သျှမ်းပြည် လားရှိုးခရိုင် တန့်ယန်းမြို့နယ်မှ အရပ်သား ပြည်သူများကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၏ တပ်ဖွဲ့ဝင်ဟု စွပ်စွဲကာ ပစ်သတ်သည့် စစ်ကောင်စီ တပ်ဖွဲ့သည် ရန်လိုနေသည်ဟု SSPP/SSA က ပြောသည်။
ပြီးခဲ့သည့် ဖေဖော်ဝါရီလ ၂၂ ရက် ညနေ ၄ နာရီ ဝန်းကျင်တွင် တန့်ယန်းမြိုန့ယ် မိုင်းပတ်ကျေးရွာအုပ်စု မန်လွယ်ကျေးရွာမှ လုံးအုံတို့၏ နေအိမ်ကို SSPP နှင့် ပတ်သက်သည် ဆိုသည့်အကြောင်းပြချက်ဖြင့် စစ်ကောင်စီမှ စစ်အင်အားသုံး ပိတ်ဆို့ပြီး ပစ်ခတ်သတ်ဖြတ်ခဲ့မှုကို သျှမ်းသံတော်ဆင့်မှ ဆက်သွယ်မေးမြန်းရာ SSPP/SSA ပြောရေးဆိုခွင့် ဒု – ဗိုလ်မှူးကြီး စိုင်းဆုက ပြောဆိုခြင်းဖြစ်သည်။
“ကျနော်တို့က ပြည်ထောင်စုအဆင့် ငြိမ်းချမ်းရေး ဆွေးနွေးမှုတွေလုပ်ထားပြီးဖြစ်တယ်။ SSPP ရယ် ဆိုပြီးတော့ အရပ်သားကို အခုလို ပစ်ခတ်တာမျိုးတော့ ကျနော်တို့ လက်မခံပါဘူး။ အခု သားအဖ သုံးယောက်လုံး သေဆုံး သွားရတယ်။ တော်တော်ရက်စက်တယ်လို့ ပြောရမယ်။ ဒါက SSPP ကို ရန်လိုမှုဖြစ်တယ်လို့ မြင်တယ်” ဟု ဒု – ဗိုလ်မှူးကြီး စိုင်းဆုက သျှမ်းသံတော်ဆင့်ကို ပြောသည်။
ရပ်ရွာထဲ ဝင်ရောက်လာပြီး သေနတ်ဖြင့် ပစ်ခတ်မှု လုပ်သည့် စစ်ကောင်စီ တပ်ဖွဲ့သည် မိုင်းပတ်အခြေစိုက် ခြေလျင်တပ်ရင်း ၁၃၆ မှ ဖြစ်ကြပြီး စစ်ကား လေးစီးဖြင့် ရောက်လာကာ အိမ်ကို ဝိုင်းဝန်းပိတ်ဆို့ပြီး ပစ်ခတ်ခဲ့ ကြောင်း သိရသည်။
စစ်ကောင်စီတို့၏ ပစ်ခတ်သတ်ဖြတ်မှုကြောင့် သေဆုံးသွားရသည့် သားအဖ သုံးဦးသည် ဒေသအတွင်း တော လိုက် သူများ ကိုင်ဆောင်သည့် လေသေနတ်၊ တူမီးသေနတ် နှင့် တခြား ရှေးခတ် အရပ်သားသုံး သေနတ်များကို ပြုပြင်ပေးသူ ဖြစ်ပြီး တခြား သံထည်လုပ်ငန်းကို လုပ်ကိုင်သူ ဖြစ်ကြောင်းသိရသည်။
စစ်ကောင်စီတို့၏ စွပ်စွဲချက်အတိုင်း ပစ်ခတ်ခံရပြီး သေဆုံးရသည့် သားအဖ သုံးဦးသည် SSPP/SSA နှင့် ပတ်သက်မှု မရှိသည့်အကြောင်းလည်း ဒု – ဗိုလ်မှူးကြီး စိုင်းဆု က ဆက်ပြောသည်။
“တတ်တဲ့ ပညာတွေနဲ့ သေနတ်ကို ပြုပြင်ပေးရင်း ဝမ်းစာရှာဖွေနေတဲ့ အရပ်သား ပြည်သူတွေပါပဲ၊ SSPP/SSA နဲ့ မပတ်သက်ပါဘူး၊ ဒေသထဲက SSPP/SSA တပ်သားတွေကိုင်တဲ့ သေနတ်ကို အနည်းအကျဥ်းလောက် ပြင်ပေးဖူးရင် ဖြစ်ကောင်းဖြစ်နိုင်မယ်၊ ဒါပေမယ့် ကျနော်တို့မှာ သေနတ်ပြင်တဲ့ ဌာနလည်းရှိပြီးသားပဲ၊ SSPP နာမည်နဲ့ အရပ်သား ကို စစ်ကောင်စီက ပစ်သတ်တာ” ဟု ဒု – ဗိုလ်မှူးကြီး စိုင်းဆုက ဆိုသည်။
စစ်ကောင်စီတို့၏ ပစ်ခတ်မှုကြောင့် သေဆုံးရသူများသည် အိမ်ရှင် လုံးစိုင်းအုံ ၊ သားအကြီးဖြစ်သူ စိုင်းဝမ်း နှင့် သားအငယ် စိုင်းထွန်းကျော်တို့ ဖြစ်ကြကြောင်း သိရသည်။
အဆိုပါ ပစ်ခတ်ခံရသည့် လုံးစိုင်းအုံတို့ မိသားစုကို စစ်ကောင်စီ တပ်သားတို့က သယ်ဆောင်သွားကြောင်း ဒေသခံများက ပြောသည်။
“ဒီအိမ်ကလား SSPP/SSA ရဲ့ လူဆိုတာ ဆိုပြီး အော်သံတွေ စကြားရတယ်၊ ပြီးတော့ စစ်သားဘက်က သေနတ် သံတွေ ထွက်လာတော့တာပဲ၊ အလောင်းကို သူတို့ကားပေါ်ဆွဲတင်ပြီး သယ်သွားတယ်၊ ဘယ်မှာ ထားသလဲတော့ မသေချာဘူး။ အိမ်ထဲက ပစ္စည်းတွေ ငွေတွေ ကိုလည်း သူတို့က မွှေနှောက်ယူသွားတယ်” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိ အချိန်သည် စစ်အုပ်ချုပ်ချိန် ဖြစ်နေသည့်အတွက် ဥပဒေ စိုးမိုးမှုလည်း ကင်းမဲ့နေရာ အရပ်သား ပြည်သူများ အနေဖြင့် လိမ္မာပါးနပ်စွာဖြင့် အန္တရာယ်ကို ရှောင်သင့်ကြောင်းလည်း ဒု – ဗိုလ်မှူကြီး စိုင်းဆုက ပြောဆို သတိ ပေးထားသည်။
ထို့အပြင် SSPP/SSA အမည်ဖြင့် ရန်လိုခြင်း စွပ်စွဲခြင်း နှင့် တိုက်ခိုက်ခြင်းများ ထပ်မံပြုလုပ်ပါက စစ်ကောင်စီ အနေဖြင့် တာဝန်ယူ ဖြေရှင်းပေးရမည် ဖြစ်ကြောင်းလည်း ၎င်းက ဆက်ဆိုသည်။
စစ်ကောင်စီ တပ်ဖွဲ့၏ အကြမ်းဖက် လုပ်ရပ်ကြောင့် လက်ရှိအချိန်တွင် ဒေသခံ ပြည်သူများလည်း ထိတ်လန့် ကြောက်ရွံ့နေကြကြောင်းလည်း သိရသည်။
စစ်ကောင်စီ တပ်ဖွဲ့သည် တစ်နှစ်အပစ်ရပ် ကြေညာထားသော်လည်း တိုင်းရင်းသား လက်နက်ကိုင်များ၏ ဌာန ချုပ်/ တပ်ရင်းနေရာများကို မြေပြင်ထိုးစစ်ဆင် တိုက်ခိုက်ခြင်း၊ လေယာဥ်ဖြင့် ဗုံးကြဲတိုက်ခိုက်ခြင်း စသည့် အကြမ်းဖက် လုပ်ရပ်များကို ဆက်လက်လုပ်ဆောင်နေသည့်အပြင် ယခုလို ရပ်ရွာထဲ ပစ်ခတ်မှုတွေလည်း ပြုလုပ်နေသည်။
စစ်ကောင်စီ၏ အပစ်ရပ် ကြေညာချက်သည် ဟာသတစ်ခုသာ ဖြစ်နေကြောင်းလည်း တိုင်းရင်းသား လက်နက်ကိုင် တပ်ဖွဲ့တချို့က ပြောဆို သုံးသပ်နေကြသည်။
Leave a Comments