သျှမ်းပြည် မူဆယ်ခရိုင် မူဆယ်မြို့ ဟိုမွန်ရပ်ကွက် ၄၅ ကုန်းရှိ လုံထန်ပြည်သူ့စစ်၏ လောင်းကစား နေရာ ဟောင်းတွင် မီးလောင်ပျက်စီးမှု ဖြစ်ပွားခဲ့ကြောင်း သတင်းသိရသည်။

ယမန်နေ့ ဖေဖော်ဝါရီလ ၂၇ ရက်နေ့ ည ၈ နာရီခွဲ ဝန်းကျင်တွင် ဟိုမွန်ရပ်ကွက် ၄၅ ကုန်းရှိ လမ်းသွယ် (၇) လုံထန်ပြည်သူ့စစ်၏ လောင်းကစားရုံ နေရာဟောင်းသည် လျှပ်စစ်ဝါယာရှော့ခ် ဖြစ်ကာ မီးလောင်ခဲ့ရကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“မနေ့ ည ၈ နာရီခွဲကျော်ကျော်လောက်မှာ မီးလောင်မှုဖြစ်တာ၊ အရင်တုန်းကတော့ လုံထန်ပြည်သူ့စစ်အဖွဲ့ ကနေ လောင်းကစားဝိုင်းတွ ဖွင့်တဲ့နေရာပေါ့၊ ဒါပေမဲ့ ရပ်ထားတာ တစ်နှစ်လောက်ရှိပြီ၊ မနေ့က ဝါယာရှော့ခ် ဖြစ်ပြီး မီးလောင်တဲ့အချိန်မှာ အစောင့်နှစ်ယောက်ရှိတယ်” ဟု အထက်ပါ ဒေသခံအမျိုးသားက ပြောသည်။

အဆိုပါ လုံထန်ပြည်သူ့စစ် လောင်းကစားရုံဟောင်းသည် ယခုလို ရပ်နားထားခြင်း မရှိခင် ပြီးခဲ့သည့် တစ်နှစ်တွင်လည်း မီးလောင်မှုတစ်ကြိမ် ဖြစ်ပွားခဲ့ကြောင်းလည်း သိရသည်။

ယင်းမီးလောင်မှုကို အိမ်နီးချင်းများ နှင့် မီးသတ်တပ်ဖွဲ့များမှ ဝိုင်းဝန်းငြိမ်းသတ်ခဲ့ပြီး၊ အိမ်တွင်း ပစ္စည်း အချို့ ပျက်စီးဆုံးရှုံးမှုရှိကြောင်း အထက်ပါ ဒေသခံ အမျိုးသားက ဆက်ပြောသည်။

“ပစ္စည်းတင်တဲ့ စင်တွေနဲ့ အသုံးအဆောင် တချို့၊ ပြီးတော့ အိမ်တွင်းပရိဘောဂ ပစ္စည်းတချို့ ပျက်စီးဆုံးရှုံးတာ ရှိတယ်၊ လူထိခိုက်တာတော့ မရှိဘူး၊ ခုတစ်ကြိမ်နဲ့ဆို ဒီနေရာကို မီးလောင်ပျက်စီးတာ နှစ်ကြိမ်ရှိပြီ” ဟု ၎င်းက ဆိုသည်။

ပြီးခဲ့သည့် ဖေဖော်ဝါရီ ၂၅ ရက်နေ့တွင်လည်း မူဆယ်မြို့ စွမ်စော်ရပ်ကွက် အမှတ် (၂) မြို့မ ပြည်သူ့စစ် တပ်ဖွဲ့ နေအိမ် ဖြစ်သည့် ကောင်းဟော်တယ်ရှေ့ နေအိမ်အမှတ် စစ/၃၂ တန်းလျားတွင် ဗုံးပေါက်ကွဲမှု ဖြစ်ပွားခဲ့ပြီး တစ်ဦးသေ၊ တစ်ဦးက လက်နှစ်ဖက်ပြတ် ဒဏ်ရာပြင်းထန်စွာ ရခဲ့သည်။

မူဆယ်မြို့သည် မြန်မာ – တရုတ်နယ်စပ် ဒေသဖြစ်သည့်အတွက် လူဝင်လူထွက်များသည့်အပြင် တရားမဝင် ဂိမ်းဆိုင်၊ လောင်းကစားဆိုင် ပေါများပြီး ပြည်သူ့စစ်တပ်ဖွဲ့များမှ အဓိက လုံခြုံရေး ယူပေးနေကြောင်း ဒေသခံများကပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် လျှပ်စစ်ဓာတ်အားလိုင်းများ ပြန်လည်ပြုပြင်နေသည် ဆိုသည့် အကြောင်းပြချက်ဖြင့် လျှပ်စစ်ဓာတ်အားလိုင်း ပြတ်တောက်သည့်အချိန်က မီးရရှိသည့် အချိန်ထက် ပိုများနေသည်။

ထို့အပြင် လျှပ်စစ်ဝါယာရှော့ခ်ကြောင့် နေအိမ် နှင့် အဆောက်အအုံ မီးလောင်ပျက်စီးမှုများကလည်း တောင်ကြီးမြို့ အပါအဝင် သျှမ်းပြည်တခွင် မကြာခဏ ရက်ဆက်နီးပါး ဖြစ်ပွားနေသည်။