သျှမ်းပြည် ကျောက်မဲခရိုင် သီပေါမြို့ သီပေါတံတားပေါ်ကနေ ယမန်နေ့ (မတ်လ ၆ ရက်) နေ့လည်ပိုင်း အချိန်က အမျိုးသားတစ်ဦး ခုန်ချခဲ့ကြောင်း သတင်းသိရှိရသည်။
အဆိုပါ သီပေါတံတားပေါ်မှ ခုန်ချခဲ့သည့် အမျိုးသားတစ်ဦးသည် သီပေါမြို့ အုတ်ကျင်းရပ်ကွက်တွင် နေထိုင်သူဖြစ်ပြီး ယနေ့အချိန်ထိ ရှာမတွေ့သေးကြောင်း သီပေါလူငယ်ကူညီရေးအသင်းမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ မနေ့ နေ့လည်လောက်က ခုန်ချသွားခဲ့တာဗျ။ အမည်ကော၊ အသက်ကော မသိလိုက်ရဘူး။ အုတ်ကျင်းကလို့တော့ ပြောတယ်။ ဒီနေ့ထိ ကျနော်တို့ ရှာလို့မတွေ့သေးဘူး “ ဟု ၎င်းက ပြောသည်။
အဆိုပါ သီပေါတံတားပေါ်မှ ခုန်ချခဲ့သည့် အမျိုးသားတစ်ဦးဟာ ချောင်းအတွင်းသို့ မခုန်ချမှီ ပြီးခဲ့ရက်ပိုင်းမှာ ၎င်းသည် စိတ်ရှုပ်ထွေးမှုများခဲ့ကြောင်း ၎င်းနှင့် နီးစပ်သည့် အသိုင်းအဝိုင်းထံမှ သိရသည်။
“ ပြီးခဲ့တဲ့ ရက်ပိုင်း သူ့ဆွေမျိုးတွေထဲက တစ်ယောက်ဆုံးပါးသွားလို့ သူတောင် အရိုးပြာသွားယူသေးတယ်။ အဲ့ကနေ မကြာသေးပါဘူး။ ဘာတွေ စိတ်ဖိစီးမှုတွေများပြီး အခုလို အဆုံးစီရင်သွားတာတော့ မပြောတတ်ဘူး “ ဟု ၎င်းနှင့်နီးစပ်သည့် အသိုင်းအဝိုင်း အမျိုးသားတစ်ဦး ပြောသည်။
စစ်တပ်အာဏာသိမ်းပြီး ၂ နှစ်ကျော် ကာလအတွင်းမှာ နိုင်ငံရေး၊ စီးပွားရေး၊ လူမှုရေးနှင့် ပညာရေး စသည့်ဖြင့် လုပ်ငန်းများ ကျဆင်းလာမှုကြောင့် အခြေခံလူတန်းစားများမှာ စားဝတ်နေရေး မပြေလည်မှုများ၊ အိမ်တွင်းပြဿနာများကို ကြုံတွေ့ရပြီး ဖြေရှင်းမရတဲ့အခါ အဆုံးစီရင်သွားသည်။
Leave a Comments