သျှမ်း – ကယားပြည် နယ်စပ်တလျောက်တွင် သောက်သုံးရေ ပြဿနာကြောင့် စစ်ရှောင် အပါအဝင် ဒေသခံဦးရေ (၂,၀၀၀) နီးပါး ဝမ်းပျက်၊ ဝမ်းလျှော ဖြစ်ပွားနေကြောင်း သတင်းရရှိသည်။

အဆိုပါ ဝမ်းပျက်၊ ဝမ်းလျှေ ာဦးရေ (၂,၀၀၀) နီးပါးသည် သျှမ်း – ကယားပြည် နယ်စပ်ရှိ ဖယ်ခုံမြို့နယ် အတွင်းရှိ တောထဲ တိမ်းရှောင်နေသည့် စစ်ရှောင်များ နှင့် ကျေးရွာ ၁၅ ရွာမှ ဒေသခံများဖြစ်ကြောင်း Mobye Rescue Team ထံမှ ကျန်းမာရေး ဆရာမ တစ်ဦးက သျှမ်းသံတော်ဆင့် ကို ပြောသည်။

“ဝမ်းပျက်၊ ဝမ်းလျှော ဖြစ်ရတဲ့အကြောင်းက သူတို့ စိမ့်စမ်းရေကို သောက်တာ။ အဲ့မှာက ရေရှားတယ်။ ရေကို ကျိုမချက်နိုင်ဘူး။ စစ်ရှောင်ကော၊ မရှောင်တဲ့သူကော အကုန်ဖြစ်နေတယ်။ ရွာက ၁၅ ရွာနဲ့ လူဦးရေ ၂,၀၀၀ နီးပါးက ဝမ်းပျက်၊ ဝမ်းလျှောဖြစ်နေတယ် “ ဟု ၎င်းက ပြောသည်။

အဆိုပါ ဝမ်းပျက်၊ ဝမ်းလျှော ရောဂါခံစားရသူများကို ၅ ရက်သာ ဆေးဝါးကုသပေးနိုင်ကြောင်း သိရသည်။

လမ်းကြောင်းဆက်သွယ်ရေး နှင့် ထောက်ပံ့ပေးသူ အခက်ခဲ မျိုးမျိုးကြောင့် ကျန်းမာရေး စောင့်ရှောက်မှုစခန်းတွင် ဆေးဝါးလုံလောက်မှု မရရှိခြင်းကြောင့် အချိန်မှီ ဆေးဝါးကုသမှု မပေးနိုင်သည့် ကလေးငယ်များနှင့် သွေးတိုးရောဂါ ခံစားရသူများမှာ အသက်ဆုံးရှုံးမှု ရာခိုင်နှုန်း ပိုများနိုင်ကြောင်း ၎င်းကဆက်ပြောသည်။

“ ဝမ်းလျှောရင် ၂ နှစ်အောက်ကလေးငယ်အတွက်တော့ စိုးရိမ်ရတယ်။ ဒီညဖြစ်လိုက်တာနဲ့ မနက်ဖြန် သေဆုံးနိုင်တဲ့ အလားအလာ အများကြီးရှိတယ်။ ဝမ်းပျက်၊ ဝမ်းလျှောကတော့ ကျမတို့ ရအောင်လုပ် ပေးနိုင်တယ်။ သွေးတိုးဖြစ်တဲ့သူတွေက ဆေးမသောက်ရရင် သွေးတိုးတက်ပြီး သွေးပေါက်တာ ဉီးနှောက်ထိပြီး သေဆုံးတာရှိတယ်။ ဒီမှာလည်း သွေးတိုးရှိတဲ့သူ ဆေးမသောက်နိုင်တာ အများကြီးရှိတယ် “ ဟု ၎င်းက ထပ်လောင်းပြောသည်။

ထို့အပြင် လစဉ်ဆေးဝါး ကုသမှု မရှိပါက စစ်ရှောင်များ အပါအဝင် ဒေသခံများ ခံစားရသည့် ဝမ်းပျက်၊ ဝမ်းလျှော ရောဂါ၊ သွေးတိုးရောဂါ စသည့်ဖြင့် ရောဂါများကို အချိန်မှီ မကုသနိုင်ခြင်းကြောင့် သေဆုံးသွားနိုင်ကြောင်း သိရသည်။

ပြီးခဲ့သည့် ဖေဖော်ဝါရီ နောက်ဆုံးပတ်မှစပြီး ပင်လောင်းမြို့နယ်အတွင်း စစ်ကောင်စီတပ်ဖွဲ့၊ ပအိုဝ်းပြည်သူ့စစ် PNO နှင့် ပြည်သူ့ကာကွယ်ရေးတပ် PDF တို့ တိုက်ပွဲဆက်တိုက်ဖြစ်ပွားမှုကြောင့် ဒေသခံ ၅,၀၀၀ ဝန်းကျင်သည် အိုးအိမ်စွန့်ပြီး ထွက်ပြေးတိမ်းရှောင်ရသည်။

သျှမ်း – ကယားပြည် တလျောက်တွင် စစ်ဘေးရှောင် တသိန်းကျော်ရှိကြောင်း သိရသည်။