သျှမ်းပြည်ရှိ မြန်မာ – တရုတ် ၊ မြန်မာ – ထိုင်း နယ်စပ် ကုန်သွယ်ရေးစခန်းများမှတဆင့် တဖက်နိုင်ငံသို့ ဆန်နှင့် ဆန်ထွက် ပစ္စည်းများ တင်ပို့မှုမှ ရရှိလာသည့် ပို့ကုန်ရငွေများ၏ ၆၅ ရာခိုင်နှုန်းကို စစ်ကောင်စီ လက် အောက်ခံ ဗဟိုဘဏ်ဈေး နှင့် လဲလှယ်ရမည်ဖြစ်ကြောင်း သတင်းထုတ်ပြန်ထားသည်။

လာမည့် မတ် ၁ ရက်မှ စတင်ပြီး နယ်စပ်တစ်လျှောက် ဆန် နှင့် ဆန်ထွက်ပစ္စည်းများ တင်ပို့မှုမှ ရရှိလာသည့် ပို့ကုန်ရငွေများ၏ ၆၅ % ကို စစ်ကောင်စီမှ သတ်မှတ်ထားသည့် နိုင်ငံခြားငွေ လဲလှယ်နှုန်းအတိုင်း လဲလှယ်ရမည် ဖြစ်ကြောင်း စီးပွားရေး နှင့် ကူးသန်း ရောင်းဝယ်ရေးဝန်ကြီးဌာနက ယမန်နေ့ ဖေဖော်ဝါရီ (၂၃) ရက်တွင် ထုတ်ပြန်သည်။

ယခင် နယ်စပ်ကုန်သွယ်ရေး၌ လယ်ယာထွက်ကုန်များဖြစ်သည့် ပဲမျိုးစုံ၊ ဆီထွက်သီးနှံ၊ ပြောင်း၊ ရာဘာနှင့် ရေထွက် ကုန်ပစ္စည်းများ၏ ပို့ကုန်ရငွေများကိုသာ သတ်မှတ်ဈေး ၆၅ ရာခိုင်နှုန်းလဲလှယ်ရန် သတ်မှတ်ထားရာမှ ယခုအခါ ဆန်နှင့် ဆန်ကွဲကိုပါ ထည့်သွင်းလာခြင်း ဖြစ်သည်။

ကုန်သည်များ အနေဖြင့် ငွေလဲသည်ဖြစ်စေ မလဲသည်ဖြစ်စေ ဘဏ်အကောင့်ထဲတွင် ပို့ကုန်တင်ပို့မှုမှ ဒေါ်လာ သို့မဟုတ် ယွမ် ငွေဝင်လာသည်နှင့် စစ်ကောင်စီ၏ ဗဟိုဘဏ်က ၆၅ ရာခိုင်နှုန်းကို ဖြတ်ယူထားမည်ဖြစ်ပြီး ကျန် ၃၅ ရာခိုင်နှုန်းကို တလအတွင်း ကုန်သည်ကြိုက်ဈေး နှင့် လဲလှယ်နိုင်ကြောင်း ကန့်သတ်ထားသည်။

ယခင် နယ်စပ်ကုန်သွယ်ရေး၌ လယ်ယာထွက်ကုန်များ ဖြစ်သည့် ပဲမျိုးစုံ၊ ဆီထွက်သီးနှံ၊ ပြောင်း၊ ရာဘာနှင့် ရေထွက် ကုန်ပစ္စည်းများ၏ ပို့ကုန်ရငွေများကိုသာ သတ်မှတ်ဈေး ၆၅ ရာခိုင်နှုန်း လဲလှယ်ရန် သတ်မှတ်ထားရာမှ ယခုအခါ ဆန် နှင့် ဆန် ကွဲကိုပါ ထည့်သွင်းလာခြင်း ဖြစ်သည်။

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ထုတ်ပြန် ကြေညာချက်အရ ဆန်နှင့် ဆန်ထွက် ပစ္စည်းများ၏ ပို့ကုန်ဝင်ငွေအပေါ် တပြေးညီ ကျင့်သုံးမည်ဖြစ်သောကြောင့် ယင်းရက်မတိုင်မီ ကုန်ဖိုးငွေ ကြိုတင်ပေးပို့ထားပါက ပြည်ပသို့ တင်ပို့မည့် ဆန် နှင့် ဆန်ထွက်ပစွည်းပို့ကုန် ရငွေများကိုလည်း သတ်မှတ်နှုန်းထားအတိုင်း မြန်မာ ကျပ်ငွေဖြင့် လဲလှယ်ရမည်ဟု ဖော်ပြထားသည်။

စစ်ကောင်စီမှ ယင်းကဲ့သို့ ထုတ်ပြန်ပြောဆိုလာခြင်း နှင့် ပတ်သက်ပြီး ကုန်သယ်များအတွက် ဆန်တင်ပို့မှု အတွက် ငွေကြေးနစ်နာချက်များ ရှိလာနိုင်ကြောင်းလည်း မြန်မာ – တရုတ်နယ်စပ်မှ ဆန်ကုန်သည်များက ပြောဆို သုံးသပ်ထားကြသည်။

ဗဟိုဘဏ် သတ်မှတ်စျေးမှာ တဒေါ်လာလျှင် ငွေကျပ် ၂၁၀၀ ဖြစ်ပြီး ပြင်ပ ကျပ်နှင့် ဒေါ်လာဈေး လဲလှယ်မှုများက ၂၉၀၀ နီးပါး ဝန်းကျင်ဖြင့် အရောင်းအဝယ် ဖြစ်နေကြောင်း သိရသည်။