင် ရေးသားဖော်ပြထားသည်။

အဆိုပါ ဒေသကို ကာကွယ် တားဆီးဖို့ရန် ပအိုဝ်းဒေသအတွင်း မြို့နယ်အလိုက်၊ ကျေးရွာအလိုက် ပအိုဝ်းတိုင်းရင်းသားလူငယ်များ အနေဖြင့် အမျိုးသားရေး တာဝန်ကို ဝင်ရောက်ထမ်းဆောင်ပေးရန် နှိုးဆော်လိုက်ကြောင်း သိရသည်။

“ သူတို့က ငါတို့ PNO/PNA နယ်မြေမှာ အေးချမ်းချင်တယ်၊ ကျန်တာ ဘာပဲဖြစ်ဖြစ် ဂရုမစိုက်ဘူးဆိုတဲ့ သဘောမျိုး။ သူတို့ငြိမ်းချမ်းရေး ယူပြီးကတည်းက နယ်မြေငြိမ်းချမ်းတယ်။ အခု နိုင်ငံရေး မတည်ငြိမ်တော့မှ PDF တွေ ပေါ်ပေါက်လာလို့ ဘာဖြစ်တယ်၊ ညာဖြစ်တယ်ဆိုပြီး ချေမှုန်းချင်တာ။ သူတို့က ပြည်သူတွေ အတွက် အသက်ပေးလှူခဲ့ရတယ်။ အခုက လူမလောက်လို့ သူတို့တပ်ထဲကို ဝင်ခိုင်းတာ“ ဟု အသက် ၂၀ နှစ်အရွယ် ခွန်ကျော်အောင် (အမည်လွှဲ) ပအိုဝ်းတိုင်းရင်းသား လူငယ်တစ်ဦးက ပြောသည်။

နယ်စပ်ဒေသတွင် နှစ်ဖက် အပြန်အလှန် တိုက်ပွဲကြောင့် ပြည်သူပိုင် အိုးအိမ်များ၊ ဘုရားကျောင်းကန်များမှာလည်း အထိအခိုက်များစွာ ရှိခဲ့ကြောင်း သိရသည်။

ထို့အပြင် ထုတ်ပြန်ချက်နှင့် ပတ်သက်ပြီး သျှမ်းသံတော်ဆင့် သတင်းဌာနမှ ပအိုဝ်းအမျိုးသားတပ်မတော် ( PNO/PNA ) ဗိုလ်မှူး ဆိုင်းကြွယ်ကို ဆက်သွယ်ခဲ့သော်လည်း လက်ခံဖြေကြားခြင်း မရှိခဲ့ပေ။

ဆက်လက်ပြီး “အရင်တုန်းက ဗိုလ်ကြီးသိန်းဖေ ပြောဖူးတယ်။ စစ်တပ် နဲ့ ငြိမ်းချမ်းရေး ယူပြီးရင် စစ်တပ်က ငါ့ကိုလူမျိုးကို ကူညီမယ်တဲ့။ အခုတော့ စစ်တပ်က ငါ့တို့ဆီမှာ အကူညီ လာတောင်းနေရတယ် “ ဟု ၎င်းက ထပ်လောင်းပြောသည်။

ပြီးခဲ့သည့် ၁၉၉၁ ခုနှစ်တွင် အမျိုးသားတပ်မတော် PNO/PNA သည် စစ်ကောင်စီ နှင့် ငြိမ်းချမ်းရေး ရယူခဲ့ပြီး ဆီဆိုင်မြို့နယ်၊ ပင်လောင်းမြို့နယ် နှင့် ဟိုပုံးမြို့နယ်တို့ကို အထူးဒေသ ၆ အဖြစ် သတ်မှတ်ပေးကာ ကိုယ်ပိုင်အုပ်ချုပ်ခွင့် ရခဲ့သည်။

လက်ရှိမှာ ၎င်းမြို့နယ်များတွင် စစ်ကောင်စီ၊ PNO/PNA ပူးပေါင်း နှင့် PDF တပ်ဖွဲ့တို့ တိုက်ပွဲဖြစ်ပွားကာ ထိုဒေသတွင် စစ်ဘေးရှာင် ၅,၀၀၀ ကျော်ရှိပြီး စားနပ်ရိက္ခာ၊ ဆေးဝါးပစ္စည်းများ ခက်ခဲနေကြောင်း သိရသည်။