သျှမ်းပြည် တောင်ကြီးခရိုင် ပင်လောင်းမြို့နယ် တောင်စလုံးကျေးရွာအတွင်း စစ်ကောင်စီဘက်မှ ပစ်ခတ်လိုက်သည့် လက်နက်ကြီးကြောင့် အမျိုးသမီး တစ်ဦး သေဆုံးသွားခဲ့ကြောင်း စုံစမ်းသိရှိရသည်။
ပြီးခဲ့သည့် ဖေဖော်ဝါရီ ၂၄ မနက် ၁၁ နာရီဝန်းကျင်တွင် ပင်လောင်းမြို့နယ်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားပြီး စစ်ကောင်စီဘက်မှ လက်နက်ကြီးရမ်းသမ်းပစ်ခတ်မှုကြောင့် တောင်စလုံးရွာ ဒေသခံ အမျိုးသမီးသေဆုံးသွားခဲ့ကြောင်းသိရသည်။
“ တောင်စလုံးရွာက နေအိမ် ၄ အိမ်လောက်ထိသွားတယ်။ အမျိုးသမီးတစ်ယောက်လည်း ထိသွားတယ်။ စစ်ကောင်စီက တိုက်ပွဲအပြီးမှာ ရမ်းသမ်းပြီးတော့ လက်နက်ကြီးတွေနဲ့ပစ်လိုက်တာပေါ့။ တောင်စလုံးရွာထဲကျပြီးတော့ အမျိုးသမီးကလည်း အိမ်ထဲနေရင် ထိသွားတယ်။ မနက်ရောက်တော့ သူဆုံးသွားတယ်” ဟု ပင်လောင်းမြို့ ဒေသခံ အမျိုးသားတစ်ဦးက ပြောသည်။
အဆိုပါ တိုက်ပွဲကြောင့် ဆောင်းပြောင်းဂိတ်ကို ပိတ်ထားလိုက်ပြီး ယမန့်နေ ဖေဖော်ဝါရီ ၂၅ တွင် ပြန်လည်ဖွင့်လှစ်ပေးလိုက်ကြောင်းသိရသည်။
သို့သော် လက်ရှိအချိန်ထိ ပြည်သူများက သွားလာမှုအတွက် ဆောင်းပြောင်းလမ်းကို အသုံးမပြုသေးပေ။
ထို့အပြင် စစ်ကောင်စီတပ်သည် ပင်လောင်းမြို့နယ်မှ ဖယ်ခုံမြို့နယ်အတွင်း စစ်အင်အားဖြည့်တင်းနေလျက်ရှိကြောင်း ပင်လောင်းမြို့ မျက်မြင်တွေ့ရှိသူက ပြောသည်။
“ သူတို့စစ်အင်အားထပ်ဖြည့်နေတယ်။ မနေ့ညက ကား ၆ စီးလောက်က ဖယ်ခုံဘက်ကို ဆင်းသွားတာတွေ့တယ်။ ဒီနေ့မနက်ပြန်လာတော့ ကားထဲမှာ တပ်သားတွေက မရှိတော့ဘူး။ တစ်စီးကို ၂ ယောက်လောက်ပဲ ပြန်ကြတယ်။ ဖယ်ခုံဖက်ကို စစ်အင်အားသွားဖြည့်တာ ထင်တယ်” ၎င်းက ပြောသည်။
လက်ရှိအချိန်ထိ ဖယ်ခုံမြို့နယ် နှင့် ပင်လောင်းမြို့နယ်တို့တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ စစ်ရေးတင်းမာနေသေးသည်။
ပြီးခဲ့သည့် ဖေဖော်ဝါရီ ၂၄ က တိုက်ပွဲဖြစ်ပွားခဲ့သည့်နေရာသည် ဖယ်ခုံမြို့ နှင့် ပင်လောင်းမြို့ နယ်စပ် တောင်စလုံးကျေးရွာ၊ မြောက်စလုံးကျေးရွာ နှင့် တောင်မဲတင်းရွာတို့ဖြစ်ကြောင်းသိရသည်။
Leave a Comments