သျှမ်းပြည် တောင်ကြီးခရိုင် တောင်ကြီးမြို့ နိုင်ငံကူးလက်မှတ်ရုံး (ပတ်စပိုစ့်) ကို လူဦးရေ အကန့်အသတ်ဖြင့် ပွဲစားထံမှ ကျပ် ၃ သိန်း ဝန်းကျင်ပေးပြီး ပတ်စပိုစ့် လုပ်ပေးနေကြောင်း သတင်းသိရှိရသည်။
ပြီးခဲ့သည့် ဖေဖော်ဝါရီ ၂၇ ရက်မှစပြီး ယနေ့ မတ်လ ၃ ရက်အထိ တောင်ကြီးမြို့ ပတ်စပိုစ့် ရုံးကို ပြန်လည်ဖွင့်လှစ်လာခဲ့ပြီးနောက် တစ်နေ့လျှင် လူဦးရေ (၃၀၀) ဝန်းကျင်က ပတ်စပိုစ့် လျှောက်ရန် သွားရောက် စောင့်ဆိုင်းနေခဲ့ရပြီး ပတ်စပိုစ့်ရုံးမှ လူဦးရေ ၁၀၀ ကို အကန့်အသတ်ဖြင့် လုပ်ပေးနေကြောင်း ပတ်စပိုစ့် သွားရောက်လုပ်ကိုင်သူ အမျိုးသားတစ်ဦး ကပြောသည်။
“ ပတ်စပိုစ့် ရုံးဖွင့်တယ်ဆိုပေမယ့်လည်း လူတွေပြည့်ကြပ်နေတော့ လုပ်လို့ အဆင်မပြေဘူး။ လူအရမ်းများတယ်။ လူကလာတာ တစ်ရက်ကို အယောက် ၃၀၀ လောက်ရှိတယ်။ သူတို့လုပ်ပေးတာက အယောက် ၁၀၀ အကန့်အသတ်နဲ့ဘဲ လုပ်ပေးတာ။ လူအယောက် ၁၀၀ ကို လုပ်ပေးတာကလည်း ညနေ ၁၀ နာရီကျော်လောက်မှ ပြီးတာ“ ဟု ၎င်းက ပြောသည်။
လက်ရှိ ပွဲစားထံမှ ပတ်စပိုစ့် လုပ်အားခ တစ်ဦးလျှင် ကျပ် (၂) သိန်းကျော်မှ (၃) သိန်းအထိ ဈေးနှုန်းမြင့်တက်နေကြောင်း သိရသည်။
အဆိုပါ ပတ်စပိုစ့် လုပ်အားခ နှင့် ပတ်သက်ပြီး “ အခုက ဈေးတက်သွားပြီဗျ။ တစ်ယောက်ကို ၂ သိန်းကျော်ကနေ ၃ သိန်းအထိ လုပ်ပေးနေတယ်။ နည်းနည်းတော့ မြန်တယ်ပေါ့။ အခု ကိုယ့်ကိုယ် ရက်ချိန်းယူရင်တော့ ၅ လပိုင်း၊ ၆ လပိုင်းလောက်မှ ရမှာပေါ့။ အရင် QR ကုဒ် ရပြီးသား သူတွေကို ရက်အနီးနား ပြန်ချိန်းပေးပါတယ်“ ဟု ပတ်စပိုစ့် ပွဲစားတစ်ဦး ကပြောသည်။
ထို့အပြင် ပွဲစားထံမှ ပတ်စပိုစ့် လုပ်ရန် လက်ရှိကာလ လုပ်အားခ ပေါက်ဈေးသည် ဈေးနှုန်းမြင့်တက်နေသေးကြောင်း၊ ပတ်စပိုစ့် လုပ်ဆောင်သူများအတွက် အခက်ခဲ ရှိနေသေးကြောင်း ပတ်စပိုစ့် လုပ်ပေးသူ အမျိုးသမီးတစ်ဦးက ပြောသည်။
“ အခုက သွားမလုပ်ရသေးဘူး။ အစပဲရှိသေးတယ်ဆိုတော့ ပတ်စပိုစ့် လုပ်အားခက အရမ်းဈေးကြီးတယ်။ လောလောဆယ်ဆယ်တော့ သွားမလုပ်ရသေးဘူး။ အခြေအနေလေးတွေ စောင့်ကြည့် နေရသေးတာပေါ့။ ပတ်စပိုစ့် ရုံးလည်း ပြန်ပိတ်သွားမလား၊ ဆက်ဖွင့်မလားဆိုတာ သူတို့အပေါ်မူတည်တော့ ဆက်ပြီးအခြေနေလေးတွေ စောင့်ကြည့်နေရသေးတယ် “ ဟု ၎င်းအမျိုးသမီးတစ်ဦးက ပြောသည်။
ပတ်စပိုစ့်ရုံးကို ပြီးခဲ့သည့် ဇန်နဝါရီ ၂ ရက်မှ စပြီး စစ်ကောင်စီသည် စက္ကူမလုံလောက်ခြင်း အကြောင်းပြပြီး ပိတ်သိမ်းခဲ့ရာ ယခုလအတွင်း ပြန်ဖွင့်လှစ်ပေးခဲ့သည်။
Leave a Comments