သျှမ်းပြည် တောင်ကြီးခရိုင် တောင်ကြီးမြို့ စိန်ပန်းရပ်ကွက်အတွင်း လျှပ်စစ်ဓာတ်အားလိုင်း ပြုပြင်နေစဥ် လျှပ်စစ်ဓာတ်လိုက်မှု ဖြစ်ပွားခဲ့ပြီး ဝန်ထမ်းတစ်ဦးက ဒဏ်ရာရသွားကြောင်း သတင်းသိရသည်။
ပြီးခဲ့သည့် ဖေဖော်ဝါရီလ ၂၅ ရက်နေ့တွင် တောင်ကြီးမြို့တွင်းမှ စိန်ပန်းရပ်ကွက် အတွင်း လျှပ်စစ်ဓာတ်အားလိုင်း ပြုပြင်နေသည့် လင်းသီဟ လျှပ်စစ်ဖြန့်ဖြူးရေး ကုမ္ပဏီ ဝန်ထမ်းအမျိုးသား တစ်ဦး ဓာတ်လိုက်ပြီး ဒဏ်ရာရသွားကြောင်း ဒေသအတွင်း ကြက်ခြေနီ အသင်းထံမှ သိရသည်။
စိန်ပန်းရပ်ကွက် နယ်မြေ (၇)၊ ပြည်တော်အေးလမ်းရှိ ငြိမ်းချမ်းလူငယ်ဖွံဖြိုးရေး ပရဟိတ ဂေဟာရှေ့၊ ပြည်နယ် ရဲတပ်ဖွဲ့မှူး ရုံး၏ အရှေ့ဘက်ထောင့်ရှိ 11 KV လျှပ်စစ် ဓာတ်မီးတိုင်ပေါ် လျှပ်စစ်ဓာတ်အားလိုင်း တက်ပြင်နေစဥ် လင်းသီဟ လျှပ်စစ်ဖြန့်ဖြူးရေး ဝန်ထမ်း ကိုအောင်ကို ကိုမတော်တဆ ဓာတ်လိုက်မှု ဖြစ်ပွားခဲ့ကြောင်း ကြက်ခြေနီ အသင်း ထုတ်ပြန်ချက်အရ သိရသည်။
အဆိုပါ ဓာတ်မီးတိုင်သည် သျှမ်းပြည် လွှတ်တော်၊ မြသုခရပ်ကွက် နှင့် ဟော်ကုန်းရပ်ကွက်တို့ကို အဓိက ချိတ်ဆက် ထားသည့် မီးလိုင်းဖြစ်ပြီး မီးလာသည့် အချိန်ထက် ပျက်သည့်အချိန်ပိုများနေကြောင်း တောင်ကြီးမြို့ခံ အသက် ၃၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။
“အခုချိန်မှာ မီးလာတဲ့ အချိန်ကို ခန့်မှန်းလို့ မရဘူးဖြစ်နေတယ်၊ ပျက်တာက များပြီး တစ်နေ့မှာ ၂ / ၃ နာရီ လာပြီး ပျက်သွားတယ်၊ ချက်ချင်းလာတာဆိုတော့ ဓာတ်အားတွေက အရမ်းပြင်းတယ်၊ အခုလို ပြင်တဲ့ ဝန်ထမ်းတွေ ကိုယ်တိုင်က ဓာတ်လိုက်တယ် ဆိုတော့ အသုံးပြုနေတဲ့ ကျနော်တို့လို ပြည်သူတွေ အတွက် အသက်အန္တရာယ် ပိုပြီး စိုးရိမ်ရတယ်” ဟု အထက်ပါ အမျိုးသားက ပြောသည်။
တောင်ကြီးမြို့တွင်း လျှပ်စစ်ဓာတ်အား မမှန်မှု၊ ပျက်သည့်အချိန်များနေမှုကြောင့် လျှပ်စစ် ဝါယာရှော့ခ်များ၊ ဓာတ်လိုက်မှုများမှ တစ်ဆင့် အသက်အန္တရာယ် နှင့် နေအိမ် အဆောက်အအုံများ မီးလောင်ပျက်စီး ဆုံးရှုံးမှု ဖြစ်တတ်ကြောင့်လည်း ဒေသခံများက ပြောသည်။
လက်ရှိတွင် လျှပ်စစ်ဓာတ်အား ဓာတ်လိုက်မှုကြောင့် ထိခိုက်ဒဏ်ရာရသည့် လင်းသီဟ ကုမ္ပဏီမှ ဝန်ထမ်း အမျိုးသားကို ကြက်ခြေနီအသင်းမှ တောင်ကြီး စဝ်စံထွန်းဆေးရုံသို့ ပို့ဆောင်ပေးခဲ့ကြောင်း သိရသည်။
လင်းသီဟ လျှပ်စစ်ဖြန့်ဖြူးရေး ကုမ္ပဏီသည် လက်ရှိ စစ်ကောင်စီ အဖွဲ့ဝင် ဦးဝဏ္ဏမောင်လွင်၏ သားဖြစ်သူ လင်းမင်းမောင်လွင် ပိုင်ဆိုင်ထားကြောင်းလည်း စုံစမ်းသိရသည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် လျှပ်စစ်ဓာတ်အားလိုင်းများ ပြန်လည်ပြုပြင်နေသည် ဆိုသည့် အကြောင်းပြချက်ဖြင့် လျှပ်စစ်ဓာတ်အားလိုင်း ပြတ်တောက်သည့်အချိန်က မီးရရှိသည့် အချိန်ထက် ပိုများနေသည်။
ထို့အပြင် လျှပ်စစ်ဝါယာရှော့ခ်ကြောင့် နေအိမ် နှင့် အဆောက်အအုံ မီးလောင်ပျက်စီးမှုများကလည်း တောင်ကြီးမြို့ အပါအဝင် သျှမ်းပြည် တခွင် မကြာခဏ ရက်ဆက်နီးပါး ဖြစ်ပွားနေသည်။
Leave a Comments